முல்லைத்தீவு விமானப்படை முகாமில் தடுத்துவைக்கப்பட்டுள்ள 119 ரோஹிங்கிய அகதிகள் உயிர்வாழ்வதற்கு அவசியமான அடிப்படை வசதிகள் வழங்கப்பட்டிருப்பினும், பிறப்புப்பதிவு, சுகாதார மற்றும் மருத்துவ வசதிகள், கல்வி வழங்கல் உள்ளிட்ட முக்கிய தேவைப்பாடுகளைப் பூர்த்தி செய்வதற்கு அரசாங்கம் நடவடிக்கை எடுக்கவேண்டும் என இலங்கை மனித உரிமைகள் ஆணைக்குழு பரிந்துரைத்துள்ளது.
நாடற்ற நிலையில் புகலிடக் கோரிக்கையாளர்களாக உள்ள 119 ரோஹிங்கிய அகதிகள் தடுத்துவைக்கப்பட்டுள்ள ஒரு குடிவரவு தடுப்பு முகாமாகச் செயற்பட்டுவரும் முல்லைத்தீவு விமானப்படை முகாமில் கடந்த செப்டெம்பர் 3ஆம் திகதி இலங்கை மனித உரிமைகள் ஆணைக்குழுவின் தேசிய தடுப்புப் பொறிமுறையானது முன்னறிவிக்கப்படாத திடீர் சோதனையை நடாத்தியது. அச்சோதனையின்போது அவதானிக்கப்பட்ட விடயங்கள் மற்றும் பரிந்துரைகளை உள்ளடக்கி ஆணைக்குழுவினால் வெளியிடப்பட்டுள்ள அறிக்கையில் சுட்டிக்காட்டப்பட்டுள்ள முக்கிய விடயங்கள் வருமாறு:
இம்முகாமுக்குள் கடந்த ஜனவரி 20ஆம் திகதி மேற்கொள்ளப்பட்ட பரிசோதனைக்கும் கடந்த செப்டெம்பர் 3ஆம் திகதி மேற்கொள்ளப்பட்ட விஜயத்துக்கும் இடைப்பட்ட காலப்பகுதியில் தடுத்துவைக்கப்பட்டிருப்போரின் எண்ணிக்கை 116இலிருந்து 119ஆக அதிகரித்திருப்பதுடன், இந்த மாற்றத்தில் முகாமுக்குள் நிகழ்ந்த ஒரு மரணமும் 4 பிறப்புக்களும் அடங்குகின்றன. அதற்கமைய தற்போது ஆண்கள் 35 பேரும், பெண்கள் 24 பேரும், 18 வயதுக்குட்பட்ட சிறுவர்கள் (ஆண்) 30 பேரும், 18 வயதுக்குட்பட்ட சிறுமியர் (பெண்) 30 பேரும் என மொத்தமாக 119 பேர் உள்ளனர்.
இம்முகாமில் தடுத்துவைக்கப்பட்டுள்ள அகதிகளுக்கு உணவு, நீர், தனிப்பட்ட சுகாதாரப் பொருட்களின் அவ்வப்போதைய விநியோகம் என்பன உள்ளடங்கலாக உயிர்வாழ்வதற்கு அவசியமான அடிப்படை வசதிகள் வழங்கப்பட்டாலும், நாட்டின் அரசியலமைப்பு மற்றும் சர்வதேச மனித உரிமைகள் நியமங்கள் என்பவற்றின் அடிப்படையில் சில குறிப்பிடத்தக்க பின்னடைவுகள் அவதானிக்கப்பட்டுள்ளன.
அதிகரித்த சன நெரிசல், போதிய காற்றோட்டம் இன்மை, பாலின ரீதியில் பிரிக்கப்பட்ட வசதிகள் இல்லாததன் காரணமாக நபர்களின் தனியுரிமை பாதிக்கப்படல், மருத்துவ சேவையைப் பெற்றுக்கொள்வதற்கு ஏதுவாக பிரத்யேக போக்குவரத்து வசதியின்மை, முகாமில் பிறந்த குழந்தைகளுக்கு உத்தியோகபூர்வ பிறப்புப்பதிவு மறுக்கப்படல் மற்றும் முகாமில் வசிக்கும் சுமார் 60 சிறுவர்களுக்கு முறையான கல்வியை வழங்குவதற்குரிய கட்டமைப்புக்கள் இன்மை என்பன உள்ளடங்கலாக சிறுவர்களின் அடிப்படை உரிமைகள் மீறப்படல், மொழி ரீதியான சிக்கல்கள் காரணமாக நிலவும் தொடர்பாடல் குறைபாடுகள், அன்றாடம் முகாமை நிர்வகிப்பதில் நிலவும் தாமதங்கள் என்பன பிரதானமாக அவதானிக்கப்பட்ட பின்னடைவுகளாகும்.
இலங்கையின் எல்லைக்குள் வசிக்கும் அனைத்து நபர்களும் அவர்களது தேசியத்துவம், குடியுரிமை மற்றும் சட்ட ஆளுகை என்பவற்றுக்கு அப்பால், அரசியலமைப்பின் 11ஆவது உறுப்புரைக்கு அமைவாக சித்திரவதை, மனிதத்தன்மையற்ற அல்லது அவமானகரமான முறையில் நடாத்தப்படுவதிலிருந்து பாதுகாப்புப் பெறுவதற்கு உரித்துடையவர்களாவர் என்பதை மீண்டும் நினைவுறுத்துகின்றோம்.
மேலும் இலங்கையில் முகாமுக்குள் பிறக்கும் குழந்தைகளுக்கு பிறப்புப்பதிவை மேற்கொண்டு, சிவில் மற்றும் அரசியல் உரிமைகள் தொடர்பான சர்வதேச சமவாயத்தின் பிரகாரம் பிறப்புச்சான்றிதழ் வழங்கல், பாலின அடிப்படையிலான பாதுகாப்பு மற்றும் தனியுரிமையைப் பேணக்கூடிய உட்கட்டமைப்பு வசதிகள் நிறுவப்படுவதை உறுதிப்படுத்தல், அடிப்படை சுகாதாரத்தை உறுதிப்படுத்துவதற்கு அவசியமான உட்கட்டமைப்புசார் வசதிகளை நிறுவுதல், அவசர மருத்துவ உதவியைப் பெறுவதற்கு ஏதுவாக போக்குவரத்து சேவையை ஏற்படுத்தல், முகாமில் உள்ள சிறுவர்களுக்கான கல்வி கற்றல் செயற்றிட்டங்களை ஆரம்பித்தல் என்பவற்றுக்கான நடவடிக்கைகள் அரசாங்கத்தின் கீழ் இயங்கும் உரிய கட்டமைப்புக்களால் முன்னெடுக்கப்படவேண்டும் என அவ்வறிக்கையில் வலியுறுத்தப்பட்டுள்ளது.
