கனடாவின் பிரிட்டிஷ் கொலம்பியா (B.C.) மாகாணத்தில், தான் தூக்கத்தில் அறியாமல் செய்த செயலே (Sexsomnia) பாலியல் வன்கொடுமைக்குக் காரணம் என வாதிட்டுத் தப்பிக்க முயன்ற சுரங்கத் துறை முன்னாள் நிர்வாகிக்கு, பாதிக்கப்பட்ட பெண்ணிற்கு 2,00,000 டாலருக்கும் அதிகத் தொகையை (இந்திய மதிப்பில் சுமார் ₹1.67 கோடி) இழப்பீடாக வழங்க வேண்டும் என அம்மாநில உரிமையியல் (Civil) நீதிமன்றம் அதிரடி உத்தரவிட்டுள்ளது.

பின்னணியும் குற்றச்சாட்டும்
முன்னாள் சுரங்கத் துறை நிர்வாகியான கார்ல் ரிச்சர்ட் ஆண்டோனியஸ் (Karl Richard Antonius) என்பவர், கடந்த 2015-ஆம் ஆண்டு ஃபேர்மாண்ட் பசிபிக் ரிம் (Fairmont Pacific Rim) விடுதியில் தங்கியிருந்தபோது பெண் ஒருவரைப் பாலியல் வன்கொடுமை செய்துள்ளார்.

ஆரம்பத்தில் இக்குற்றச்சாட்டை மறுத்த ஆண்டோனியஸ், அந்தப் பெண் தன்னிடம் பணம் பறிப்பதற்காகப் பொய் கூறுவதாகக் குற்றம் சாட்டினார். ஆனால், மருத்துவப் பரிசோதனையில் பெறப்பட்ட டிஎன்ஏ (DNA) ஆதாரங்கள் அவருக்கு எதிராக அமைந்தன.

இதனைத் தொடர்ந்து தனது வாதத்தை மாற்றிய அவர், தான் “செக்சோம்னியா” (தூக்கத்தில் இருக்கும்போதே விழிப்புணர்வின்றிப் பாலியல் செயல்களில் ஈடுபடும் ஒருவகை தூக்கக் குறைபாடு) என்ற நோயால் பாதிக்கப்பட்டுள்ளதாகவும், அதனால் தன் மீதான குற்றத்திற்குத் தான் பொறுப்பல்ல என்றும் வாதிட்டார்.

நீதிமன்றத்தின் தீர்ப்பு
இந்த வழக்கை விசாரித்த குற்றவியல் நீதிமன்ற நீதிபதி, ஆண்டோனியஸின் சாட்சியங்கள் நம்பகத்தன்மை அற்றவை எனக் கூறி அவரது வாதத்தை முற்றிலும் நிராகரித்தார். மேலும் 2020-ஆம் ஆண்டில் அவருக்கு இரண்டு ஆண்டுகள் சிறைத்தண்டனை விதித்துத் தீர்ப்பளித்தார்.

உரிமையியல் வழக்கும் இழப்பீடும் (Civil Case & Damages)
குற்றவியல் தண்டனையைத் தொடர்ந்து, பாதிக்கப்பட்ட அந்தப் பெண் (அடையாளம் பாதுகாப்புச் சட்டத்தின் கீழ் மறைக்கப்பட்டுள்ளது) தனக்கு ஏற்பட்ட மன உளைச்சலுக்கு இழப்பீடு கோரி ஆண்டோனியஸ் மீது உரிமையியல் நீதிமன்றத்தில் வழக்குத் தொடர்ந்தார்.

இந்த வழக்கை விசாரித்த நீதிபதி வாரன் பி. மில்மேன் (Warren B. Milman), குற்றவியல் வழக்கிலேயே குற்றச்சாட்டு நிரூபிக்கப்பட்டுவிட்டதால் ஆண்டோனியஸ் இழப்பீடு வழங்கக் கடமைப்பட்டவர் என்று தீர்ப்பளித்தார். இதன்படி:

பாதிக்கப்பட்ட பெண்ணின் வலி மற்றும் வேதனைக்காக (Non-pecuniary damages) $200,000 டாலர்

அவரது மனநல ஆலோசனை மற்றும் மருத்துவச் செலவுகளுக்காக $10,000 டாலர்

ஆகிய தொகைகளை வழங்க உத்தரவிடப்பட்டுள்ளது.

“பழைய நிலையை இழந்துவிட்டேன்” – பாதிக்கப்பட்ட பெண்ணின் உருக்கம்
சம்பவம் நடந்து 11 ஆண்டுகள் கடந்தும் தான் இன்னும் இயல்பு வாழ்க்கைக்குத் திரும்ப முடியாமல் தவிப்பதாக அந்தப் பெண் நீதிமன்றத்தில் சமர்ப்பித்த பிரமாணப் பத்திரத்தில் தெரிவித்துள்ளார்.

“நான் எனது பழைய நிலையை இழந்துவிட்டேன். மனிதர்கள், குறிப்பாக ஆண்கள் மீதான நம்பிக்கையை முற்றிலும் இழந்துவிட்டேன். இப்போதும் அந்தச் சம்பவத்தின் பயங்கரக் கனவுகள் என்னை அச்சுறுத்துகின்றன. என் வீடே எனது பாதுகாப்பு அரணாகிவிட்டது. வெளியில் வர அஞ்சுகிறேன். ஆண்டோனியஸ் எனது பாதுகாப்பையும் சுயமரியாதையையும் பறித்துவிட்டார்.”

என்று அந்தப் பெண் உருக்கமாகத் தெரிவித்துள்ளார்.

பாதிக்கப்பட்ட பெண்ணின் இந்த நிலையை அவரது தாயார் மற்றும் உளவியலாளரின் வாக்குமூலங்களும் உறுதிப்படுத்தியதை அடுத்து, நீதிமன்றம் இந்த இழப்பீட்டுத் தொகையை உறுதி செய்துள்ளது