நேபாள-திபெத் எல்லைப் பகுதியில் ஏற்பட்ட பேரழிவு தரும் வெள்ளப் பெருக்கிற்குப் பிறகு, காணாமல்போன பல டஜன் ஆஸ்திரேலியர்களில் இலங்கை வம்சாவளியைச் சேர்ந்த ஆஸ்திரேலியத் தம்பதியும் அவர்களின் இரு சிறு மகன்களும் அடங்குவதாக ஆஸ்திரேலிய ஊடகங்கள் செய்தி வெளியிட்டுள்ளன.

சந்திரசேகரன் முரளிதரன் (47), அவரது மனைவி ஷைலஜா முரளிதரன் (42), மற்றும் அவர்களது மகன்களான அஸ்வின் (14), ஆருஷ் (11) ஆகியோர் ‘ஹிமாலயன் கிளேசியர் அட்வென்ச்சர்ஸ்’ (Himalayan Glacier Adventures) குழுவுடன் பயணித்த நிலையில், அவர்களுடனான தொடர்பு துண்டிக்கப்பட்டுள்ளது.

இக்குடும்பம் வடமேற்கு சிட்னியில் வசித்து வருகிறது. சந்திரசேகரன் யாழ்ப்பாணத்தின் கோப்பாய் பகுதியைச் சேர்ந்தவர் என்றும், அவரும் அவரது மனைவியும் இலங்கையிலிருந்து ஆஸ்திரேலியாவிற்கு இடம்பெயர்ந்த முதலாம் தலைமுறை புலம்பெயர்ந்தோர்கள் என்றும் இலங்கை மற்றும் ஆஸ்திரேலிய ஊடகச் செய்திகள் தெரிவிக்கின்றன. இவர்களது இரு மகன்களும் ஆஸ்திரேலியத் தமிழ் டயஸ்போராவில் பிறந்தவர்கள் ஆவர்.

ஆகஸ்ட் 26 அன்று வெள்ளப் பெருக்கு ஏற்பட்டபோது, இக்குடும்பத்தினர் கைலாய மலைப் பகுதிக்கு ஆன்மீகப் பயணம் மேற்கொண்டிருந்தனர்.

பேரழிவு ஏற்பட்ட நாளன்று காலையிலேயே குடும்பத்தினருடன் இறுதியாகப் பேச முடிந்ததாக உறவினர்கள் தெரிவித்துள்ளனர். குடிவரவு நடைமுறைகளுக்காக எல்லைப் பகுதியை நோக்கிப் பயணிப்பதற்கு முன்னர், அவர்கள் காலை உணவு சாப்பிடத் தயாராகிக் கொண்டிருந்ததாக ஏபிசி நியூஸ் (ABC News) செய்தி வெளியிட்டுள்ளது.

அதன்பின்னர் ஏற்பட்ட கடுமையான வெள்ளம் மற்றும் நிலச்சரிவு காரணமாகப் பாதிக்கப்பட்ட பகுதியின் வீதிகள், மின்சாரம் மற்றும் தொடர்பு வசதிகள் முடங்கியதால், உறவினர்களால் அவர்களைத் தொடர்பு கொள்ள முடியாமல் போனது.

முரளிதரன் குடும்பத்தினர் 15 ஆஸ்திரேலியர்களைக் கொண்ட ஒரு சுற்றுலாக் குழுவுடன் பயணித்துள்ளனர். இயற்கை சீற்றம் தாக்கியபோது, இக்குழுவினர் நேபாள-சீன எல்லைக்கு அருகில் உள்ள ரசுவாகதி (Rasuwagadhi) பகுதிக்கு அருகே இருந்ததாக நம்பப்படுகிறது.

வெள்ளப் பெருக்கைத் தொடர்ந்து 43 ஆஸ்திரேலியர்களின் நிலை குறித்து இன்னும் அறியப்படவில்லை என ஆஸ்திரேலிய அதிகாரிகள் திங்கள்கிழமை தெரிவித்துள்ளனர். அவர்களில் பலர் நேபாளம் வழியாகத் திபெத்தில் உள்ள கைலாய மலைக்கு ஆன்மீகப் பயணம் மேற்கொண்ட யாத்ரீகர்கள் ஆவர்.

இமயமலைப் பகுதியில் அண்மைக்காலத்தில் ஏற்பட்ட மிக மோசமான மற்றும் பேரழிவை ஏற்படுத்திய வெள்ளப் பெருக்குகளில் ஒன்றாக இது மாறியுள்ளது.

எனினும், காணாமல்போன நான்கு குடும்ப உறுப்பினர்களையும் கண்டுபிடிப்பதிலேயே முரளிதரன் குடும்பத்து உறவினர்களின் முழு கவனமும் குவிந்துள்ளது.

அதிகாரிகளிடமிருந்தும் சுற்றுலா அமைப்பாளர்களிடமிருந்தும் தொடர்ந்து தகவல்களைச் சேகரித்து வருவதாகவும், குடும்பத்தினர் பாதுகாப்பான இடத்தை அடைந்திருப்பார்கள் என்ற நம்பிக்கையுடன் காத்திருப்பதாகவும் ஷைலஜாவின் சகோதரி ஆஸ்திரேலிய ஊடகங்களிடம் தெரிவித்துள்ளார்.