இலங்கையின் நீர்கொழும்பு சிறைச்சாலையில் ஏற்பட்ட கொடிய வன்முறைச் சம்பவங்கள் குறித்த புதிய விபரங்களைச் சிறைச்சாலைகள் பதில் ஆணையாளர் நாயகம் பிரசாத் ஹேமந்த குமார வெளியிட்டுள்ளார். ஆரம்பகட்ட வன்முறைகள் போதைப்பொருள் கடத்தல் மற்றும் திட்டமிட்ட குற்றச்செயல்களுடன் தொடர்புடைய கைதிகளுக்கு இடையிலேயே உருவாகியுள்ளதாக அவர் தெரிவித்துள்ளார்.

அமைச்சரவை ஊடக சந்திப்பில் உரையாற்றிய ஹேமந்த குமார, கைதிகள் சிறைச்சாலையின் மருந்தகத்தை (pharmacy) உடைத்து, அங்குள்ள மாத்திரைகளை போதைப்பொருளாக உட்கொண்டதற்கான ஆதாரங்கள் சிறைச்சாலை அதிகாரிகளுக்குக் கிடைத்துள்ளதாகக் குறிப்பிட்டார். இதனால் பல கைதிகள் கடுமையான ஆக்ரோஷமான மற்றும் மனநிலை சீரற்ற நிலையில் இருந்துள்ளனர்.

பதில் ஆணையாளர் நாயகத்தின் கூற்றுப்படி, ஞாயிற்றுக்கிழமை மாலையாகும்போது சிறைச்சாலை அதிகாரிகள் நிலைமையைக் கட்டுப்பாட்டுக்குள் கொண்டுவந்து, கைதிகளை அந்தந்த வார்டுகளுக்கு திருப்பி அனுப்பியதுடன், பாதுகாப்பு நடவடிக்கைகளை மீள நிலைநிறுத்தி உணவு மற்றும் தண்ணீரை வழங்கியிருந்தனர். எனினும், மறுநாள் திங்கட்கிழமை காலையில் நிலைமை மீண்டும் மோசமடைந்தது.

“இந்தக் கைதிகள் சிறை மருந்தகத்தை நாசம் செய்தனர். அங்கிருந்த மாத்திரைகளை போதைப்பொருளாகப் பயன்படுத்தியதால் அவர்கள் கடுமையான ஆக்ரோஷமான நிலையில் இருந்தனர். ஞாயிற்றுக்கிழமை மாலையாகும்போது நிலைமை கட்டுப்பாட்டுக்குள் கொண்டுவரப்பட்டது. கைதிகள் தத்தமது வார்டுகளுக்கு அனுப்பப்பட்டு, வார்டுகள் பூட்டப்பட்டு, உணவு, தண்ணீர் வழங்கப்பட்டு அனைத்து ஏற்பாடுகளும் பூர்த்தி செய்யப்பட்டன. அதற்கு அடுத்த நாள் திங்கட்கிழமை, நீதிமன்ற நடவடிக்கைகள் நடைபெறும் நாளாகும். அத்துடன் கைதிகளைப் பார்வையிட உறவினர்கள் வரும் நாளுமாகும். காலை உணவு வழங்கப்பட்ட பின்னர், அன்றாட பணிகளைத் தொடங்குவதற்காக அதிகாரிகள் வளாகத்திற்குள் நுழைந்தனர். எனினும், அந்த மாத்திரைகளை உட்கொண்டதால் பல கைதிகள் அப்போதும் கடுமையான மனநிலை சீரற்ற நிலையில் இருந்தமை தற்போது தெரியவந்துள்ளது,” என்று அவர் கூறினார்.

சிறைச்சாலையினுள் சுமார் 40 டெங்கு நோயாளிகள் உயிரிழந்துள்ளதாகவும், கைதிகளுக்குப் போதிய உணவு மற்றும் மருத்துவ சிகிச்சை மறுக்கப்பட்டதாகவும் கூறப்படும் குற்றச்சாட்டுகள் குறித்து எழுப்பப்பட்ட கேள்விக்கு பதிலளித்த ஹேமந்த குமார, அக்குற்றச்சாட்டுகளை வன்மையாக நிராகரித்தார்.

“வளாகத்தினுள் பாதுகாப்பை உறுதிப்படுத்த தேவையான அனைத்து ஏற்பாடுகளையும் நாங்கள் செய்திருந்தோம். கைதிகள் போதை மாத்திரைகளை உட்கொண்டதாலேயே சீரற்ற மனநிலையில் இருந்தனர். ஆண் கைதிகள் வீசியெறிந்த அந்த மாத்திரைகளை பெண் கைதிகளும் உட்கொண்டிருந்தனர். இதனை உட்கொண்ட பின்னரே பல்வேறு குற்றச்சாட்டுகள் முன்வைக்கப்பட்டன. நீங்கள் டெங்கு பிரச்சினையை எழுப்பியதால் அது பற்றிக் கூறுகிறேன். தேவையான அனைத்து சிகிச்சைகளையும் வழங்க மருத்துவ அதிகாரிகள் தயாராக உள்ளனர். தேவைப்படும் போதெல்லாம் மருத்துவமனையில் அனுமதிப்பதற்கான நடைமுறைகள் பின்பற்றப்பட்டுள்ளன. நோயாளிகளுக்கு வழக்கமான தரமான பராமரிப்பு கிடைத்துள்ளது,” என்றார்.

அமைச்சரவைப் பேச்சாளரும் அமைச்சருமான கலாநிதி நளிந்த ஜயதிஸ்ஸவும் இக்குற்றச்சாட்டுகளை நிராகரித்ததுடன், அவை முற்றிலும் பொய்யானவை என விவரித்தார்.

“டெங்கு நோயால் 40 பேர் இறந்திருந்தால், அவர்களின் உடல்கள் இருக்க வேண்டும். எனவே, அந்தக் கூற்று முற்றிலும் பொய்யானது. அப்படியான எந்தவொரு சூழ்நிலையும் ஏற்படவில்லை. சிகிச்சை தேவைப்படும் எந்தவொரு நோயாளிக்கும் சிகிச்சை அளிக்கப்படுகிறது. தேவையான மருத்துவர்களும் மருத்துவப் பணியாளர்களும் உள்ளனர். காய்ச்சல் பாதிப்புகள் சில பதிவாகியிருந்தன. உண்மையில், அதற்கு முந்தைய நாள் அத்தகைய ஒரு பாதிப்பு மட்டுமே பதிவாகியிருந்தது. அந்த நபர்களுக்கு உரிய சிகிச்சை அளிக்கப்பட்டது. எனவே, அவ்வாறான எந்தவொரு புகாரும் கிடைக்கப் பெறவில்லை,” என்று அமைச்சர் ஜயதிஸ்ஸ கூறினார்.

இச்சம்பவத்திற்கான முதன்மைக் காரணம் குறித்துக் கேட்கப்பட்டபோது, திங்கட்கிழமை காலை அதிகாரிகள் தங்களது வழக்கமான கடமைகளை மீண்டும் ஆரம்பிக்க முற்பட்ட வேளையில், கைதிகள் குழுவொன்றிடையே ஏற்பட்ட முரண்பாடே வன்முறையாக வெடித்ததாக முதற்கட்ட தகவல்கள் தெரிவிப்பதாக பதில் ஆணையாளர் நாயகம் குறிப்பிட்டார்.

துப்பாக்கிச் சூட்டுக் காயங்களினால் ஏதேனும் சிறைச்சாலை அதிகாரிகள் உயிரிழந்துள்ளனரா எனக் கேட்கப்பட்ட கேள்விக்கு பதிலளித்த ஹேமந்த குமார, மரணத்திற்கான துல்லியமான காரணங்கள் பிரேதப் பரிசோதனை (post-mortem) விசாரணைகளின் மூலமே தீர்மானிக்கப்படும் என்றார். எனினும், கைதிகளினால் நடத்தப்பட்ட கொடூரமான தாக்குதல்களை அதிகாரிகள் நேரில் கண்டதாக அவர் தெரிவித்தார்.

“அதை பிரேதப் பரிசோதனை முடிவுகளின் மூலமே தீர்மானிக்க முடியும். இருப்பினும், கைதிகள் சிறைச்சாலை ஊழியர்களை மிகவும் கொடூரமான மற்றும் மனிதாபிமானமற்ற முறையில் தாக்குவதை அதிகாரிகள் கண்டனர். அவர்கள் அதிகாரிகளின் தலையில் தாக்கியதுடன், காட்டுமிராண்டித்தனமான தாக்குதல்களை நடத்தினர். எங்களது அதிகாரிகள் கற்பனை செய்ய முடியாத அளவிலான வன்முறைத் தாக்குதல்களுக்கு உள்ளாகினர்,” என்றார்.

வன்முறையின் போது சிறைச்சாலை அதிகாரி ஒருவர் கதவு வழியே துப்பாக்கிச் சூடு நடத்துவது போன்ற சமூக ஊடகங்களில் பரவலாகப் பகிரப்படும் வீடியோ குறித்துப் பொதுமக்களுக்கு எழுந்துள்ள கவலைகள் குறித்தும் அவர் விளக்கமளித்தார்.

அச்சூழ்நிலையை விளக்கிய ஹேமந்த குமார, சிறைச்சாலையின் பாதுகாப்பு உள்கட்டமைப்பானது ஒரு வெளிப்புற இரும்பு வாயிலையும், அதற்கு அடுத்து ஒரு மரக்கதவையும் கொண்டது என்றும், அவற்றுக்கு இடையே மதிப்புமிக்க பாதுகாப்பு உபகரணங்கள் அமைக்கப்பட்டிருக்கும் என்றும் கூறினார்.

“வழக்கமான சிறைச்சாலை நடைமுறைகளின் கீழ், சிறைச்சாலை வளாகங்களில் இரண்டு முக்கிய கதவுகள் இருக்கும். முதலாவது இரும்பு வாயில், அதைத் தொடர்ந்து ஒரு மரக்கதவு இருக்கும். இந்தக் கைதிகள் ஏற்கனவே இரும்பு வாயிலை உடைத்துக் கொண்டு, மரக்கதவை நோக்கி முன்னேறியிருந்தனர்,” என்றார்.

“இரும்பு வாயிலுக்கும் மரக்கதவுக்கும் இடையில் பார்சல் ஸ்கேனிங் இயந்திரங்கள் (parcel-scanning machines), உடல் ஸ்கேனர்கள் (body scanners) மற்றும் தகவல் தொடர்பு அமைப்புகள் உள்ளிட்ட மதிப்புமிக்க பாதுகாப்பு நிறுவல்களும் சாதனங்களும் உள்ளன. கைதிகள் இரும்பு வாயிலை உடைத்து, இந்த மரக்கதவையும் தகர்த்துக்கொண்டு வெளியே வந்திருந்தால், அதனால் ஏற்பட்டிருக்கக்கூடிய அழிவின் அளவை என்னால் மதிப்பிட முடியாது.”

இறுதித் தடையையும் அவர்கள் வெற்றிகரமாக உடைத்திருந்தால், அது பாரியளவில் கைதிகள் தப்பியோடுவதற்கும், பொதுப் பாதுகாப்பிற்குப் பெரும் விளைவுகளை ஏற்படுத்துவதற்கும் வழிவகுத்திருக்கும் என்று அவர் எச்சரித்தார்.

“அவர்கள் அந்த இறுதித் தடையை உடைத்திருந்தால், அனைத்தும் அழிக்கப்பட்டிருக்கும். அவர்கள் அனைவரும் தப்பியோடி சமூகத்திற்குள் நுழைந்திருப்பார்கள். அதன் விளைவுகள் கற்பனைக்கு எட்டாததாக இருந்திருக்கும். எனவே, சிறைச்சாலை அதிகாரிகள் தங்களது உயிரைப் பணயம் வைத்து அந்தத் தருணத்தில் அவ்வாறு செயல்படாமல் இருந்திருந்தால், இது மிகப் பெரிய பேரழிவாக மாறியிருக்கும். ஏற்படவிருந்த சாத்தியமான அழிவின் அளவை மதிப்பிடுவது கடினம். சிறைச்சாலை அதிகாரிகள் அவ்வாறு தலையிடாமல் இருந்திருந்தால், விளைவு நாம் கண்டதை விட மிக மோசமாக இருந்திருக்கும்,” என்று அவர் கூறினார்.

நீர்கொழும்பு சிறைச்சாலை வன்முறை குறித்து விசாரணைகள் தொடர்ந்து முன்னெடுக்கப்பட்டு வரும் நிலையிலேயே இந்த விபரங்கள் வெளியாகியுள்ளன. இது சமீபத்திய ஆண்டுகளில் இலங்கையில் நடந்த மிக மோசமான சிறைச்சாலை சம்பவங்களில் ஒன்றாகும் என்பதுடன், நிகழ்வுகளின் முழுமையான வரிசையை கண்டறிய அதிகாரிகள் முயன்று வருகின்றனர்.

இந்த வன்முறை மோதலில் உயிரிழந்தவர்களின் எண்ணிக்கை தற்போது 26 ஆக உயர்ந்துள்ளதாக அதிகாரிகள் தெரிவித்துள்ளனர். உயிரிழந்தவர்களில் ஏழு சிறைச்சாலை அதிகாரிகளும் அடங்குவர்.

இதேவேளை, நீர்கொழும்பு சிறைச்சாலையின் வெளிவாரி பாதுகாப்பை வழங்குவதற்காகப் போலீஸ் விசேட அதிரடிப்படையினர் (STF) மற்றும் போலீஸ் அதிகாரிகள் தொடர்ந்து ஈடுபடுத்தப்பட்டுள்ளதாகச் சிறைச்சாலைகள் ஊடகப் பேச்சாளர் ஏ.சி. கஜநாயக்க தெரிவித்துள்ளார். நிலைமை தற்போது முற்றிலும் கட்டுப்பாட்டுக்குள் கொண்டுவரப்பட்டுள்ளதாக அவர் மேலும் குறிப்பிட்டுள்ளார்.