ஏப்ரல் 28, 2026 | பிற்பகல் 1:18
சமீபத்தில் பதிவான 2.5 மில்லியன் அமெரிக்கடொலர் திறைசேரி சைபர் மோசடி தொடர்பாக, நிதி அமைச்சின் செயலாளரை பொது நிதி பற்றிய குழுவின் (COPF) முன்னிலையில் அழைக்கத் தீர்மானித்துள்ளதாக அதன் தலைவர் நாடாளுமன்ற உறுப்பினர் ஹர்ஷ டி சில்வா தெரிவித்துள்ளார்.
இன்று செய்தியாளர்களிடம் பேசிய ஹர்ஷ டி சில்வா, இன்று நடைபெறவுள்ள COPF குழு கூட்டத்தில் நிதி அமைச்சின் செயலாளரை அழைப்பதற்கான யோசனையை முன்வைக்கவுள்ளதாகக் குறிப்பிட்டார்.
“நான் இன்று COPF குழு உறுப்பினர்களைக் கூட்டியுள்ளேன். கருவூல மோசடி சம்பவம் தொடர்பாக நிதி அமைச்சின் செயலாளர் குழு முன்னிலையில் அழைக்கப்பட வேண்டும் என்பது எனது கருத்து. அவர் இது குறித்து நாடாளுமன்றத்திற்குத் தெளிவுபடுத்துவது அவசியமானது. இது அரசியலமைப்பின் கீழ் நாடாளுமன்றத்திற்கு வழங்கப்பட்டுள்ள அதிகாரமாகும்,” என்று அவர் கூறினார்.
மேலும், நிதி அமைச்சின் செயலாளர் COPF குழுவின் முன்னிலையில் ஆஜராகாமல் இருப்பதற்கு எந்த காரணமும் இல்லை என்றும் அவர் தெரிவித்தார்.
“நிதி அமைச்சின் செயலாளர் மற்றும் சம்பந்தப்பட்ட அதிகாரிகளை கூடிய விரைவில் COPF குழுவின் முன்னிலையில் அழைப்பது குறித்து இன்று குழு உறுப்பினர்களுடன் கலந்துரையாடி ஒருமித்த கருத்தை எட்டவுள்ளேன். இக்கோரிக்கையை நிராகரிக்கக் காரணமில்லை என்பதால், குழுவிலுள்ள அரசாங்கத் தரப்பு உறுப்பினர்களும் இதற்கு உடன்படுவார்கள் என நான் நம்புகிறேன்,” என்று அவர் மேலும் கூறினார்.
