சில வாரங்களுக்கு முன்பு நார்த் யார்க் (North York) பகுதியில் யூத மக்களைக் குறிவைத்து நடத்தப்பட்ட இரண்டு துப்பாக்கிச் சூடு சம்பவங்கள் தொடர்பாக, இரண்டு பதின்ம வயது இளைஞர்கள் (Teenagers) உட்பட மேலும் நான்கு பேரை டொராண்டோ காவல்துறையினர் கைது செய்துள்ளனர்.

கடந்த ஏப்ரல் 30 மற்றும் மே 7 ஆகிய தேதிகளில் நடந்த இந்தச் சம்பவங்களில் தொடர்புடைய மேலும் இரண்டு சந்தேக நபர்களை காவல்துறையினர் இன்னும் தேடி வருகின்றனர்.

“இந்தச் சம்பவங்கள் தற்செயலாக நடந்தவை அல்ல. விசாரணையில் கிடைத்த ஆதாரங்களின் அடிப்படையில், யூத சமூகத்தைச் சேர்ந்தவர்களே இங்கு திட்டமிட்டு குறிவைக்கப்பட்டுள்ளனர். இந்தத் தாக்குதல்கள் ஒன்றுக்கும் மேற்பட்ட நபர்களின் ஒருங்கிணைப்போடு, முன்கூட்டியே திட்டமிட்டு நடத்தப்பட்டுள்ளன” என்று தலைமை கண்காணிப்பாளர் கேத்தரின் ஸ்டீபன்சன் (Chief Superintendent Katherine Stephenson) செய்தியாளர் சந்திப்பில் தெரிவித்தார்.

நடந்தது என்ன?

• முதல் சம்பவம்: நீல நிற லெக்ஸஸ் எஸ்யூவி (Lexus SUV) காரில் வந்த சந்தேக நபர், பஹர்ஸ்ட் ஸ்ட்ரீட் மற்றும் லாரன்ஸ் அவென்யூ (Bathurst Street and Lawrence Avenue) பகுதியில் இருந்த யூத மக்கள் மீது ‘ஆர்பீஸ்’ (Orbeez) வகை பொம்மைத் துப்பாக்கியால் சுட்டுள்ளார். இதில் பாதிக்கப்பட்டவர்களுக்கு லேசான காயம் ஏற்பட்டது.

• இரண்டாவது சம்பவம்: பஹர்ஸ்ட் ஸ்ட்ரீட் மற்றும் ஹைவே 401 (Bathurst Street and Highway 401) அருகே உள்ள ஒரு யூத வழிபாட்டுத் தலத்திற்கு (Synagogue) வெளியே மூன்று யூத மக்கள் நின்றுகொண்டிருந்த போது, அதே நீல நிற லெக்ஸஸ் காரில் வந்த நபர் போலியான துப்பாக்கியால் (Imitation firearm) அவர்கள் மீது சுட்டுள்ளார்.

கைது செய்யப்பட்டவர்கள் மற்றும் குற்றச்சாட்டுகள்

கைது செய்யப்பட்ட பெரியவர்கள் இருவர் லுகா சோகெலி (20 வயது) மற்றும் அலிஷாஹின் இசேவ் (23 வயது) என அடையாளம் காணப்பட்டுள்ளனர். மற்ற இருவர் 16 மற்றும் 17 வயதுடைய சிறுவர்கள் என்பதால், இளைஞர் குற்றவியல் நீதிச் சட்டத்தின் கீழ் அவர்களின் பெயர்கள் வெளியிடப்படவில்லை.

இவர்கள் அனைவருக்கும் ஆயுதத்தைக் கொண்டு தாக்குதல் நடத்தியது மற்றும் ஆயுதம் வைத்திருந்தது உள்ளிட்ட குற்றச்சாட்டுகள் சுமத்தப்பட்டுள்ளன. இதற்கு முன்பாகவே, மே 7 சம்பவத்திற்கு அடுத்த நாள் ருஸ்லான் நோவ்ருசோவ் (18 வயது) என்ற வாலிபர் கைது செய்யப்பட்டிருந்தார் என்பது குறிப்பிடத்தக்கது.

பொம்மைத் துப்பாக்கி என்றாலும் அது தீவிரமானதே

சந்தேக நபர்கள் பயன்படுத்திய ‘ஜெல் பிளாஸ்டர்’ பொம்மைத் துப்பாக்கிகள் குறித்து ஸ்டீபன்சனிடம் கேட்கப்பட்டபோது, அவர் கூறியதாவது:

“இது ஏதோ சிறுவர்கள் விளையாடும் விளையாட்டு, உண்மையான துப்பாக்கி இல்லை என்ற பொதுவான கருத்து நிலவலாம். ஆனால், பாதிக்கப்பட்டவர்களின் கோணத்தில் இருந்து பார்க்க வேண்டும். யூத சமூகத்தின் மீதான தொடர் தாக்குதல்களின் பின்னணியில், வழிபாட்டுத் தலத்திற்கு வெளியே நின்று கொண்டிருக்கும் ஒருவரை ஏதோ ஒன்று தாக்கும் போது, அவர் அதை உண்மையான துப்பாக்கி என்றே நினைப்பார். அந்த பயம் அவர்களிடம் என்றென்றும் இருக்கும். எனவே, அது உண்மையான துப்பாக்கியோ இல்லையோ, நாங்கள் இதனை மிகத் தீவிரமான குற்றமாகவே கருதுகிறோம்.”

மேலும், இந்தச் சம்பவங்களுக்கு வெளிநாட்டு பயங்கரவாத அமைப்புகளுடனோ அல்லது சமீபத்தில் அமெரிக்காவில் பிடிபட்ட ஈராக் நபருடனோ தற்போதைக்கு நேரடித் தொடர்பு இருப்பதற்கான எந்த ஆதாரமும் இல்லை என்றும், எனினும் சர்வதேச அமைப்புகளுடன் இணைந்து விசாரணை தொடர்ந்து வருவதாகவும் டொராண்டோ காவல்துறை தெரிவித்துள்ளது.