கனடாவின் கிராமப்புற மற்றும் தொலைதூரப் பகுதிகளில் பணிபுரியும் சுமார் 33,000 தற்காலிக வெளிநாட்டு ஊழியர்களுக்கு, ஒரு புதிய முயற்சியின் கீழ் விரைவாக நிரந்தரக் குடியுரிமை (Permanent Residency) வழங்கப்படும் என்று மத்திய அரசு தெரிவித்துள்ளது.

கனடா குடிவரவு, அகதிகள் மற்றும் குடியுரிமை அமைச்சகம் (IRCC) வெளியிட்டுள்ள தகவலின்படி, இந்தத் திட்டம் 2026 மற்றும் 2027 ஆம் ஆண்டுகளில் செயல்படுத்தப்படும். இதில் இந்த ஆண்டு சுமார் 20,000 ஊழியர்களும், அடுத்த ஆண்டு எஞ்சிய ஊழியர்களும் நிரந்தரக் குடியுரிமை பெறுவார்கள் என்று எதிர்பார்க்கப்படுகிறது.

“இன்-கனடா ஒர்க்கர்ஸ் இனிஷியேட்டிவ்” (In-Canada Workers Initiative) என்று அழைக்கப்படும் இந்தத் திட்டம், சிறிய சமூகங்களின் பொருளாதார வளர்ச்சியை ஆதரிப்பதோடு, விவசாயம் போன்ற முக்கிய துறைகளில் நிலவும் தொழிலாளர் பற்றாக்குறையை நிவர்த்தி செய்வதை நோக்கமாகக் கொண்டுள்ளது என்று லீனா மெட்லெஜ் டயப் (Lena Metlege Diab) தெரிவித்துள்ளார்.

இது ஒரு புதிய குடிவரவு வழிமுறை (Pathway) அல்ல. மாறாக, ஏற்கனவே கனடாவில் தங்கி பணிபுரிந்து வரும் மற்றும் தகுதிகளைப் பூர்த்தி செய்துள்ள ஊழியர்களுக்கான விண்ணப்பங்களை முன்னுரிமை அடிப்படையில் விரைவாகப் பரிசீலிக்கும் ஒரு முறையாகும்.

தகுதி பெறுவதற்கான நிபந்தனைகள்:

• குறைந்தது இரண்டு ஆண்டுகள் கனடாவின் சிறிய சமூகப் பகுதிகளில் (Smaller Communities) வசித்திருக்க வேண்டும்.

• மாகாண பரிந்துரைத் திட்டம் (PNP) அல்லது பிற பிராந்திய முன்னோடித் திட்டங்கள் போன்ற ஏற்கனவே உள்ள குடிவரவு பிரிவுகளின் கீழ் விண்ணப்பித்திருக்க வேண்டும்.

இந்தத் திட்டத்தின் கீழ் இந்த ஆண்டு ஏற்கனவே சுமார் 3,600 ஊழியர்கள் நிரந்தரக் குடியுரிமை பெற்றுள்ளதாக அதிகாரிகள் தெரிவித்துள்ளனர்.

2027 ஆம் ஆண்டிற்குள் கனடாவின் மொத்த மக்கள் தொகையில் தற்காலிக குடியிருப்பாளர்களின் எண்ணிக்கையை 5 சதவீதமாகக் குறைக்கும் அரசாங்கத்தின் விரிவான திட்டத்தின் ஒரு பகுதியாகவும் இது பார்க்கப்படுகிறது.

எவ்வாறாயினும், அரசாங்கத்தின் இந்த அறிவிப்பு குழப்பத்தை ஏற்படுத்தியுள்ளதாக விமர்சகர்கள் கூறுகின்றனர். ஏற்கனவே உள்ள விண்ணப்பங்களை விரைவுபடுத்துவதற்குப் பதிலாக, நிரந்தரக் குடியுரிமைக்கு இது ஒரு புதிய வழிமுறை போன்ற தோற்றத்தை முந்தைய அறிவிப்புகள் ஏற்படுத்தியதாக அவர்கள் சுட்டிக்காட்டுகின்றனர்.