தாக்குதல் மற்றும் மிரட்டல் விடுத்தமை குறித்த விசாரணைக்காகத் தேடப்பட்டு வரும் 29 வயதுடைய நபர் ஒருவரைக் கண்டறிவதற்கு ரொறன்ரோ பொலிஸார் பொதுமக்களின் உதவியைக் கோரியுள்ளனர்.
ஜூலை 3ஆம் திகதி இரவு 11:20 மணியளவில், செயின்ட் கிளෙயர் அவென்யூ வெஸ்ட் (St. Clair Avenue West) மற்றும் டஃபெரின் வீதி (Dufferin Street) சந்திப்புப் பகுதிக்கு அருகில் இந்தச் சம்பவம் தொடர்பில் பொலிஸார் நடவடிக்கை எடுத்திருந்தனர்.
சந்தேக நபர் தர்க்கம் ஒன்றின் போது, பாதிக்கப்பட்ட நபரைக் கொடூரமாகத் தாக்கியதுடன், அவரது கழுத்தை நெரித்துக் கொலை மிரட்டலும் விடுத்துள்ளதாகப் புலனாய்வாளர்கள் குற்றம் சாட்டியுள்ளனர். இதனால் பாதிக்கப்பட்ட நபர் கடுமையான ஆனால் உயிருக்கு ஆபத்தில்லாத காயங்களுக்கு உள்ளாகியுள்ளார்.
பாதிக்கப்பட்ட நபரும் சந்தேக நபரும் ஒருவரையொருவர் அறிந்தவர்கள் எனப் பொலிஸார் தெரிவித்துள்ளனர்.
ரொறன்ரோவைச் சேர்ந்த 29 வயதுடைய மாக்சிமிலியானோ பெரெஸ் புளோரஸ் (Maximiliano Perez Flores) என்ற நபரே, தாக்குதல் நடத்துதல், கழுத்தை நெரித்துத் தாக்குதல் மற்றும் கொலை மிரட்டல் விடுத்தல் ஆகிய குற்றச்சாட்டுகளின் கீழ் தேடப்பட்டு வருகிறார்.
அவர் ஐந்து அடி ஆறு அங்குலம் உயரமும், நடுத்தர உடலமைப்பும், குறுகிய முடியும் கொண்டவர் என விவரிக்கப்பட்டுள்ளதுடன், பொலிஸார் அவரது புகைப்படங்களையும் வெளியிட்டுள்ளனர்.
இந்த நபர் குறித்த ஏதேனும் தகவல் தெரிந்தவர்கள் 416-808-1300 என்ற இலக்கத்தின் ஊடாக ரொறன்ரோ பொலிஸாரையோ அல்லது 416-222-TIPS (8477) என்ற இலக்கத்தின் மூலம் ‘க்ரைம் ஸ்டாப்பர்ஸ்’ (Crime Stoppers) அமைப்பையோ அநாமதேயமாகத் தொடர்புகொண்டு தெரிவிக்குமாறு கேட்டுக்கொள்ளப்படுகிறார்கள்.
சுமத்தப்பட்டுள்ள குற்றச்சாட்டுகளும் குற்றச்சாட்டுகளுக்கான ஆதாரங்களும் இன்னும் நீதிமன்றத்தில் நிரூபிக்கப்படவில்லை என்பதுடன், குற்றம் சாட்டப்பட்டவர் நீதிமன்றத்தில் குற்றவாளி என நிரூபிக்கப்படும் வரை நிரபராதியாகவே கருதப்படுவார்.
