கனடாவில் விற்பனை செய்யப்படும் சில மளிகைப் பொருட்களில், நுகர்வோர் தங்களின் உணவுச் சார்ந்த தேர்வுகளை மேலும் அறிவுப்பூர்வமாக மேற்கொள்ள உதவும் வகையில், இனி கட்டாய எச்சரிக்கை லேபிள்கள் இடம்பெறவுள்ளன.
ஜனவரி 1 முதல் அமலுக்கு வந்துள்ள இந்த லேபிள்கள், பொருட்களில் அதிக அளவில் திட கொழுப்பு (saturated fat), சோடியம் அல்லது சர்க்கரை உள்ளதா என்பதைத் தெரிவிக்கும் வகையில், பொட்டலத்தின் முன்புறத்தில் தெளிவாகக் காணப்படும் கருப்பு-வெள்ளை எச்சரிக்கைச் சின்னங்களைக் கொண்டுள்ளன.
ஹெல்த் கனடா தெரிவிப்பதாவது, இவ்வகை கூறுகள் பக்கவாதம், உடல் பருமன், இதய நோய், நீரிழிவு, உயர் இரத்த அழுத்தம் மற்றும் புற்றுநோய் போன்ற நோய்களுக்கு வழிவகுக்கக்கூடும். “திட கொழுப்பு, சர்க்கரை அல்லது சோடியம் ஆகியவற்றின் நிர்ணயிக்கப்பட்ட அளவை எட்டும் அல்லது அதற்கு மேல் கொண்ட முன்-பொதியிடப்பட்ட (prepackaged) உணவுப் பொருட்களில் இந்த லேபிள் கட்டாயமாக இடம்பெற வேண்டும்” என ஹெல்த் கனடா வெளியிட்ட அறிக்கையில் தெரிவித்துள்ளது.
“இந்தச் சின்னத்தைப் பயன்படுத்துவது, தகவலை வெளிப்படுத்தும் ஒரு வேறுபட்ட முறையாகும்” என டொரோண்டோ மெட்ரோபாலிடன் பல்கலைக்கழகத்தின் ஊட்டச்சத்து பள்ளியின் உதவிப் பேராசிரியர் ஜெனிஃபர் லீ, கடந்த வாரம் தெரிவித்தார். பெரும்பாலான பொதியிடப்பட்ட உணவுகளின் பின்புறத்தில் காணப்படும் ஊட்டச்சத்து லேபிளை அடிப்படையாகக் கொண்டே இந்த புதிய எச்சரிக்கைகள் உருவாக்கப்பட்டுள்ளன என்றும் அவர் விளக்கினார்.
கனடாவில் பொதியிடப்பட்ட உணவுகளில் பொதுவாக கூறுப் பட்டியல் மற்றும் ஊட்டச்சத்து லேபிள் இடம்பெறும். அதில், முக்கிய ஊட்டச்சத்துக்கள் தினசரி பரிந்துரைக்கப்படும் அளவில் எவ்வளவு சதவீதம் அந்தப் பொருளில் உள்ளது என்பதும் குறிப்பிடப்படும். ஒரு ஊட்டச்சத்தின் தினசரி மதிப்பில் 15 சதவீதத்திற்கும் அதிகமாக இருந்தால், ஹெல்த் கனடா அதனை “அதிகம்” எனவும், ஐந்து சதவீதத்திற்குக் குறைவாக இருந்தால் “குறைவு” எனவும் வகைப்படுத்துகிறது.
ஒரு பொருளின் முன்புறத்தில் திட கொழுப்பு, சர்க்கரை அல்லது உப்பு தொடர்பான எச்சரிக்கை லேபிள் தேவையா என்பதைக் தீர்மானிப்பது, “பொதுவாக 15 சதவீத வரம்பை அடிப்படையாகக் கொண்டதாகும்” என லீ கூறினார்.
“கனடாவில் மட்டுமல்ல, உலகளாவிய ரீதியிலும், உணவுப் பொதிகளின் முன்புறத்தில் எளிதில் புரிந்துகொள்ளக்கூடிய இத்தகைய சின்னங்கள் இடம்பெறுவது, உணவுச் சார்ந்த தகவல்களை மக்களிடம் தெரிவிப்பதில் மிகுந்த பயனளிக்கும் முறையாக உள்ளது” என லீ தெரிவித்தார். மேலும், இச்சின்னங்களின் அதிகமான காட்சித் தெளிவு, திட கொழுப்பு, சோடியம் மற்றும் சர்க்கரை பற்றிய விழிப்புணர்வை நுகர்வோரிடையே அதிகரிக்கிறது என்றும், கனடியர்கள் இவற்றை “அதிக அளவில்” உட்கொள்கிறார்கள் என்றும் அவர் குறிப்பிட்டுளார்.
