கனடாவில் தொடர்ந்து பரவி வரும் காட்டுத்தீ நெருக்கடியை கையாளுவது குறித்து அமெரிக்க அரசியல்வாதிகள் முன்வைத்த விமர்சனங்களுக்குப் பதிலடி கொடுத்துள்ள ஒன்டாரியோ முதல்வர் டக் ஃபோர்ட் (Doug Ford), பல அமெரிக்க அதிகாரிகளுக்கு “நினைவாற்றல் மிகக் குறைவு” என்று சாடியுள்ளார்.
சனிக்கிழமை தண்டர் பே (Thunder Bay) பகுதியில் உரையாற்றிய ஃபோர்ட், கடந்த ஆண்டு கலிபோர்னியாவில் ஏற்பட்ட பேரழிவு தரும் காட்டுத்தீயை எதிர்த்துப் போராட கனடா நீரைப் பொழியும் விமானங்கள் (water bombers) மற்றும் தீயணைப்புக் குழுக்களை அனுப்பி உதவியதை விமர்சகர்களுக்கு நினைவூட்டினார். அத்துடன், “அயலவர்கள் செய்வது அதைத்தான்” என்றும் அவர் சேர்த்துக் கொண்டார்.
மாகாண அதிகாரிகளின் கூற்றுப்படி, வடக்கு ஒன்டாரியோவில் இன்னமும் 191 காட்டுத்தீ சம்பவங்கள் பதிவாகி வருகின்றன, அவற்றில் 73 தீப்பிழம்புகள் கட்டுப்பாட்டை மீறி எரிந்து கொண்டிருக்கின்றன. ‘தண்டர் பே 36’ எனப்படும் மிகப்பெரிய தீப்பரவல் சுமார் 319,000 ஹெக்டேர் பரப்பளவை எரித்து சாம்பலாக்கியுள்ளது, அதே வேளையில் 155 தீயணைப்புக் குழுக்களும் சுமார் 80 நீரைப் பொழியும் விமானங்களும் களத்தில் தொடர்ந்து போராடி வருகின்றன.
வேகமாகப் பரவி வரும் காட்டுத்தீயினால் பெரும்பாலும் அழிக்கப்பட்ட காலின்ஸ் எஸ்கிமோ மக்கள் பிரிவு (Collins First Nation) உட்பட, ஒரு டஜனுக்கும் அதிகமான சமூகங்களுக்குக் கட்டாய வெளியேற்ற உத்தரவுகள் பிறப்பிக்கப்பட்டுள்ளன.
