அவுஸ்திரேலியாவின் மிக உயரிய இசை விருது விழாவான 40-வது வருடாந்திர ARIA (Australian Recording Industry Association) விருதுகளில், ஈழத் தமிழ் வம்சாவளியைச் சேர்ந்த இசைக்கலைஞர் எக்கா வாண்டல் (Ecca Vandal) நான்கு முக்கிய விருதுகளை வென்று உலகத் தமிழர்களுக்குப் பெருமை சேர்த்துள்ளார்.
’Looking for People to Unfollow’ என்ற தனது இரண்டாவது இசைத் தொகுப்பிற்காக ஏழு பிரிவுகளில் பரிந்துரைக்கப்பட்டிருந்த இவர், ‘சிறந்த திருப்புமுனைக் கலைஞர்’ (Best Breakthrough Artist) உள்ளிட்ட 4 விருதுகளைத் தனதாக்கி வரலாற்றுச் சாதனை படைத்துள்ளார்.
இதற்கு முன்னதாக, இம்மாதத் தொடக்கத்தில் சிறந்த அவுஸ்திரேலிய இசைத் தொகுப்பிற்கான 50,000 டாலர் பரிசுத் தொகையைக் கொண்ட மதிப்புமிக்க ‘அவுஸ்திரேலிய இசைப் பரிசையும்’ (Australian Music Prize) இவர் வென்றிருந்தமை குறிப்பிடத்தக்கது.
இலங்கையில் ஏற்பட்ட உள்நாட்டுப் போர் காரணமாகத் தென்னாப்பிரிக்காவிற்கு அகதிகளாக இடம்பெயர்ந்த ஈழத் தமிழ் பெற்றோருக்கு மகளாகப் பிறந்தவர் எக்கா. அங்கு நிலவிய இனப் பிரச்சினைகள் காரணமாகப் பின்னர் குடும்பத்துடன் அவுஸ்திரேலியாவிற்குக் குடிபெயர்ந்தார்.
மெல்போர்ன் நகரிலுள்ள தமிழ் சமூகத்தினருடன் இணைந்து வளர்ந்த இவரது வீட்டில், தமிழ் மற்றும் இலங்கை பைலா (Baila) இசையோடு, தென்னாப்பிரிக்க, கோஸ்பல் (Gospel) மற்றும் ஆர் அண்ட் பி (R&B) இசைகளும் எப்போதும் ஒலித்துக் கொண்டிருந்தன. இந்தப் பன்முக இசைச் சூழலே இவரது இசைப் பயணத்திற்கு அடித்தளமிட்டது.
விக்டோரியன் கலைக் கல்லூரியில் ஜாஸ் (Jazz) இசைப் பயிற்சி பெற்ற எக்கா வாண்டல், பின்னர் தனக்கென ஒரு தனித்துவமான பங்க் (Punk) மற்றும் ராப் (Rap) இசைப் பாணியை உருவாக்கிக் கொண்டார். பல்வேறு இசை வடிவங்களை ஒன்றிணைக்கும் இவரது ஆற்றல்மிக்க படைப்புகள், இன்று சர்வதேச இசை ரசிகர்களைக் கட்டிப்போட்டுப் பெரும் பாராட்டுகளைப் பெற்று வருகின்றன.