மதுரை:

சிவகங்கை மாவட்டம் மடப்புரம் பத்திரகாளி அம்மன் கோவில் காவலாளி அஜித்குமார் கொலை வழக்கை ஒன்பது மாதத்தில் முடிக்க வேண்டும் என மதுரை உயர்நீதிமன்றம் அதிரடியாகக் கெடு விதித்துள்ளது.

கொலை வழக்கு:

சிவகங்கை மாவட்டம் மடப்புரம் பத்திரகாளி அம்மன் கோவில் காவலாளி அஜித்குமார். இவர் மீது நகை திருட்டு புகாரை மதுரையைச் சேர்ந்த பேராசிரியை கடந்த ஆண்டு ஜூன் மாதம் அளித்தார். அந்தப் புகாரின்பேரில் விசாரணை நடத்துவதற்காக அஜித்குமாரை அழைத்துச் சென்ற போலீசார் கடுமையாகத் தாக்கினர். இதில் படுகாயம் அடைந்த அஜித்குமார் பரிதாபமாக இறந்தார். இந்தச் சம்பவம் தொடர்பாகக் கொலை வழக்கில் தனிப்படை போலீசார் ஆறு பேரும், அப்போதைய மானாமதுரை துணை போலீஸ் சூப்பிரண்டு சண்முகசுந்தரம் உள்பட நான்கு அதிகாரிகளும் கைது செய்யப்பட்டுச் சிறையில் அடைக்கப்பட்டு உள்ளனர். இந்த வழக்கை சிபிஐ தீவிரமாக விசாரித்துக் குற்றப்பத்திரிகையை நீதிமன்றத்தில் தாக்கல் செய்துள்ளது.

ஐகோர்ட்டில் மனு:

இந்நிலையில், சண்முகசுந்தரம் உள்பட நான்கு அதிகாரிகளும் தங்களை நீதிமன்ற காவலில் வைக்கும்படி கீழ் கோர்ட்டு பிறப்பித்த உத்தரவுக்குத் தடை விதிக்க வேண்டும் என மதுரை ஐகோர்ட்டில் மனுத் தாக்கல் செய்திருந்தனர். இந்த வழக்கை ஏற்கனவே விசாரித்த ஐகோர்ட்டு, அனைத்துத் தரப்பு வாதங்களையும் பதிவு செய்து கொண்டு தீர்ப்பைத் தேதி குறிப்பிடாமல் ஒத்திவைத்திருந்தது.

உத்தரவு சரிதான்:

இந்த வழக்கின் தீர்ப்பை நீதிபதி முருகன் நேற்று பிறப்பித்தார். அதில், “காவலாளி அஜித்குமார் இறந்த வழக்கு விசாரணைக்கு ஒத்துழைப்போம் என மனுதாரர்கள் நான்கு பேரும் எழுதி கொடுத்த பத்திரத்தை, ஜாமீன் பத்திரத்திற்கு இணையாக ஒருபோதும் கருத முடியாது. மேலும் மனுதாரர்கள் அனைவரும் காவல்துறையினர் என்பதைக் கருத்தில் கொள்ளும்போது, அவர்கள் சாட்சிகளை மிரட்டுவதற்கோ அல்லது சாட்சியங்களைக் கலைப்பதற்கோ அதிக வாய்ப்பு உள்ளது. எனவே மனுதாரர்கள் மீது சுமத்தப்பட்டுள்ள குற்றத்தின் தீவிரத்தன்மையைக் கருத்தில் கொண்டு, அவர்களை விசாரணை கோர்ட்டு நீதிமன்ற காவலில் சிறையில் அடைத்தது நூறு சதவீதம் சரிதான். அதிகாரங்களைப் பயன்படுத்தி மனுதாரர்களைச் சிறையில் அடைத்த உத்தரவை ரத்து செய்யும்படி கோர முடியாது. வேண்டுமானால் ஜாமீன் கேட்டு உரிய கோர்ட்டினை அவர்கள் நாடலாம்,” என்று நீதிபதி திட்டவட்டமாகத் தீர்ப்பளித்துள்ளார்.

#AjithkumarMurder #MaduraiHC #PoliceBrutality #CustodialDeath #BmNews #TamilNews #BreakingNews #LatestNews #TamilNewsLive