மதுரை:

அம்பாசமுத்திரம் இடைத்தேர்தலில் பொதுவேட்பாளராக சீமான் நிறுத்தப்பட்டால், அதிமுக ஆதரிக்குமா என்ற கேள்விக்கு அக்கட்சியின் பொருளாளர் திண்டுக்கல் சீனிவாசன் சூசகமாகப் பதில் அளித்துள்ளார்.

தங்கக் கவசம் ஒப்படைப்பு:

பசும்பொன் முத்துராமலிங்கத் தேவரின் 119-வது ஜெயந்தி மற்றும் 64-வது குருபூஜை விழா நிறைவடைந்ததைத் தொடர்ந்து, அவரது நினைவிடத்தில் வைக்கப்பட்டிருந்த 13.5 கிலோ எடையுள்ள தங்கக் கவசம், பலத்த போலீஸ் பாதுகாப்புடன் மதுரை அண்ணா நகரில் உள்ள பாங்க் ஆப் இந்தியா வங்கியில் இன்று மீண்டும் பாதுகாப்பாக ஒப்படைக்கப்பட்டது. அதிமுக பொருளாளர் திண்டுக்கல் சீனிவாசன் மற்றும் நினைவிடப் பொறுப்பாளர் காந்தி மீனா ஆகியோர் இந்தக் கவசத்தை வங்கியில் ஒப்படைத்தனர்.

தவெக மீது விமர்சனம்:

இதனைத் தொடர்ந்து முன்னாள் அமைச்சர் திண்டுக்கல் சீனிவாசன் மற்றும் ராஜன் செல்லப்பா ஆகியோர் செய்தியாளர்களைச் சந்தித்தனர். அப்போது அவர் ஆளுங்கட்சியான தவெக அரசைக் கடுமையாக விமர்சித்தார். “முதலமைச்சர் விஜய் இடைத்தேர்தல் நடைபெறும் தொகுதிகளில் நூறு கிலோமீட்டர் தூரம் ரோடு ஷோ சென்றாலும் வெற்றி கிடைக்காது. ஒரு பைசா கூடப் பணம் கொடுக்காமல் இடைத்தேர்தலில் அதிமுகதான் உறுதியாக வெற்றி பெறும். தாராபுரம், மதுராந்தகம் தேர்தல்களில் ஆளுங்கட்சியினர் டிபன் பாக்ஸில் வைத்து ஐநூறு ரூபாய் பணம் கொடுத்து வெற்றி பெற்றுள்ளனர். தவெக ஆட்சி அமைந்தவுடன் மக்களுக்கான வசதிகளை ஆறு மாதங்களில் பிரமாதமாகச் செய்து காட்டுவோம் என்று கூறினார்கள். ஆனால், அரிசி விலை உயர்வு உள்ளிட்ட விலைவாசி உயர்வால் மக்கள் தற்போது கடுமையாகப் பாதிக்கப்பட்டுள்ளனர். விலைவாசி உயர்வு, மின் தட்டுப்பாடு, சட்டம் ஒழுங்கு பிரச்சினை ஆகியவற்றால் மக்கள் கடும் அதிருப்தியில் உள்ளனர். முதலமைச்சர் விஜய் அடுத்த பதினைந்து ஆண்டுகளுக்கு முதலமைச்சராக இருப்பார் என்று அமைச்சர்கள் கூறுவது ஒரு பகல் கனவு. இந்த ஆட்சி ஐந்து ஆண்டுகள் கூட நீடிக்காது,” என்று அவர் கடுமையாகச் சாடினார்.

சீமானுக்கு ஆதரவா?:

தொடர்ந்து பேசிய அவர், “ஆளுங்கட்சிக்கு 35 சதவீத ஆதரவு மட்டுமே உள்ளது. ஆளுங்கட்சிக்கு எதிராக உள்ள மீதமுள்ள 65 சதவீத வாக்குகளை ஒருங்கிணைத்தால் வெற்றி பெற முடியும். அதற்கான வியூகத்தை அதிமுக பொதுச்செயலாளர் வகுப்பார்,\” என்றார். அம்பாசமுத்திரம் இடைத்தேர்தலில் சீமானைப் பொதுவேட்பாளராக அறிவிக்க வாய்ப்பு உள்ளதா என்ற கேள்விக்கு, \”திமுக எத்தகைய நிலைப்பாட்டைக் கொண்டுள்ளதோ அதே போன்ற நிலைப்பாட்டில்தான் அதிமுகவும் உள்ளது. தேர்தல் அறிவிக்கப்பட்ட பிறகு அதுகுறித்து முடிவு செய்து பேசுவோம்,” என்று அவர் நாசுக்காகத் தெரிவித்தார். இவரது இந்தப் பேட்டி தற்போது அரசியல் களத்தில் பெரும் எதிர்பார்ப்பை ஏற்படுத்தியுள்ளது.

#DindigulSrinivasan #AIADMK #Seeman #Ambasamudram #TVK #BmNews #TamilNews #BreakingNews #LatestNews #TamilNewsLive