11 வயது சிறுவன் ஒருவன் தனது மின்சார ஸ்கூட்டரின் (e-scooter) கட்டுப்பாட்டை இழந்து, வீதியில் நிறுத்தப்பட்டிருந்த வேன் மீது மோதியதில் படுகாயமடைந்துள்ளதாக ரொறன்ரோ பொலிஸார் தெரிவித்துள்ளனர்.
செவ்வாய்க்கிழமை மாலை 4:45 மணிக்கு முன்னதாக, டைனவர் வீதி (Dynevor Road) மற்றும் ரோவன் அவென்யூ (Rowan Avenue) பகுதிக்கு அருகில் இச்சம்பவம் நடந்துள்ளது.
அந்தச் சிறுவன் டைனவர் வீதியில் வடக்கு நோக்கிச் சென்று கொண்டிருந்த போது இந்த விபத்து நடந்ததாகப் பொலிஸார் தெரிவித்தனர்.
விபத்துக்கான சூழல் குறித்து தெளிவான தகவல்கள் வெளியாகாத போதிலும், காயமடைந்த சிறுவன் மருத்துவமனைக்குக் கொண்டு செல்லப்பட்டதாக அதிகாரிகள் தெரிவித்தனர்.
ஞாயிற்றுக்கிழமை வெளியிடப்பட்ட செய்திக்குறிப்பில், விபத்து நடந்த நேரத்தில் வெள்ளி நிற ‘டாட்ஜ் ராம் பிக்கப் ட்ரக்’ (Dodge Ram pick-up truck) ஒன்று அப்பகுதியில் செல்வது காணப்பட்டதாகப் பொலிஸார் தெரிவித்தனர்.
புலனாய்வாளர்கள் அந்த வாகனத்தின் ஓட்டுநருடன் பேச விரும்புவதுடன், நிறுத்தப்பட்டிருந்த வெள்ளி நிற வேனின் உரிமையாளரையும் தற்போது தேடி வருகின்றனர்.
விபத்து நடந்த நேரத்தில் அப்பகுதியில் பதிவு செய்யப்பட்ட தகவல் அல்லது காணொளிப் பதிவுகள் (footage) வைத்திருக்கும் எவரையும் உடனடியாகத் தொடர்பு கொள்ளுமாறு, அல்லது ‘க்ரைம் ஸ்டாப்பர்ஸ்’ (Crime Stoppers) மூலம் பெயர் குறிப்பிடாமல் தகவல் வழங்குமாறு பொலிஸார் கேட்டுக்கொள்கின்றனர்.
