ஹாலிஃபாக்ஸ் காஸ்ட்கோ வணிக வளாகத்தில் நிகழ்ந்த வன்முறைத் தாக்குதல் மற்றும் இனவெறிப் பேச்சு (racist rant) குறித்து போலீஸார் விசாரணைகளை மேற்கொண்டு வருகின்றனர்.

கடந்த வார இறுதியில், காஸ்ட்கோ வளாகத்திற்குள் “இன ரீதியாக அவதூறான வார்த்தைகளை” (racially offensive language) கூச்சலிட்டபடி, வாடிக்கையாளர் ஒருவரைத் தாக்கியதாகக் கூறப்படும் நபர் ஒருவரை ஹாலிஃபாக்ஸ் போலீஸார் தேடி வருகின்றனர்.

செயின் லேக் டிரைவ் (Chain Lake Drive) பகுதியில் அமைந்துள்ள காஸ்ட்கோ வளாகத்தில் சனிக்கிழமை மதியம் 1:00 மணியளவில் இந்தத் தாக்குதல் சம்பவம் நடந்துள்ளதாகப் போலீஸார் தெரிவித்துள்ளனர்.

அங்கு வந்த நபர் ஒருவர் முதலில் ஒரு குடும்பத்தினரைப் பார்த்து சத்தமிட்டதுடன், பின்னர் தொடர்ந்து கூச்சலிட்டபடியே மற்றொரு வாடிக்கையாளரையும் தாக்கியுள்ளதாக விசாரணைகளின் மூலம் தெரியவந்துள்ளது.

இந்த விசாரணைப் பணிகளில் ஹாலிஃபாக்ஸ் பிராந்திய போலீசின் (Halifax Regional Police) வெறுப்புணர்வுக் குற்றப்பிரிவு (hate crime unit) இணைந்து செயல்பட்டு வருகிறது.

சந்தேகநபர் 30 முதல் 40 வயதுக்கு இடைப்பட்ட ஒரு வெள்ளை இன மனிதர் என விவரிக்கப்பட்டுள்ளார். மொட்டைத் தலையுடைய அவர், இச்சம்பவத்தின் போது கருப்பு நிற டி-சர்ட், ஜீன்ஸ் மற்றும் கருப்பு நிற பூட்ஸ் காலணிகளை அணிந்திருந்தார்.

இச்சந்தேகநபரின் அடையாளம் குறித்து விபரங்கள் ஏதேனும் தெரிந்தவர்கள், 902-490-5020 என்ற இலக்கத்தின் மூலம் போலீஸாரைத் தொடர்பு கொள்ளுமாறு அல்லது 1-800-222-8477 என்ற இலக்கத்திலோ அல்லது www.crimestoppers.ns.ca என்ற இணையதள முகவரியிலோ கிரைம் ஸ்டாப்பர்ஸ் அமைப்பை அநாமதேயமாகத் தொடர்பு கொள்ளுமாறு கேட்டுக்கொள்ளப்பட்டுள்ளனர்.

‘இஸ்லாம் குறித்து தவறான புரிதலைக் கொண்ட மற்றொரு நபர்’

ஹாலிஃபாக்ஸில் உள்ள உம்மா மஸ்ஜித் மற்றும் சமூக மையத்தின் (Ummah Masjid & Community Centre) இமாம் மஹ்மூத் ஒமர் (Mahmoud Omar) கூறுகையில், இச்சம்பவம் தொடர்பான வீடியோ காட்சி “அதிர்ச்சியளிப்பதாக” உள்ளது என்றார்.

“இது இஸ்லாம் குறித்து தவறான புரிதலைக் கொண்ட மற்றொரு நபரின் செயலாகும்,” என்று அவர் குறிப்பிட்டார். “துரதிர்ஷ்டவசமாக, இஸ்லாமோஃபோபியா (Islamophobia – இஸ்லாமிய வெறுப்புணர்வு) அதிகரித்து வருகிறது. இணையத்தில் போதிய கல்வியறிவின்மை மற்றும் தவறான தகவல்கள் பரப்பப்படுவதே இதற்குத் காரணமாகும்.”

“இப்படியான சம்பவங்களை மூடிமறைப்பதை விட, என்ன நடக்கிறது என்பது குறித்துப் பேசுவதே சிறந்தது.”

கனேடிய முஸ்லிம்களின் தேசிய கவுன்சிலின் (NCCM) ஊடகம் மற்றும் தகவல் தொடர்புப் பொறுப்பாளர் ஸ்டீவன் சோவ் (Steven Zhou) கூறுகையில், கடந்த மாதத்தில் மட்டும் இது போன்ற பல தாக்குதல்கள் மற்றும் அச்சுறுத்தல்கள் குறித்த புகார்கள் தங்களுக்குக் கிடைத்துள்ளதாகத் தெரிவித்தார்.

இணையத்தில் வெளியான அந்த வீடியோ காட்சியில், பெண் ஒருவர் அந்த இனவெறி நபரை தைரியமாக எதிர்கொண்டு கேள்வி எழுப்பியுள்ளார்.

“அவர் நோவா ஸ்கோஷியாவின் உண்மையான ஹீரோவாகிவிட்டார்,” என்று இமாம் ஒமர் கூறினார். “முஸ்லிம் சமூகத்தின் சார்பாக, அவருக்கு எங்களது மனமார்ந்த நன்றிகள்.”