பீல் பிராந்தியம் (கனடா): மிசிசாகா நகரில் நிலத்தடி வாகன நிறுத்துமிடங்களில் இடம்பெற்ற தொடர் வாகனத் திருட்டுகள் மற்றும் திருட்டு முயற்சிகள் தொடர்பாக இரு நபர்களுக்கு எதிராக பீல் பிராந்திய பொலிஸார் மொத்தம் 44 குற்றச்சாட்டுகளைப் பதிவு செய்துள்ளனர்.

கடந்த மே மாதத்தில் ‘ஹுரொன்டாரியோ வீதி’ (Hurontario Street) மற்றும் ‘பர்ன்ஹாம்தோர்ப் வீதி கிழக்கு’ (Burnhamthorpe Road East) ஆகிய பகுதிகளுக்கு அருகில் இந்தச் சம்பவங்கள் இடம்பெற்றுள்ளதாகப் பொலிஸார் தெரிவித்துள்ளனர். அங்கு பல வாகனங்கள் திருடப்பட்டுள்ளதுடன், ஏனைய சில வாகனங்கள் திருட்டு முயற்சியின் போது சேதமாக்கப்பட்டுள்ளன.

இதனையடுத்து புலனாய்வாளர்கள் ‘புரொஜெக்ட் டெயில் லைட்’ (Project Tail Light) என்ற விசேட விசாரணைத் திட்டத்தை ஆரம்பித்து, கண்காணிப்புக் கேமரா (CCTV) காட்சிகள், வாகன இலக்கத் தகடு அடையாள தொழில்நுட்பம் (Licence plate recognition), அதிகாரிகளின் உடலில் பொருத்தப்படும் கேமரா (Body-worn camera) காட்சிகள் மற்றும் பொதுமக்களிடமிருந்து கிடைத்த தகவல்களின் உதவியுடன் இரு சந்தேக நபர்களை அடையாளம் கண்டுள்ளனர்.

மிசிசாகா மற்றும் எரின் (Erin) ஆகிய பகுதிகளில் உள்ள வீடுகளில் நடத்தப்பட்ட சோதனைகளின் போது, கைபேசிகள், வாகனத் திறப்புகள் (Key fobs), வாகனத் திறப்புகளை புரோகிராம் செய்யும் சாதனங்கள் (Key-programming devices), வாகன ஆவணங்கள் மற்றும் குற்றச் செயல்களின் மூலம் ஈட்டப்பட்டதாக சந்தேகிக்கப்படும் சுமார் 1,465 டாலர் பணம் ஆகியன பொலிஸாரால் கைப்பற்றப்பட்டுள்ளன.

கைது செய்யப்பட்டுள்ள மிசிசாகாவைச் சேர்ந்த 21 வயதுடைய பிரின்ஸ் (Prince) என்பவருக்கு எதிராக, ஏழு வாகனத் திருட்டுக் குற்றச்சாட்டுகள், திருட்டுக்குரிய உபகரணங்களை வைத்திருந்தமை, பொதுச் சொத்துக்களுக்குச் சேதம் விளைவித்தமை, மோசடி மற்றும் நீதிமன்ற விடுதலை உத்தரவை மீறியமை உள்ளிட்ட 22 குற்றச்சாட்டுகள் சுமத்தப்பட்டுள்ளன. அவர் பிணை விசாரணைக்காகக் காவலில் வைக்கப்பட்டுள்ளார்.

இதேவேளை, இச்சம்பவங்களுடன் தொடர்புடைய 22 குற்றச்சாட்டுகளின் கீழ் தேடப்பட்டு வரும் 23 வயதுடைய குர்ஜீத் சிங் விர்க் (Gurjeet Singh Virk) என்ற மற்றொரு சந்தேக நபருக்கு எதிராக நீதிமன்றக் கைது கட்டளை (Warrant) பிறப்பிக்கப்பட்டுள்ளது.

குர்ஜீத் சிங் விர்க், ஐந்து அடி பத்து அங்குல உயரமும், நடுத்தர உடல்வாகுகொண்ட, சுருள் முடியுடைய ஒரு தெற்காசிய வம்சாவளி ஆண் எனப் பொலிஸார் விபரித்துள்ளனர். அவர் உடனடியாக அருகிலுள்ள பொலிஸ் நிலையத்தில் சரணடையுமாறு பொலிஸார் கோரியுள்ளனர்.

இந்த விசாரணை அல்லது குர்ஜீத் சிங் இருக்கும் இடம் குறித்து ஏதேனும் தகவல் தெரிந்தவர்கள், பீல் பொலிஸாரை 905-453-2121 (ext. 1233) என்ற இலக்கத்தின் ஊடாகத் தொடர்புகொள்ளுமாறு கோரப்பட்டுள்ளனர்.

சந்தேக நபர்கள் மீது சுமத்தப்பட்டுள்ள குற்றச்சாட்டுகள் மற்றும் குற்றச்சாட்டுகளுக்கான பின்னணிகள் இன்னும் நீதிமன்றத்தில் நிரூபிக்கப்படவில்லை என்பதுடன், சட்டம் மற்றும் நீதிமன்றத்தின் மூலம் குற்றம் நிரூபிக்கப்படும் வரை குற்றம் சாட்டப்பட்டவர்கள் நிரபராதிகளாகவே கருதப்படுவார்கள்.