கொழும்பு தெல்தெனிய மருத்துவமனைக்கு அருகில் கார் ஒன்றிற்குள் பெண் உடலியக்க மருத்துவர் (Physiotherapist) சியாமா தர்ஷனி படுகொலை செய்யப்பட்ட சம்பவத்தின் பிரதான சந்தேக நபர் கைது செய்யப்பட்டதைத் தொடர்ந்து, அவர் நாடளாவிய ரீதியில் அரங்கேற்றியுள்ள பல கோடி ரூபா நிதி மோசடிகள் மற்றும் குற்றப் பின்னணிகள் அம்பலமாகியுள்ளன.

பல்லேகலை பகுதியைச் சேர்ந்த 43 வயதுடைய பிரதான சந்தேக நபர், அவரது 35 வயதுடைய மனைவி மற்றும் குழந்தையுடன் யாழ்ப்பாணத்தில் வைத்து வாலாண ஊழல் ஒழிப்பு அதிரடிப்படையினரால் கைது செய்யப்பட்டதை அடுத்து நுவரெலியா பொலிஸார் நடத்திய ஆரம்பகட்ட விசாரணைகளில் இந்த திடுக்கிடும் விபரங்கள் வெளியாகியுள்ளன.

மென்பொருள் பொறியியலாளர் (Software Engineer) என நாடகம்:

கைது செய்யப்பட்ட சந்தேக நபர் தன்னை ஒரு மென்பொருள் பொறியியலாளர் எனப் பொய் அடையாளம் காட்டி வந்துள்ளார். நுவரெலியா விடுதி ஒன்றில் சியாமாவைக் கொலை செய்த பின்னர், அவரது சடலத்தைக் காரில் ஏற்றி நுவரெலியாவிலிருந்து கண்டி மற்றும் தெல்தெனிய பகுதிகளுக்குக் கடத்திச் சென்றதாக இவர் மீது குற்றம் சுமத்தப்பட்டுள்ளது.

நாடு முழுவதும் நிலுவையிலுள்ள பல கோடி ரூபா மோசடி வழக்குகள்:

இந்தச் சந்தேக நபர், குறிப்பாகப் பெண்களைத் திருமணம் செய்வதாகக் கூறி ஏமாற்றி பல கோடிக் கணக்கான ரூபாய்களை மோசடி செய்துள்ளார். கம்பஹா, அளுத்கடை, திஸ்ஸமஹாராம, கடுவலை மற்றும் ஹொரண ஆகிய நீதவான் நீதிமன்றங்களில் இவருக்கு எதிராகப் பல வழக்குகள் நிலுவையில் உள்ளன.

1. திருமண ஆசை காட்டிப் பெண்களிடம் மோசடி:

• கம்பஹா நீதவான் நீதிமன்றம்: பெண்ணொருவரைத் திருமணம் செய்வதாகக் கூறி 11.8 மில்லியன் (1 கோடியே 18 இலட்சம்) ரூபா நிதியை மோசடி செய்தமை மற்றும் சட்டவிரோதமான முறையில் வாகனத்தைப் பயன்படுத்தியமை தொடர்பான வழக்கு.

• அளுத்கடை நீதவான் நீதிமன்றம் (இலக்கம் 05): இதே பாணியில் மேலும் இரண்டு பெண்களை ஏமாற்றி, ஒருவரிடம் 1.7 மில்லியன் ரூபாவும், மற்றுமொருவரிடம் 1.3 மில்லியன் ரூபாவும் மோசடி செய்தமை தொடர்பான இரண்டு வழக்குகள்.

2. வெளிநாட்டு வேலைவாய்ப்பு மற்றும் வாகன இறக்குமதி மோசடி:

• அளுத்கடை நீதிமன்றம்: வெளிநாட்டு வேலைவாய்ப்பு பெற்றுத் தருவதாகக் கூறி 4.2 மில்லியன் (42 இலட்சம்) ரூபா மோசடி செய்த வழக்கு.

• திஸ்ஸமஹாராம நீதிமன்றம்: வெளிநாடுகளிலிருந்து வாகனங்களை இறக்குமதி செய்து தருவதாகக் கூறி 2.2 மில்லியன் ரூபா பணத்தைச் சுருட்டியதற்கான வழக்கு.

மேலும், இவருக்கு இருக்கும் பாரிய குற்றப் பின்னணி காரணமாகக் குற்றப்புலனாய்வுத் திணைக்களத்தினால் (CID) அளுத்கடை, ஹொரண மற்றும் கடுவலை நீதிமன்றங்களில் மேலும் நான்கு தனித்தனி வழக்குகள் தாக்கல் செய்யப்பட்டு நிலுவையில் உள்ளன.

பிரதேச சபை ஓட்டுநரும் அதிரடி கைது:

இதேவேளை, படுகொலைச் சம்பவத்தின் பின்னர் பிரதான சந்தேக நபர் தலைமறைவாக இருப்பதற்குத் துணையாகச் செயற்பட்ட குற்றச்சாட்டில் குண்டசாலை பிரதேச சபையின் ஓட்டுநர் ஒருவர் நேற்று (ஜூன் 24) நுவரெலியா விசேட பொலிஸ் குழுவினால் கைது செய்யப்பட்டுள்ளார்.

பிரதான சந்தேக நபரின் தொலைபேசி அழைப்பு விபரங்களை (Phone records) ஆய்வு செய்த பொலிஸார், அவரது நெருங்கிய நண்பரான இந்த ஓட்டுநரை குண்டசாலைப் பகுதியில் வைத்து கைது செய்துள்ளனர். தற்போது பிரதான சந்தேக நபரும் அவரது மனைவியும் மேலதிக விசாரணைகளுக்காக நுவரெலியா பொலிஸ் நிலையத்தில் வைக்கப்பட்டுள்ளனர்.