ஒண்டாரியோ: கனடாவின் ஒண்டாரியோ (Ontario) மாகாணத்தைச் சேர்ந்த முதியவர் ஒருவர், தனது மகனின் குரலை அப்படியே போலி ஏஐ (Artificial Intelligence) தொழில்நுட்பம் மூலம் நகலெடுத்துப் பேசிய மோசடி கும்பலிடம் சிக்கி, 6,000 டாலர்களை (கனடிய டாலர்) இழந்துள்ளார்.

பாதுகாப்பு காரணங்களுக்காகத் தனது முழுப் பெயரை வெளியிட விரும்பாத நீல் (Neil) என்ற அந்த முதியவர், தனக்கு நேர்ந்த இந்த ‘அவசரகால மோசடி’ (Emergency Scam) குறித்து ஊடகங்களிடம் பகிர்ந்துள்ளார்.

நம்பவைப்பதற்காகப் பேசப்பட்ட போலிக் குரல்:

கடந்த ஜூன் மாத தொடக்கத்தில் ஒரு புதன்கிழமை அன்று நீலுக்கு ஒரு தொலைபேசி அழைப்பு வந்துள்ளது. அதில் பேசிய நபர் அப்படியே அவரது மகன் ‘பிரையன்’ (Brian) பேசுவது போலவே இருந்துள்ளார்.

“மறுமுனையில் பேசியவர் ‘நான் யார் என்று தெரிகிறதா?’ எனக் கேட்டார். நானும் ‘ஆம், பிரையன் தானே’ என்றேன். அவரும் ‘ஆமாம் அப்பா’ என்றார். அது அப்படியே என் மகனின் குரலாக இருந்ததால், நான் அவரிடம்தான் பேசுகிறேன் என்று முழுமையாக நம்பினேன்”

என்று நீல் விவரித்தார்.

அலைபேசியில் பேசிய நபர், தான் ஒரு கடுமையான விபத்தில் சிக்கியிருப்பதாகவும், வாகனம் ஓட்டும்போது அலைபேசி பயன்படுத்திய குற்றச்சாட்டில் கைது செய்யப்பட்டுள்ளதாகவும் கூறியுள்ளார்.

தொடர்ந்து, அவரது மகனின் சட்டத்தரணி என்று கூறிக்கொண்ட மற்றொரு நபர் பேசுகையில், “உங்கள் மகனை இன்றிரவு சிறையில் அடைப்பதைத் தவிர்க்க வேண்டும் என்றால், உடனடியாக பிணைத் தொகையாக (Bail) 6,000 டாலர்களைச் செலுத்த வேண்டும். நீதிமன்ற வேலைகள் அதிகமாக இருப்பதால், பணப் பார்சலைப் பெற்றுக்கொள்ள நாங்கள் ஒரு ‘உபெர்’ (Uber) வாகனத்தை உங்கள் வீட்டிற்கு அனுப்பி வைக்கிறோம்” எனக் கூறியுள்ளார்.

இதனை நம்பிய நீல், சில நிமிடங்களில் தனது வீட்டிற்கு வந்த உபெர் ஓட்டுநரிடம் 6,000 டாலர் பணமிருந்த பார்சலை ஒப்படைத்துள்ளார்.

மறுநாள் தெரிந்த அதிர்ச்சி உண்மை:

மறுநாள் காலை, தனது மகனைத் தொடர்புகொண்டு, “சட்டத்தரணியுடனான சந்திப்பு எப்படி முடிந்தது?” என நீல் கேட்டுள்ளார். அதற்கு அவரது மகன், “எந்த சட்டத்தரணி? எனக்கு எந்த விபத்தும் நடக்கவில்லையே!” என்று கூறியுள்ளார். அப்போதே தான் மிக மோசமாக ஏமாற்றப்பட்டதை நீல் உணர்ந்துள்ளார்.

‘ஏஐ குரல் மோசடி’ (AI Voice Cloning) என்றால் என்ன?

சைபர் பாதுகாப்பு நிபுணர் ஜேன் ஆர்னெட் (Jane Arnett) இது குறித்துக் கூறுகையில்:

“இப்போதுள்ள செயற்கை நுண்ணறிவு (AI) தொழில்நுட்பத்தைப் பயன்படுத்தி, ஒரு நபரின் குரலை வெறும் 10 விநாடிகள் கேட்டாலே போதும், அதனை அப்படியே 100% துல்லியமாக மறுஉருவாக்கம் (Voice Cloning) செய்துவிட முடியும்.”

சமூக வலைத்தளங்களில் மக்கள் பதிவிடும் வீடியோக்களில் இருந்தே மோசடி கும்பல் இவ்வாறான குரல் மாதிரிகளைத் திருடுவதாக அவர் எச்சரித்துள்ளார்.

இத்தகைய மோசடிகளில் இருந்து தப்பிப்பது எப்படி? நிபுணர்களின் ஆலோசனைகள்:

• ரகசியக் குறியீடு (Family Code Word): உங்கள் குடும்பத்தினருடன் ரகசிய வார்த்தை அல்லது குறியீடு ஒன்றை உருவாக்கி வைத்துக் கொள்ளுங்கள். அவசர காலத்தில் யாராவது பணம் கேட்டால், அந்தக் குறியீட்டைக் கேட்டுப் பேசுபவர் உண்மைதானா என்பதை உறுதிப்படுத்துங்கள்.

• சமூக வலைத்தளக் கட்டுப்பாடு: சமூக வலைத்தளங்களில் உங்கள் குரல் கேட்கும் படியான வீடியோக்களைப் பொதுவெளியில் (Public) பகிராமல், தனிப்பட்ட கணக்காக (Private Account) மாற்றிக் கொள்ளுங்கள்.

• அழைப்பைத் துண்டித்துவிட்டு நீங்களே அழையுங்கள்: நெருங்கிய உறவினர் விபத்தில் சிக்கியுள்ளார் என்று கூறி யாராவது அறிமுகமில்லாத எண்களில் இருந்து பணம் கேட்டால், பதற்றமடையாமல் அழைப்பைத் துண்டித்துவிட்டு, உங்களது கைபேசியில் சேமித்து வைக்கப்பட்டுள்ள அவரது உண்மையான எண்ணுக்கு நீங்களே அழைத்து உறுதிப்படுத்துங்கள்.

• அவசரப்பட்டுப் பணம் அனுப்ப வேண்டாம்: எந்தவொரு சட்ட அமலாக்க அமைப்போ அல்லது நீதிமன்றமோ அவசரமாக உபெர் மூலமாகவோ அல்லது பணமாகவோ பிணைத் தொகையைக் கோரமாட்டாது என்பதை நினைவில் கொள்ளுங்கள்.