இலங்கையின் பயங்கரவாதத் தடுப்புச் சட்டத்தின் (PTA) தொடர்ச்சியான பயன்பாடு மற்றும் ‘ஹிப்ஹாப் சங்கீ’ (Hiphop Sangee) என்று அழைக்கப்படும் தமிழ் ராப் பாடகர் கணேஷ்குமார் சங்கீத்சனின் அண்மைக்கால கைது குறித்து, இலங்கைத் தமிழ் அரசுக் கட்சியின் (ITAK) நாடாளுமன்றக் குழுத் தலைவரும் நாடாளுமன்ற உறுப்பினருமான சாணக்கியன் இராசமாணிக்கம் கலந்துரையாடியுள்ளார். பிரஸ்ஸல்ஸில் (Brussels) உள்ள ஐரோப்பிய வெளிவிவகாரச் சேவையின் (EEAS) தெற்காசியப் பிரிவின் (ASIAPAC) தலைவர் சார்லஸ் வைட்லியுடன் (Charles Whiteley) நடத்திய பேச்சுவார்த்தையின் போதே அவர் இக்கருத்துக்களை முன்வைத்தார்.

தமிழ் ராப் பாடகரின் அண்மைக்கால கைது மற்றும் தடுத்து வைப்பு குறித்து ஐரோப்பிய ஒன்றிய அதிகாரியிடம் சுட்டிக்காட்டிய நாடாளுமன்ற உறுப்பினர் சாணக்கியன், இந்த விவகாரம் குறித்து தனது கடுமையான கவலையை வெளியிட்டதுடன், இது இலங்கையின் கருத்துச் சுதந்திரம், ஜனநாயக சுதந்திரம் மற்றும் மனித உரிமைகள் ஆகியவற்றில் ஏற்படுத்தும் தாக்கங்களையும் எடுத்துரைத்தார்.

இந்த சந்திப்பின் போது, ஹிப்ஹாப் சங்கீயின் கைது தொடர்பாக இலங்கைத் தமிழ் அரசுக் கட்சியின் (ITAK) பொதுச் செயலாளர் எம்.ஏ. சுமந்திரன் எழுதிய கடிதமொன்றை சாணக்கியன் கையளித்ததுடன், பயங்கரவாதத் தடுப்புச் சட்டத்தை நீக்குமாறு நீண்டகாலமாக விடுக்கப்பட்டு வரும் கோரிக்கையையும் மீண்டும் வலியுறுத்தினார். இந்தச் சட்டத்தை நீக்குவதற்கு அடுத்தடுத்து வந்த அரசாங்கங்கள் பலமுறை உறுதியளித்த போதிலும், இது தொடர்ந்து தனிநபர்களுக்கு, குறிப்பாக தமிழ் சமூகத்திற்கு எதிராகப் பயன்படுத்தப்பட்டு வருகிறது என்பதை அவர் சுட்டிக்காட்டினார்.

ஐரோப்பிய ஒன்றியத்தின் GSP+ வரிச்சலுகைத் திட்டத்தின் கீழ் இலங்கையின் கடப்பாடுகளின் பின்னணியில், பயங்கரவாதத் தடுப்புச் சட்டத்தின் தொடர்ச்சியான பயன்பாடு ஏற்படுத்தும் தாக்கங்கள் குறித்தும் சாணக்கியன் கவனத்தை ஈர்த்தார். ஹிப்ஹாப் சங்கீயின் அண்மைக்கால தடுத்து வைப்பு உட்பட, இந்தச் சட்டத்தின் கீழ் தனிநபர்கள் தொடர்ந்து கைது செய்யப்படுவதும் தடுத்து வைக்கப்படுவதும், GSP+ தகைமைக்கு அடிப்படையாக அமையும் சர்வதேச மனித உரிமை ஒப்பந்தங்களை இலங்கை பின்பற்றுவது குறித்து கடுமையான கவலைகளை ஏற்படுத்துவதாக அவர் குறிப்பிட்டார்.

பயங்கரவாதத் தடுப்புச் சட்டத்தை நீக்குவதற்கு அடுத்தடுத்து வந்த அரசாங்கங்கள் அளித்த தொடர்ச்சியான வாக்குறுதிகள் நிறைவேற்றப்படவில்லை என்றும், இந்தச் சட்டத்தின் தொடர்ச்சியான பயன்பாடு அடிப்படை உரிமைகள், கருத்துச் சுதந்திரம், உரிய சட்ட நடைமுறைகள் மற்றும் ஜனநாயக ஆட்சி முறைமை தொடர்பான இலங்கையின் அர்ப்பணிப்புகளை பலவீனப்படுத்துகிறது என்றும் அவர் வலியுறுத்தினார்.

நீண்டகாலமாக ஒத்திவைக்கப்பட்டுள்ள மாகாண சபைத் தேர்தல்களை அவசரமாக நடத்த வேண்டியதன் அவசியம் குறித்தும் இந்த சந்திப்பில் கலந்துரையாடப்பட்டது. தமிழ் மக்களின் அரசியல் அபிலாஷைகளை நிவர்த்தி செய்வதற்கு அர்த்தமுள்ள அதிகாரப் பகிர்வும் ஜனநாயக பிரதிநிதித்துவமும் இன்றியமையாதவை என சாணக்கியன் வலியுறுத்தினார்.

எதிர்கால அரசியலமைப்பு ஏற்பாடுகள் எவையும் தமிழ் மக்களின் அரசியல் உரிமைகள், சமத்துவம் மற்றும் அபிலாஷைகளைப் பாதுகாப்பதை உறுதி செய்ய வேண்டும் என்பதை வலியுறுத்தி, தற்போதைய அரசியலமைப்பு சீர்திருத்த முன்மொழிவுகள் குறித்தும் இக்கலந்துரையாடலில் ஆராயப்பட்டது.

வலிந்து காணாமல் ஆக்கப்பட்டோர் பிரச்சினை குறித்தும் சாணக்கியன் இதன்போது கேள்வி எழுப்பியதுடன், காணாமல் போன தங்களது அன்புக்குரியவர்களுக்கான உண்மை மற்றும் நீதியைத் தேடி குடும்பங்கள் தொடர்ந்து நடத்தி வரும் போராட்டத்தை சுட்டிக்காட்டினார். சர்வதேச தரத்திற்கு அமைவான பொறுப்புக்கூறல், நம்பகமான உண்மையைக் கண்டறியும் வழிமுறைகள் மற்றும் நீதியின் முக்கியத்துவத்தை அவர் வலியுறுத்தினார்.

தமிழ் மக்கள் செறிந்து வாழும் பகுதிகளில் தொடரும் காணி ஆக்கிரமிப்பு விவகாரமும் இங்கு விவாதிக்கப்பட்டது. பெருமளவிலான காணிகள் இன்னும் இராணுவம் மற்றும் அரசாங்கத்தின் கட்டுப்பாட்டில் இருப்பதை சுட்டிக்காட்டிய சாணக்கியன், அவற்றை விரைவுபடுத்தி அவற்றின் உண்மையான உரிமையாளர்களிடம் ஒப்படைக்குமாறு கோரினார். இடம்பெயர்ந்த குடும்பங்களின் மீள்குடியேற்றத்தை எளிதாக்குவதற்கும், வாழ்வாதாரத்தை மீட்டெடுப்பதற்கும், பாதிக்கப்பட்ட சமூகங்கள் தங்களது வாழ்க்கையை கண்ணியத்துடன் மீண்டும் கட்டியெழுப்புவதை உறுதி செய்வதற்கும் காணி விடுவிப்பு இன்றியமையாதது என்று அவர் வலியுறுத்தினார்.

தமிழ் மக்களின் நியாயமான அரசியல், மனித உரிமைகள் மற்றும் சமூக நீதி கவலைகளை கையாள்வதில் சர்வதேச சமூகம் தொடர்ந்து ஈடுபடுவதன் முக்கியத்துவத்தை சாணக்கியன் மீண்டும் வலியுறுத்தியதுடன், இந்த விவகாரங்களில் ஐரோப்பிய ஒன்றியம் தொடர்ந்து செலுத்தி வரும் கவனத்தை வரவேற்பதாகவும் தெரிவித்தார்.