தாய்லாந்து தலைநகர் பேங்காக் அருகே உள்ள சுவர்ணபூமி சர்வதேச விமான நிலையத்தில், போலி கனடா நாட்டு கடவுச்சீட்டைப் (Passport) பயன்படுத்தி லண்டன் செல்ல முயன்ற இலங்கை நாட்டவர் ஒருவர் தாய்லாந்து குடிவரவு அதிகாரிகளால் கைது செய்யப்பட்டுள்ளார்.
சம்பந்தப்பட்ட நபர் லண்டன் செல்லும் விமானத்தில் ஏறுவதற்காக ஆவணங்களைச் சமர்ப்பித்தபோது, அவரது கனடா நாட்டு பயண ஆவணத்தில் சில முரண்பாடுகள் இருப்பதை குடிவரவு அதிகாரிகள் கண்டறிந்தனர். இதனைத் தொடர்ந்து அவரிடம் நடத்தப்பட்ட தீவிர விசாரணையில், அவர் கனடா நாட்டவர் அல்ல என்பதும், போலி ஆவணங்களைப் பயன்படுத்திய இலங்கை நாட்டவர் என்பதும் தெரியவந்தது.
விரிவடையும் விசாரணை – மேலும் ஒருவர் கைது:
பாதுகாப்பு அதிகாரிகளின் சோதனைகளில் இருந்து தப்பிப்பதற்காக, அவர் பல்வேறு பயண வழிகளைப் பயன்படுத்த திட்டமிட்டிருந்ததாக விசாரணையில் வெளிவந்துள்ளது.
இந்தச் சம்பவத்தைத் தொடர்ந்து நடத்தப்பட்ட தொடர் விசாரணைகளின் அடிப்படையில், பேங்காக்கில் உள்ள டான் முஎங் (Don Mueang) சர்வதேச விமான நிலையத்தில் வைத்து இந்த கடத்தலுக்கு உடந்தையாக இருந்ததாக சந்தேகிக்கப்படும் இரண்டாவது நபர் ஒருவரையும் அதிகாரிகள் கைது செய்துள்ளனர்.
கைது செய்யப்பட்டவர்களிடமிருந்து பறிமுதல் செய்யப்பட்ட கைபேசியை சோதனையிட்ட போது, எல்லைப் பாதுகாப்பு அதிகாரிகளின் கேள்விகளுக்கு எவ்வாறு பதிலளிக்க வேண்டும் என்பது குறித்த அறிவுறுத்தல்கள் மற்றும் வழிகாட்டல்கள் அதில் அடங்கியிருந்ததாக தாய்லாந்து அதிகாரிகள் தெரிவித்துள்ளனர்.
தற்போது, கைது செய்யப்பட்டுள்ள சந்தேக நபர்கள் இருவரிடமும் தாய்லாந்தின் குடிவரவுச் சட்டம் மற்றும் ஆவண மோசடி தடுப்புச் சட்டங்களின் கீழ் அதிகாரிகள் தீவிர விசாரணைகளை மேற்கொண்டு வருகின்றனர்.
