ஈரானிய கடற்படைக் கப்பலான ஐரிஸ் டெனா தாக்கப்படுவதற்கு முன்பு எவ்வித எச்சரிக்கையும் விடுக்கப்படவில்லை என்றும், அது ஒரு அமைதிப் பயணத்தையே மேற்கொண்டிருந்தது என்றும் இலங்கைக்கான ஈரானிய தூதுவர் அலிரேசா டெல்கோஷ் தெரிவித்துள்ளார்.

நேற்றைய தினம் கொழும்பில் ஊடகவியலாளர்களின் கேள்விகளுக்குப் பதிலளித்த அவர், இந்தச் சம்பவம் குறித்துப் பல முக்கிய உண்மைகளைத் தெளிவுபடுத்தினார்:

1. தாக்குதலுக்கு முந்தைய நிலை:

“எங்களிடம் உள்ள தகவல்களின்படி, ‘டெனா’ கப்பல் போருக்காகத் தயாராக இருக்கவில்லை. அது போருக்காகவோ அல்லது மோதலுக்காகவோ இங்கு வரவில்லை,” என்று அவர் கூறினார். இந்தியாவில் நடைபெற்ற அமைதிப் பயிற்சியில் பங்கேற்ற பிறகு, இலங்கையின் முறையான அழைப்பின் பேரில் மட்டுமே அந்தக் கப்பல் கொழும்பு நோக்கி வந்ததாக அவர் வலியுறுத்தினார்.

2. எச்சரிக்கை விடுக்கப்படவில்லை:

தாக்கப்படுவதற்கு 11 மணிநேரத்திற்கு முன்பே அந்தப் போர்க்கப்பல் துறைமுகத்திற்குள் நுழைய அனுமதி கோரியிருந்ததாக வெளியான தகவல்களை அவர் மறுத்தார். அமெரிக்காவிடமிருந்து எவ்வித முன்னெச்சரிக்கை அறிவிப்புகளும் (Alerts) கிடைக்கவில்லை என்றும், எந்தவிதப் போர்ச் சூழலும் இல்லாத நிலையில் அத்துமீறித் தாக்குதல் நடத்தப்பட்டதாகவும் அவர் குற்றம் சாட்டினார்.

3. உயிரிழந்தவர்கள் யார்?

இந்தத் தாக்குதலில் 104 பேர் கொல்லப்பட்டதை உறுதிப்படுத்திய தூதுவர், ஒரு உருக்கமான தகவலைப் பகிர்ந்து கொண்டார்:

“கொல்லப்பட்டவர்களில் பெரும்பாலானோர் இராணுவத்தினர் அல்ல. அவர்கள் ஒரு இசைக்குழுவைச் சேர்ந்தவர்கள் (Music band). அவர்களது ஆயுதங்களாக சாக்ஸபோன் (Saxophone) மற்றும் வயோலா (Viola) இசைக்கருவிகளே இருந்தன.”

4. இலங்கையின் உதவிக்கு நன்றி:

விபத்தில் உயிர் தப்பியவர்கள் மற்றும் ஏனைய ஈரானியக் கப்பல் ஊழியர்களுக்கு இலங்கை அரசாங்கம் அளித்து வரும் விருந்தோம்பல் மற்றும் உதவிக்காக அவர் நன்றியைத் தெரிவித்தார். தற்போது இலங்கையில் இருப்பவர்களில் பெரும்பாலோர் பயிற்சி மாணவர்கள் (Cadets) என்றும், அவர்களை விரைவில் தாயகத்திற்கு அனுப்பும் பணிகள் நடந்து வருவதாகவும் அவர் கூறினார்.

5. பயணத்தின் பின்னணி:

இந்தியாவில் நடைபெற்ற கடற்படைப் பயிற்சியின் போது, இலங்கை கடற்படைத் தளபதி விடுத்த அழைப்பின் பேரில் மூன்று ஈரானியக் கப்பல்கள் நட்பு ரீதியான விஜயத்தை மேற்கொண்டன. அதில் ‘டெனா’ (Dena) தாக்கப்பட்டது, ‘புஷெர்’ (Bushehr) தற்போது கொழும்புத் துறைமுகத்தில் பாதுகாப்பாக உள்ளது எனவும் அவர் குறிப்பிட்டிருந்தார்.