சிறுவர் துஷ்பிரயோகம் மற்றும் சுரண்டல்களுக்கு ஆளாக்கப்பட்ட சுமார் 46,000 சிறுவர்கள் இன்னும் நீதிக்காகக் காத்திருப்பதாகத் தெரிவித்துள்ள எதிர்க்கட்சித் தலைவர் சஜித் பிரேமதாச, இது தொடர்பான சட்டக் கோப்புகளைத் தாமதமின்றி விரைவுபடுத்துமாறு அரசாங்கத்தை வலியுறுத்தியுள்ளார்.
சிறுவர் பாதுகாப்பு தொடர்பான பிரச்சினைகள் குறித்து எதிர்க்கட்சித் தலைவர் அலுவலகத்தில் நடைபெற்ற கலந்துரையாடலின் போதே அவர் இந்தக் கருத்துக்களை வெளியிட்டுள்ளார்.
சிறுவர் துஷ்பிரயோகம் தொடர்பான முறைப்பாடுகளைக் கையாள்வதில் நிலவும் தாமதம் குறித்துக் கேள்வி எழுப்பிய பிரேமதாச, பாதிக்கப்பட்ட பலருக்கு அவர்களின் சிறுவர் பருவத்திலேயே நீதி கிடைக்கவில்லை எனச் சுட்டிக்காட்டியதுடன், இதற்கான உரிய தீர்வை உறுதி செய்ய அவசர உத்திகள் அவசியமெனக் கேட்டுக்கொண்டார்.
தேசிய சிறுவர் பாதுகாப்புக் கொள்கை (National Child Protection Policy) குறித்துக் குறிப்பிட்ட அவர், இக்கொள்கை 2019 ஆம் ஆண்டு ஆரம்பிக்கப்பட்டு 2025 ஆம் ஆண்டளவில் நடைமுறைப்படுத்தத் திட்டமிடப்பட்டிருந்த போதிலும், அரசாங்கம் தற்போது இதன் நடைமுறைப்படுத்தலை 2029 ஆம் ஆண்டு வரை பிற்போட்டுள்ளதாகத் தெரிவித்தார். 2024 ஆம் ஆண்டு மக்கள் ஆணையின் கீழ் வழங்கப்பட்ட வாக்குறுதிகளை இவ்வாறு எவ்வாறு தள்ளிப்போட முடியும் எனக் கேள்வி எழுப்பிய அவர், இது குழந்தைகளுக்கு இழைக்கப்படும் கடுமையான அநீதி என்றும் கூறினார்.
இக்கொள்கையை இந்த ஆண்டிலேயே உடனடியாக நடைமுறைப்படுத்துவது உள்ளிட்ட, சிறுவர் பாதுகாப்பை வலுப்படுத்துவதற்காக எடுக்கப்படும் எந்தவொரு நடவடிக்கைக்கும் தனது கட்சி ஆதரவளிக்கும் என எதிர்க்கட்சித் தலைவர் தெரிவித்தார்.
மேலும், தற்போது சுமார் 4,000 வழக்குகள் நீதிமன்றங்களில் நிலுவையில் உள்ளதாகச் சுட்டிக்காட்டிய அவர், அதற்கான விசாரணைகளை விரைவுபடுத்த வேண்டியதன் அவசியத்தை வலியுறுத்தினார்.
விசாரணைகளை விரைவுபடுத்தி, பாதிக்கப்பட்ட 46,000 முறைப்பாட்டாளர்களுக்கும் நீதியை உறுதி செய்வதற்காக ஜனாதிபதியின் கீழ் ஒரு விசேட பணிக்குழுவை (special task force) அமைக்குமாறு கோரிய பிரேமதாச, இப்பிரச்சினையை அரசியல்மயமாக்கக் கூடாது என்றும் கேட்டுக்கொண்டார்.
சிறுவர்களின் உரிமைகளைப் பாதுகாப்பதற்கும், பாதிக்கப்பட்டவர்களுக்கு நீதியைப் பெற்றுக்கொடுப்பதற்கும் எடுக்கப்படும் முயற்சிகளுக்கு தாமும், ஐக்கிய மக்கள் சக்தியும் (SJB) நிபந்தனையற்ற ஆதரவை வழங்கும் என்றும் அவர் மேலும் தெரிவித்தார்.
