ஸ்பெயின் நாட்டின் உலகக்கோப்பை கால்பந்து வெற்றி கொண்டாட்டங்களின்போது, வடமேற்கு ஸ்பெயினின் சலமன்கா (Salamanca) மாகாணத்தில் உள்ள நீரூற்று ஒன்றின் ஒரு பகுதி இடிந்து விழுந்ததில், 13 வயது சிறுவன் பரிதாபமாக உயிரிழந்தான்.

இந்தச் சம்பவத்தில் மேலும் இரண்டு இளைஞர்கள் காயமடைந்தனர் என்று அவசர சேவைகள் பிரிவினர் தெரிவித்தனர். இதில் காயமடைந்த ஒரு குழந்தை, காலில் எலும்பு முறிவு ஏற்பட்டிருக்கலாம் என்ற சந்தேகத்தின் பேரில் மருத்துவமனைக்குக் கொண்டு செல்லப்பட்டது.

உள்ளூர் நேரப்படி ஞாயிற்றுக்கிழமை நள்ளிரவு 12:30 மணியளவில் (இலங்கை நேரப்படி திங்கள்கிழமை அதிகாலை 3:00 மணி), சலமன்காவின் சியுடாட் ரோட்ரிகோ (Ciudad Rodrigo) பகுதியில் உள்ள ‘ஆர்போல் கோர்டோ’ (Árbol Gordo) நீரூற்றுக்குள், ஸ்பெயினின் வெற்றியை இளைஞர்கள் கொண்டாடினார். அப்போது, நீரூற்றின் ஒரு பகுதி எதிர்பாராதவிதமாக இடிந்து விழுந்தது.

சியுடாட் ரோட்ரிகோவின் நகரசபை சமூக ஊடகத்தில் வெளியிட்ட பதிவில், “ஸ்பெயின் தேசிய கால்பந்து அணியின் உலகக்கோப்பை வெற்றியைக் கொண்டாடும் நிகழ்வாக இருக்க வேண்டியது, தற்போது ஒரு சோகமாக மாறிவிட்டது” என்று குறிப்பிட்டுள்ளது.

காஸ்டில்லா லியோன் (Castilla y León) பிராந்தியத்தின் அவசர சேவைகள் பிரிவிடம், நீரூற்று இடிந்து விழுந்தது குறித்துப் பல அழைப்புகள் வந்ததாகக் கூறியுள்ளது. ஸ்பெயினின் வெற்றியைக் கொண்டாடுவதற்காகப் பலர் நீரூற்றின் மீது ஏறியதைத் தொடர்ந்து, அதன் கட்டமைப்பின் ஒரு பகுதி உடைந்து சரிந்ததாக உள்ளூர் ஊடகங்கள் செய்தி வெளியிட்டுள்ளன.

அவசர சேவைகள் பிரிவு, நகரத்தின் உள்ளூர் பொலிஸாருக்கும் (local police), சலமன்காவின் சிவில் காவல்துறைக்கும் (Civil Guard), தீயணைப்புப் படையினருக்கும், உள்ளூர் அவசர மருத்துவ சேவைக்கும் தகவல் தெரிவித்தது. அதனைத் தொடர்ந்து, தீவிர சிகிச்சைப் பிரிவைக் கொண்ட நடமாடும் வாகனம் மற்றும் அடிப்படை மருத்துவ உதவி வழங்கும் ஆம்புலன்ஸ் ஆகியவை சம்பவ இடத்திற்கு அனுப்பி வைக்கப்பட்டன.

சிகிச்சை அளிக்கப்பட்ட சிறுவனின் உயிரிழப்பு குறித்து விசாரணை நடத்துவதற்காக, உள்ளூர் சுகாதார மையத்தில் சிவில் காவல்துறை அதிகாரிகளின் உதவியை அவசர மருத்துவ சேவை பின்னர் கோரியது என்று காஸ்டில்லா லியோன் பிராந்திய அரசாங்கத்தின் இணையதளம் தெரிவித்துள்ளது.

சிறுவனின் குடும்பத்தினருக்கு உளவியல் ஆதரவை வழங்குமாறும் சிவில் காவல்துறையிடம் அது கேட்டுக்கொண்டுள்ளது.

சம்பவத்தால் பாதிக்கப்பட்ட மற்றவர்கள் அனைவரும் விரைவில் குணமடைய விரும்புவதாக நகரசபை தெரிவித்துள்ளது.

ஞாயிற்றுக்கிழமை நடைபெற்ற உலகக்கோப்பை கால்பந்து இறுதிப் போட்டியில், கூடுதல் நேரத்தில் ஃபெர்ரன் டொரெஸ் (Ferran Torres) கோல் அடிக்க, ஸ்பெயின் அணி அர்ஜென்டினாவை 1-0 என்ற கோல் கணக்கில் வீழ்த்தியது.

2010-ஆம் ஆண்டிற்குப் பிறகு, ஸ்பெயின் நாடு உலகக்கோப்பையை வெல்வது இதுவே இரண்டாவது முறையாகும்.