இலங்கைக்கு விஜயம் மேற்கொண்டுள்ள இந்திய வெளியுறவுத்துறை அமைச்சர் கலாநிதி எஸ். ஜெய்சங்கர் அவர்களுக்கும், வடக்கு மாகாணத்தைப் பிரதிநிதித்துவப்படுத்தும் பாராளுமன்ற உறுப்பினர்களுக்கும் இடையிலான விசேட சந்திப்பொன்று நேற்றைய தினம் நடைபெற்றது.
இச்சந்திப்பின் பின்னர் ஊடகங்களுக்குக் கருத்துத் தெரிவித்த முன்னாள் பாராளுமன்ற உறுப்பினர் எம். ஏ. சுமந்திரன், கலந்துரையாடலின் முக்கிய அம்சங்களை விளக்கினார்.
இச்சந்திப்பில் பிரதானமாக கலந்துரையாடப்பட்ட விடயங்கள் வருமாறு:
* மனிதாபிமான உதவிகள்:
அண்மையில் ஏற்பட்ட இயற்கை அனர்த்தங்களினால் பாதிக்கப்பட்ட மக்களுக்கு இந்தியாவினால் வழங்கப்படும் நிவாரண உதவிகள் குறித்து இங்கு விரிவாக ஆராயப்பட்டது. குறிப்பாக, இந்த உதவிகள் மக்கள் பிரதிநிதிகள் ஊடாக அன்றி, ஏனைய தரப்பினூடாக முன்னெடுக்கப்படுவது தொடர்பில் அமைச்சரின் கவனத்திற்கு கொண்டு வரப்பட்டது.
* மாகாண சபை தேர்தல்:
மாகாண சபை தேர்தலை விரைவாக நடத்துவதன் அவசியம் குறித்து இதன்போது வலியுறுத்தப்பட்டது. குறிப்பாக, பாராளுமன்ற உறுப்பினர் சாணக்கியன் அவர்களினால் முன்வைக்கப்பட்டுள்ள பாராளுமன்றப் பிரேரணையை நடைமுறைப்படுத்துவதன் மூலம், மாகாண சபை தேர்தலை மிக விரைவில் நடாத்த முடியும் என்பது குறித்து இந்திய வெளியுறவு அமைச்சருக்கு எடுத்துரைக்கப்பட்டது.
* தமிழ் மக்களின் அரசியல் அபிலாஷைகள்:
வடக்கு தமிழ் மக்கள் எதிர்நோக்கும் நீண்டகால அரசியல் மற்றும் வாழ்வாதாரப் பிரச்சினைகள் தொடர்பிலும், அவற்றுக்கான நிலையான தீர்வுகள் குறித்தும் இதன்போது ஆலோசிக்கப்பட்டது.
வடக்கு மக்களின் தேவைகள் மற்றும் அரசியல் உரிமைகள் தொடர்பில் இந்திய அரசாங்கத்தின் தொடர்ச்சியான ஒத்துழைப்பை பாராளுமன்ற உறுப்பினர்கள் இதன்போது கோரியுள்ளமை குறிப்பிடத்தக்கது.
By C.G.Prashanthan
