யாழ்ப்பாண மாவட்டத்தில் தொழில் வாய்ப்பின்மையை குறைத்து, இளைஞர், யுவதிகளுக்கான அதிகளவிலான தொழில் வாய்ப்புகளை உருவாக்குவதற்குத் தேவையான நடவடிக்கைகள் முன்னெடுக்கப்பட்டு வருவதாக அமைச்சர் இராமலிங்கம் சந்திரசேகர் தெரிவித்தார்.
மாவட்டச் செயலகத்தில் இன்றைய தினம்(03.10.2026) மாவட்ட செயலகமும் மனிதவலு வேலைவாய்ப்பு திணைக்களமும் இணைந்து நடத்திய மாபெரும் தொழிற்சந்தையில் பிரதம விருந்தினராக கலந்து கொண்டு உரையாற்றிய போதே அமைச்சர் இவ்வாறு தெரிவித்தார். தொடர்ந்து இங்கு கருத்துத் தெரிவிக்கையில்,
இளைஞர்களுக்கான தொழில் வாய்ப்புகளை பெற்றுக்கொள்ள இன்றைய நிகழ்வு மிகவும் முக்கியத்துவம் வாய்ந்ததாகும். இவ்வளவு இளைஞர், யுவதிகள் தொழில் தேடி இங்கு வந்திருக்கின்றார்கள் என்றால், அவர்களுக்குத் தேவையான தொழில் வாய்ப்புகள் இன்னும் போதுமான அளவில் உருவாக்கப்படவில்லையா?” என்கின்ற கேள்வி எம்முன் எழுகின்றது. இந்தக் கேள்விக்கான பதிலை நாம் மிகவும் பொறுப்புடன் தேட வேண்டியுள்ளது.
யாழ்ப்பாணத்தின் தொழில் வாய்ப்புக்கள் :
நாடளாவிய ரீதியில் தொழில் வாய்ப்பின்மையை எடுத்துக்கொண்டால், அது சுமார் 3.4 சதவீதமாகக் காணப்படுகின்றது. ஆனால், யாழ்ப்பாண மாவட்டத்தைப் பொறுத்தவரையில் அது சுமார் 6.7 சதவீதமாக உள்ளது. எனவே, யாழ்ப்பாண மாவட்டத்தைச் சேர்ந்த எமது இளைஞர், யுவதிகளுக்கு மேலும் அதிகளவிலான தொழில் வாய்ப்புகளை உருவாக்க வேண்டிய பாரிய பொறுப்பு எமக்கு இருக்கின்றது. தொழில் வாய்ப்பின்மை என்பது வெறுமனே ஒரு புள்ளிவிவரம் அல்ல. அது ஒரு இளைஞனின் கனவு; ஒரு யுவதியின் எதிர்காலம்; ஒரு குடும்பத்தின் எதிர்பார்ப்பு.
பெண்களுக்கான தொழில் வாய்ப்புகள் :
அதேவேளை, தொழிலாளர் பங்கேற்பைப் பார்க்கும்போது, ஆண்களில் சுமார் 68 சதவீதத்தினர் தொழிலில் ஈடுபட்டுள்ள நிலையில், பெண்களின் தொழிலாளர் பங்கேற்பு சுமார் 32 சதவீதமாகவே காணப்படுகின்றது. எனவே, பெண்களுக்கான தொழில் வாய்ப்புகளை அதிகரிப்பதும், அவர்களின் திறமைகளையும் ஆற்றல்களையும் பொருளாதார வளமாக மாற்றுவதும் எமது சமூகத்தின் முன்னேற்றத்திற்கு மிகவும் அவசியமானதாகும்.
தொழிற்சந்தையின் முக்கியத்துவம் :
தொழில் வாய்ப்பின்றி இருக்கின்றவர்களுக்கு வேலைவாய்ப்புகளை உருவாக்குவதோடு மட்டுமல்லாமல், தொழில் தேடுபவர்களையும் தொழில் வழங்குபவர்களையும் ஒரே தளத்தில் இணைக்கும் பாலமாக இன்றைய தொழிற்சந்தை அமைகின்றது எனத் தெரிவித்தார். இந்த நாட்டில் வாழ்கின்ற எந்தவொரு இளைஞரும், யுவதியும் தொழில் வாய்ப்பின்றி இருக்கக்கூடாது.
ஒவ்வொருவருக்கும் அவர்களின் கல்வித் தகுதிக்கும், திறமைக்கும், ஆற்றலுக்கும் பொருத்தமான தொழில் வாய்ப்பு கிடைக்க வேண்டும். ஒவ்வொருவரும் பொருளாதார ரீதியாக வலுவடைந்து, கௌரவத்துடனும் சுயமரியாதையுடனும் வாழக்கூடிய நிலையை உருவாக்க வேண்டும் என்பதே எமது நோக்கமாகும்.
அரசுத் துறைக்கு ஒரு இலட்சத்து பன்னிரண்டாயிரத்திற்கும் அதிகமானவர்களை புதிதாக இணைத்துக்கொள்ளும் நடவடிக்கை முன்னெடுக்கப்பட்டுள்ளதாகவும் அமைச்சர் குறிப்பிட்டார்.
வெளிப்படையான நிர்வாகம் :
இதேவேளை, இலஞ்சம், ஊழல் மற்றும் முறைகேடுகளற்ற நிர்வாகத்தை உருவாக்குவதுடன், அரச வளங்களை சிக்கனமாகவும் பொறுப்புடனும் பயன்படுத்துவது அரசாங்கத்தின் முக்கிய கொள்கையாக உள்ளதாகவும் தெரிவித்தார்.
யாழ்ப்பாண மாவட்ட மக்கள் வழங்கிய மக்கள் ஆணை :
யாழ்ப்பாண மாவட்ட மக்கள் வழங்கிய மக்கள் ஆணை அரசாங்கத்திற்கு பெரும் பொறுப்பை ஏற்படுத்தியுள்ளதாகக் குறிப்பிட்ட அமைச்சர், அந்த மக்கள் ஆணைக்கு மதிப்பளிக்கும் வகையில் மாவட்டத்தின் தொழில், அபிவிருத்தி மற்றும் சமூகப் பிரச்சினைகளுக்கு தீர்வு காண நடவடிக்கைகள் முன்னெடுக்கப்படுவதாகவும் தெரிவித்தார்.
யுத்தத்தினால் நீண்டகாலமாக பாதிக்கப்பட்ட வடக்கு மாகாணத்தை நிலையான அபிவிருத்திப் பாதையில் கொண்டு செல்வதற்கும், யாழ்ப்பாண மாவட்டத்தில் புதிய தொழில் வாய்ப்புகளை உருவாக்குவதற்கும் தேவையான நிதி மற்றும் அபிவிருத்தி நடவடிக்கைகள் முன்னெடுக்கப்படுகின்றன எனவும் குறிப்பிட்டார்.
“Clean Sri Lanka” :
அதேவேளை, “Clean Sri Lanka” வேலைத்திட்டம் நாட்டைச் சுத்தப்படுத்தும் திட்டம் மாத்திரமல்ல எனக் குறிப்பிட்ட அமைச்சர், மக்களின் மனப்பாங்கு, பழக்கவழக்கம் மற்றும் சமூகப் பொறுப்புணர்வில் மாற்றத்தை ஏற்படுத்தும் பரந்த சமூக மறுமலர்ச்சித் திட்டமாக அது முன்னெடுக்கப்படுவதாகத் தெரிவித்தார்.
போதைப்பொருள், வன்முறை, வாள்வெட்டு உள்ளிட்ட சமூகச் சீரழிவுகளிலிருந்து இளைஞர், யுவதிகளையும் மாணவர்களையும் பாதுகாப்பது அனைவரினதும் பொறுப்பு எனவும் வலியுறுத்தினார்.
பாடசாலைகளில் போதைப்பொருள் தொடர்பான சம்பவங்கள் இடம்பெறும் சந்தர்ப்பங்களில் அவற்றை மூடி மறைக்காமல், உரிய விசாரணை மற்றும் சட்ட நடவடிக்கைகளை மேற்கொள்ள வேண்டியது அவசியம் எனவும் தெரிவித்தார்.
மேலும், பெண்கள் மற்றும் மாணவிகள் எதிர்கொள்ளும் பல்வேறு துன்புறுத்தல்கள் மற்றும் அழுத்தங்களிலிருந்து அவர்களைப் பாதுகாப்பதற்கான சமூகப் பொறுப்பையும் வலுப்படுத்த வேண்டும் என அமைச்சர் குறிப்பிட்டார்.
அரச செலவினங்களை குறைக்கும் நடவடிக்கைகள் :
நாட்டின் பொருளாதாரத்தை ஸ்திரப்படுத்துவதுடன், அரச செலவினங்களைக் குறைத்து, அரச வளங்களை மக்களின் நலனுக்காகப் பயன்படுத்தும் புதிய நிர்வாக அணுகுமுறையை அரசாங்கம் முன்னெடுத்து வருவதாகவும் அமைச்சர் தெரிவித்தார்.
அரச நிர்வாகத்தில் வெளிப்படைத்தன்மையையும் பொறுப்புணர்வையும் ஏற்படுத்துவதாகும்.
மாற்றத்தை மக்களிடம் எதிர்பார்ப்பதற்கு முன்னர், ஆட்சியில் இருப்பவர்கள் தாமே அதற்கு முன்னுதாரணமாக இருக்க வேண்டும்.
எமது ஜனாதிபதி அநுர குமார திசாநாயக்க அவர்கள் பதவியேற்றது முதல் அரச செலவுகளைக் குறைத்தல், தேவையற்ற அரச வளங்களின் பயன்பாட்டைத் தவிர்த்தல், மக்களின் வரிப்பணத்தை பொறுப்புடன் நிர்வகித்தல் போன்ற நடவடிக்கைகள் முன்னெடுக்கப்பட்டுள்ளன.
ஜனாதிபதியின் பதவியேற்பு நிகழ்வுக்கு மிகக் குறைந்த செலவில் செலவிடப்பட்டதாகத் தெரிவிக்கப்பட்டது. ஜனாதிபதிக்கான அதிகமான பாதுகாப்புப் படையினரின் எண்ணிக்கை குறைக்கப்பட்டதுடன், அதிகமான வாகனங்களும் விடுவிக்கப்பட்டன.
நாட்டில் இருந்த ஏழு ஜனாதிபதி மாளிகைகளில் இரண்டைத் தவிர ஏனையவற்றின் பயன்பாடும் ஏனைய துறைகளுக்கு வழங்க நடவடிக்கை எடுக்கப்படுகின்றன.
இவை அனைத்தும் ஒரு முக்கியமான செய்தியை வெளிப்படுத்துகின்றன.
அதேபோன்று, அமைச்சர்களுக்கான சொகுசு வீடுகள், வாகனங்கள் மற்றும் ஏனைய அதிக செலவிலான வசதிகளிலும் மாற்றங்கள் கொண்டுவரப்பட்டுள்ளன.
அதேபோன்று, அமைச்சர்களுக்கு வழங்கப்பட்ட சுமார் 4 கோடி ரூபாய் பெறுமதியான வரியில்லா வாகன அனுமதிப்பத்திரத்தையும் நாங்கள் பெற்றுக்கொள்ளவில்லை.
மக்களிடம் பொறுப்புணர்வை எதிர்பார்க்கும் நாம், முதலில் அந்தப் பொறுப்புணர்வை நாமே கடைப்பிடிக்க வேண்டும்.
ஐந்து வருடங்கள் பாராளுமன்ற உறுப்பினராக இருந்தால் வாழ்நாள் முழுவதும் ஓய்வூதியம் கிடைக்கும் நடைமுறையை மாற்றுவதற்கும் சட்டமூலம் முன்வைக்கப்பட்டுள்ளது. இதுவும் அரசியல் கலாசாரத்தில் மாற்றத்தை ஏற்படுத்துவதற்கான ஒரு முயற்சியாகும்.
இளைஞர்களின் எதிர்காலமும் அரச பொறுப்பும் :
அமைச்சர்கள் மற்றும் பாராளுமன்ற உறுப்பினர்களுக்குக் கிடைக்கும் சம்பளம், கொடுப்பனவுகள் மற்றும் ஏனைய வசதிகளை நாம் பார்க்கும்போது, மறுபுறத்தில் தமது எதிர்காலத்திற்காக தொழில் தேடி நிற்கும் ஆயிரக்கணக்கான இளைஞர், யுவதிகளையும் பார்க்க வேண்டும்.
இந்த இரண்டு நிலைமைகளுக்கும் இடையிலான இடைவெளியைத்தான் நாம் நிரப்ப வேண்டும்.
புதிய அரசியல் மற்றும் நிர்வாகக் கலாசாரம் :
அரசாங்கத்தின் பணம் மக்களுக்காகச் செலவிடப்பட வேண்டும். அரச வளங்கள் மக்களுக்காகப் பயன்படுத்தப்பட வேண்டும். அரச அதிகாரம் மக்களின் வாழ்க்கையை முன்னேற்றுவதற்காகப் பயன்படுத்தப்பட வேண்டும். இதுவே நாம் உருவாக்க விரும்புகின்ற புதிய அரசியல் மற்றும் நிர்வாகக் கலாசாரம்.
தொழிற்சந்தையை வேலை தேடும் நிகழ்வாக மட்டும் பார்க்காமல், எதிர்காலத்திற்கான புதிய வாய்ப்பை உருவாக்கும் தளமாகப் பயன்படுத்துங்கள் :
இன்றைய தொழிற்சந்தையை வெறுமனே வேலை தேடும் நிகழ்வாகப் பார்க்காமல், தமது திறமைகளை வெளிப்படுத்தவும், எதிர்காலத்திற்கான புதிய வாய்ப்புகளை உருவாக்கவும் கிடைத்துள்ள முக்கியமான தளமாக இளைஞர், யுவதிகள் பயன்படுத்திக்கொள்ள வேண்டும் எனத் தெரிவித்தார்.
கல்வித் தகுதி, தொழில்நுட்பத் திறமை அல்லது அனுபவம் எதுவாக இருந்தாலும், தமது திறமைகளில் நம்பிக்கை வைத்து, புதிய திறன்களைக் கற்றுக்கொண்டு கிடைக்கும் வாய்ப்புகளைப் பயன்படுத்தி எதிர்காலத்தைத் தாமே கட்டியெழுப்ப வேண்டும்.
தொழில் வாய்ப்புகளை உருவாக்குவது அரசாங்கத்தின் பொறுப்பாகும்.
அவற்றைப் பயன்படுத்தி வாழ்க்கையை முன்னேற்றுவது இளைஞர், யுவதிகளின் பொறுப்பாகும். இந்த இரு பொறுப்புகளையும் இணைக்கும் முக்கிய தளமாக இன்றைய தொழிற்சந்தை அமைய வேண்டும்.
இங்கு இடம்பெறும் ஒவ்வொரு சந்திப்பும், நேர்காணலும் புதிய வாய்ப்புகளுக்கான தொடக்கமாக அமையக்கூடும். எனவே, நம்பிக்கையுடன் முன்னேறி, தமது கனவுகளை இலக்குகளாக மாற்றிக்கொள்ள வேண்டும். யாழ்ப்பாண மாவட்டம் புதிய தொழில் வாய்ப்புகளின் முக்கிய மையமாக வளர்வதுடன், இத்தொழிற்சந்தை ஆயிரக்கணக்கான இளைஞர், யுவதிகளின் வாழ்க்கையில் புதிய நம்பிக்கைக்கும் வாய்ப்புகளுக்கும் வழிவகுக்கும் தொடக்கமாக அமைய வேண்டும் எனத் தெரிவித்தார்.
