முல்லைத்தீவு மாவட்ட மக்களுக்கு அரச நிர்வாகத்தின் மூலம் மிகவும் வினைத்திறனான மற்றும் துரிதமான சேவையை வழங்குவதை இலக்காகக் கொண்டு, 2026 ஆம் ஆண்டுக்கான மூன்றாவது மாவட்ட பிரதேச செயலாளர்கள் மாநாடு வியாழக்கிழமை (26) துணுக்காய் பிரதேச செயலகத்தில் நடைபெற்றது.
முல்லைத்தீவு மாவட்ட அரசாங்க அதிபர் அ. உமாமகேஸ்வரன் தலைமையில் காலை 8:30 மணியளவில் இம்மாநாடு ஆரம்பமானது. மாநாட்டிற்கு முன்னதாக, துணுக்காய் பிரதேச செயலகத்திற்கு வருகை தந்த அரசாங்க அதிபர் தலைமையிலான குழுவினர், செயலகத்தின் அலுவலகச் செயற்பாடுகள் மற்றும் கோப்புப் பராமரிப்பு முறைகளை நேரில் பார்வையிட்டு ஆய்வு செய்தனர்.
மக்களின் வாழ்வாதாரம் மற்றும் மாவட்டத்தின் தற்போதைய சவால்கள் குறித்து இம்மாநாட்டில் விரிவாக ஆராயப்பட்டது:
எரிபொருள் நெருக்கடியும் மேலாண்மையும்: உலகளாவிய ரீதியில் ஏற்பட்டுள்ள எரிபொருள் தட்டுப்பாட்டினால் மாவட்டத்தில் எழுந்துள்ள நெருக்கடி நிலைமைகள் மற்றும் அரச செலவினக் கட்டுப்பாடுகள் குறித்து ஆலோசிக்கப்பட்டது.
அனர்த்த நிவாரணப் பணிகள்: அண்மையில் முல்லைத்தீவு மாவட்டத்தில் ஏற்பட்ட வெள்ள அனர்த்தத்தினால் பாதிக்கப்பட்ட மக்களுக்கான நிவாரண உதவிகள் மற்றும் நஷ்டஈடு வழங்கும் பணிகள் குறித்து மீளாய்வு செய்யப்பட்டது.
அபிவிருத்தித் திட்டங்கள்: 2026 ஆம் ஆண்டுக்கான நிதி ஒதுக்கீடுகள், குறிப்பாக கிராமிய வீதி அபிவிருத்தி மற்றும் சமூக நலத்திட்டங்களை முன்னெடுப்பது குறித்து விரிவாக ஆராயப்பட்டது.
நிர்வாகச் சவால்கள்: பிரதேச செயலகங்கள் எதிர்நோக்கும் நிதி மற்றும் திட்டமிடல் ரீதியான சவால்கள், 2026 வரவு செலவுத் திட்டத்தில் ஒதுக்கப்பட்டுள்ள நிதியைப் பயன்படுத்துதல் மற்றும் வெலிஓயா பிரதேசத்தின் அடிப்படைப் பிரச்சினைகளுக்கான தீர்வுகள் குறித்தும் விவாதிக்கப்பட்டது.
துணுக்காய் பிரதேச செயலாளர் இ. ரமேஷின் சிறப்பான ஏற்பாட்டில் நடைபெற்ற இந்த மாநாட்டில், மாவட்ட மேலதிக அரசாங்க அதிபர் (நிர்வாகம்) திருமதி எஸ். மஞ்சுளாதேவி, மேலதிக அரசாங்க அதிபர் (காணி), மாவட்டப் பிரதம கணக்காளர், மாவட்டப் பிரதம உள்ளகக் கணக்காய்வாளர் மற்றும் மாவட்ட நலன்புரிச் சபையின் இணைப்பாளர் ஆகியோர் கலந்துகொண்டனர்.
மேலும், கரைதுறைப்பற்று, புதுக்குடியிருப்பு, துணுக்காய், ஒட்டுசுட்டான் மற்றும் மாந்தை கிழக்கு ஆகிய பிரிவுகளின் பிரதேச செயலாளர்கள், உதவிப் பிரதேச செயலாளர்கள், திட்டமிடல் பணிப்பாளர்கள் உள்ளிட்ட உயரதிகாரிகள் பலரும் இம்மாநாட்டில் பங்கேற்றனர்.
