ஒட்டாவா (2026 மே 27) – மலேசியா மற்றும் இந்தோனேசிய பிரஜைகளில் தகுதியுடையவர்கள் இனி விசா இன்றி கனடாவுக்குப் பயணம் செய்யலாம் என கனடா குடிவரவு, அகதிகள் மற்றும் குடியுரிமை அமைச்சகம் (IRCC) அறிவித்துள்ளது.

இந்த அறிவிப்பு கடந்த மே 25 ஆம் திகதி வெளியிடப்பட்டதோடு, நேற்று மே 26 ஆம் திகதி முதல் உத்தியோகபூர்வமாக அமுலுக்கு வந்துள்ளது.

புதிய நடைமுறை என்ன?

இதுவரை காலமும் கனடா செல்வதற்கு தற்காலிக வதிவிட விசா (TRV) பெற வேண்டியிருந்த நிலையில், இனி தகுதியுடையவர்கள் மின்னணு பயண அங்கீகாரத்தை (eTA) மாத்திரம் பெற்று விமானம் மூலம் கனடாவுக்குச் செல்ல முடியும்.

இதன் மூலம் விசா பெறுவதற்காகக் காத்திருக்கும் நீண்ட காலதாமதம் தவிர்க்கப்படுவதோடு, குறைந்த செலவில் பயண ஆவணங்களைப் பெற்றுக்கொள்ள முடியும்.

யாரெல்லாம் தகுதியுடையவர்கள்?

அனைத்து மலேசிய மற்றும் இந்தோனேசிய பிரஜைகளுக்கும் இந்தச் சலுகை வழங்கப்படவில்லை. பின்வரும் நிபந்தனைகளில் ஒன்றைப் பூர்த்தி செய்பவர்கள் மட்டுமே இதற்கு விண்ணப்பிக்கலாம்:

1. கடந்த 10 ஆண்டுகளில் கனடாவின் தற்காலிக வதிவிட விசாவைக் (TRV) கொண்டிருந்தவர்கள்.

2. தற்போது செல்லுபடியாகும் அமெரிக்காவின் குடிவரவு அல்லாத (Non-immigrant) விசாவைக் கொண்டிருப்பவர்கள்.

கவனிக்க வேண்டிய முக்கிய விபரங்கள்:

• விமானப் பயணம் மட்டும்: இந்தச் சலுகை விமானம் மூலம் கனடாவுக்குச் செல்பவர்களுக்கு மட்டுமே பொருந்தும். கார், பேருந்து, ரயில் அல்லது கப்பல் மூலம் செல்பவர்கள் வழக்கம் போல விசா பெற வேண்டும்.

• பணி மற்றும் கல்வி: வேலைக்காக அல்லது கல்வி கற்கச் செல்பவர்கள் அதற்குரிய பணி/கல்வி அனுமதிப்பத்திரங்களுக்கு (Work/Study Permits) தொடர்ந்து விண்ணப்பிக்க வேண்டும்.

• ஏற்கனவே விசா உள்ளவர்கள்: ஏற்கனவே செல்லுபடியாகும் விசா வைத்திருப்பவர்கள் அதன் காலாவதித் திகதி வரை அதைப் பயன்படுத்தலாம்; அவர்கள் உடனடியாக eTA முறைக்கு மாற வேண்டிய அவசியமில்லை.

காரணம்:

ஏற்கனவே கனடா அல்லது அமெரிக்க குடிவரவுத் திணைக்களங்களினால் பரிசோதிக்கப்பட்ட ‘அறியப்பட்ட பயணிகள்’ (Known Travellers) என்ற பிரிவின் கீழ் இவர்களுக்கு இந்தச் சலுகை வழங்கப்பட்டுள்ளது. இதன் மூலம் இரு நாடுகளுக்கும் இடையிலான இராஜதந்திர உறவுகள் மற்றும் சுற்றுலாத்துறை மேம்படும் என எதிர்பார்க்கப்படுகிறது.