நாட்டில் போதைப்பொருள் கடத்தலில் ஈடுபடும் நபர்களுக்கு எதிராகப் பாரபட்சமின்றி சிங்கப்பூர் பாணியிலான கடுமையான தண்டனைச் சட்டங்களை (Singapore-style punishments) அரசாங்கம் உடனடியாக நடைமுறைப்படுத்த வேண்டும் என எதிர்க்கட்சித் தலைவர் சஜித் பிரேமதாஸ பாராளுமன்றத்தில் இன்று (ஜூன் 25) வலியுறுத்தியுள்ளார்.
நாடாளுமன்றத்தில் இன்று போதைப்பொருள் ஒழிப்பு விவாதத்தின் போது ஜனாதிபதி அநுர குமார திஸாநாயக்க ஆற்றிய உரைக்குப் பதிலளித்துப் பேசும் போதே எதிர்க்கட்சித் தலைவர் இந்த அதிரடி கோரிக்கையை முன்வைத்தார்.
போதைப்பொருள், நச்சுப் பொருட்கள் மற்றும் பாதாள உலகக் குற்றங்களை நாட்டிலிருந்து முற்றாக ஒழிக்கும் கொள்கையில் ஐக்கிய மக்கள் சக்தி (SJB) மிகவும் உறுதியாக உள்ளது எனத் தெரிவித்த அவர், இவ்வாறான குற்றங்களுடன் தொடர்புடைய எந்தவொரு நபருக்கும் தங்களது அரசியல் முகாமிற்குள் எவ்வித இடமும் இல்லை என்றும் திட்டவட்டமாக அறிவித்தார்.
ஜனாதிபதியின் குற்றச்சாட்டுக்கு மறுப்பு:
போதைப்பொருள் ஒழிப்பு நடவடிக்கைகளுக்கு எதிர்க்கட்சிகள் தடையாக இருப்பதாக ஜனாதிபதி முன்வைத்த குற்றச்சாட்டை முற்றாக நிராகரித்த சஜித் பிரேமதாஸ, போதைப்பொருள் வலையமைப்பை முற்றாக அழிப்பதற்குச் சட்டத்தின் ஆட்சியும் (Rule of law) நீதியும் முறையாக நிலைநாட்டப்பட வேண்டும் என்பதே தங்களது நிலைப்பாடு என்றார்.
நாட்டின் பாடசாலைக் கட்டமைப்பு மற்றும் இளைய தலைமுறையினர் தற்போதைய போதைப்பொருள் பரவலால் கடுமையாகப் பாதிக்கப்பட்டுள்ளதாக அவர் எச்சரித்தார்.
“போதைப்பொருள் கடத்தல்காரர்கள் கைது செய்யப்பட்டு, வரி செலுத்தும் பொதுமக்களின் பணத்தில் சிறைகளில் அடைக்கப்படும் போது, அவர்கள் சிறைக்குள் இருந்துகொண்டே தங்களது போதைப்பொருள் கடத்தல் வலையமைப்பைத் தடையின்றி இயக்குவதற்கு அனுமதிக்கக் கூடாது. இதனைத் தடுக்க வேண்டுமாயின், குற்றவாளிகளை அச்சுறுத்தும் வகையில் சிங்கப்பூரின் கடுமையான தண்டனை முறையை இலங்கை இப்போது அவசரமாக அமல்படுத்த வேண்டும்,” என சஜித் பிரேமதாஸ வலியுறுத்தினார்.
அரச ஆதரவுடன் நடக்கும் குற்றங்களுக்கும் எதிர்ப்பு!
அரச கட்டமைப்பிற்குள் (State) இழைக்கப்படும் எந்தவொரு குற்றமும் தவறானது என்றும், அதனை எதிர்க்கட்சி என்ற ரீதியில் தாம் எப்போதும் கடுமையாக எதிர்ப்போம் என்றும் அவர் சுட்டிக்காட்டினார்.
நாட்டிலிருந்து போதைப்பொருளை முற்றாக ஒழிப்பது என்பது பொதுமக்களின் முதன்மை எதிர்பார்ப்பு மாத்திரமன்றி, அது எதிர்க்கட்சியின் மிக முக்கியமான கோரிக்கையுமாகும் என எதிர்க்கட்சித் தலைவர் சஜித் பிரேமதாஸ தனது உரையில் மேலும் குறிப்பிட்டார்.
