செவ்வாய்க்கிழமை நடைபெறவுள்ள வசந்தகால பொருளாதார மேம்பாட்டு அறிக்கைக்கு (Spring economic update) முன்னதாக, கனடாவின் முதலாவது தேசிய இறையாண்மை நிதியத்தை பிரதமர் மார்க் கார்னி அறிவித்துள்ளார். இதற்கு “கனடா ஸ்ட்ராங் ஃபண்ட்” (Canada Strong Fund) என்று பெயரிடப்பட்டுள்ளது.
திங்கட்கிழமை காலை ஒட்டாவாவில் இந்த அறிவிப்பை உத்தியோகபூர்வமாக வெளியிட்ட பிரதமர், இதற்காக மத்திய அரசு ஆரம்பகட்டமாக 25 பில்லியன் டாலர்களை முதலீடு செய்யும் என்று தெரிவித்தார். “இந்த நிதியமானது சொத்து மறுசுழற்சி மற்றும் மறுமுதலீடு மூலம் வளரும், இது எதிர்கால சந்ததியினருக்கு இன்னும் பெரிய வாய்ப்புகளை உருவாக்கும்” என்று அவர் குறிப்பிட்டார்.
இறையாண்மை நிதியம் என்றால் என்ன? இது அரசாங்கத்தின் உபரி இருப்புகளைப் பயன்படுத்தி பங்குகள் மற்றும் பத்திரங்கள் போன்ற நிதிச் சொத்துக்களில் முதலீடு செய்யும் அரசுக்குச் சொந்தமான ஒரு முதலீட்டு நிதியமாகும். இது அரசாங்கத்தின் தலையீடின்றி சுயாதீனமாக நிர்வகிக்கப்படும். கனடாவின் ஆல்பர்ட்டா மாகாணம் ஏற்கனவே 1976 முதல் இத்தகைய நிதியத்தை (Alberta Heritage Savings Trust Fund) பராமரித்து வருகின்றமை குறிப்பிடத்தக்கது.
முக்கிய அம்சங்கள்:
-
இது ஒரு சுயாதீனமான மகுட நிறுவனமாக (Independent Crown corporation) தொழில்முறை ரீதியாக நிர்வகிக்கப்படும்.
-
ஆல்பர்ட்டா, கியூபெக் அல்லது நாட்டின் வடக்கு பகுதி என எங்கிருந்தாலும் அனைத்துக் கனடியர்களும் இதில் பங்குதாரர்களாக இருப்பார்கள்.
-
கனடா உட்கட்டமைப்பு வங்கி (Infrastructure Bank) கடன்களை வழங்கும் வேளையில், இந்த புதிய நிதியமானது வணிக அடிப்படையில் தனியார் துறையுடன் இணைந்து முதலீடுகளை மேற்கொண்டு லாபத்தை ஈட்டும்.
பற்றாக்குறை குறையும் எனத் தகவல்: நிதியமைச்சர் பிரான்சுவா-பிலிப் ஷாம்பெயின் செவ்வாய்க்கிழமை பொருளாதார அறிக்கையைச் சமர்ப்பிக்க உள்ளார். அரசாங்க வட்டாரங்களின்படி, பணவீக்கம் மற்றும் எண்ணெய் விலை உயர்வு காரணமாக அரசாங்கத்தின் வருவாய் அதிகரித்துள்ளதால், நாட்டின் நிதிப் பற்றாக்குறை (Deficit) முன்னர் கணிக்கப்பட்டதை விட குறைவாக இருக்கும் என்று எதிர்பார்க்கப்படுகிறது.
“நாங்கள் செலவுகளைக் குறைக்க உறுதியாக உள்ளோம். ஒரே நேரத்தில் எல்லாவற்றையும் செய்ய முடியாது. எண்களைச் சரியாகக் கையாள்வதன் மூலம் நிலைமையை மேம்படுத்த முடியும்,” என்று பிரதமர் கார்னி தெரிவித்தார்.
எதிர்க்கட்சியின் நிலைப்பாடு: பற்றாக்குறையை 31 பில்லியன் டாலராகக் குறைக்க வேண்டும் என்றும், நடுத்தர காலத்தில் சமநிலையான பட்ஜெட்டை (Balanced budget) முன்வைக்கத் திட்டமிடுமாறும் கன்சர்வேடிவ் கட்சித் தலைவர் பியர் பொய்லிவ்ரே பிரதமருக்கு திறந்த மடல் ஒன்றை எழுதியுள்ளார்.
