பல தசாப்தங்களுக்கு முன்னர் பல பெண்களைப் பாலியல் துஷ்பிரயோகம் செய்ததாகக் குற்றம் சாட்டப்பட்டிருந்த பில்லியனர் தொழிலதிபரான பிராங்க் ஸ்ட்ரோனாக் (Frank Stronach), பாலியல் துஷ்பிரயோகம் மற்றும் ஆபாசத் தாக்குதல் (Indecent assault) ஆகிய குற்றச்சாட்டுகளில் குற்றவாளி என நீதிமன்றத்தால் தீர்ப்பளிக்கப்பட்டுள்ளது.

93 வயதான ஸ்ட்ரோனாக், ஏழு பெண் புகார்தாரர்களுடன் தொடர்புடைய 12 குற்றச்சாட்டுகளுக்குத் தான் குற்றமற்றவர் எனத் தெரிவித்திருந்தார்.

இந்த வழக்கு விசாரணை கடந்த பிப்ரவரி மாதம் தொடங்கியது. ஏப்ரல் மாதத்தில் இறுதி வாதங்கள் நிறைவடைந்தபோது, அரசுத் தரப்பு வழக்கறிஞர்கள் ஒரு குற்றச்சாட்டைத் வாபஸ் பெற்றுக்கொண்டதுடன், மேலும் நான்கு குற்றச்சாட்டுகளில் ஸ்ட்ரோனாக் குற்றமற்றவர் என்பதை ஏற்றுக்கொண்டனர்.

அதன் பின்னர் வழக்கை விசாரித்த உயர் நீதிமன்ற நீதியரசர் ஆன் மொல்லோய் (Anne Molloy), எஞ்சியிருந்த புகார்தாரர்களில் ஒருவரது சாட்சியம் நம்பகத்தன்மையற்றதாக உள்ளதால், அதன் அடிப்படையில் இந்த தொழிலதிபரைத் தண்டிக்க முடியாது என்று கூறினார்.

இதன் காரணமாக, மூன்று புகார்தாரர்களுடன் தொடர்புடைய ஐந்து குற்றச்சாட்டுகள் மட்டுமே ஸ்ட்ரோனாக் மீது எஞ்சியிருந்தன.

இந்த மூன்று பெண்களில் ஒருவர், ஸ்ட்ரோனாக்கிற்குச் சொந்தமான புகழ்பெற்ற உணவகம் மற்றும் இரவு விடுதி வளாகமான ‘ரூனிஸ்’ (Rooney’s) இல் பணிபுரிந்த முன்னாள் ஊழியராவார்; மற்ற இரு பெண்களும் தாங்கள் முதன்முதலில் அவரை அந்த விடுதியில்தான் சந்தித்ததாகக் குறிப்பிட்டிருந்தனர்.

இன்று நடைபெற்ற தீர்ப்பு விசாரணையின் போது, நீதியரசர் மொல்லோய், இரண்டு புகார்தாரர்கள் தொடர்பான இரண்டு குற்றச்சாட்டுகளில் ஸ்ட்ரோனாக் குற்றவாளி என்று தீர்ப்பளித்தார். அதன்படி, முன்னாள் ஊழியருக்கு எதிரான பாலியல் துஷ்பிரயோகம் மற்றும் 1970களில் ரூனிஸ் விடுதிக்கு அடிக்கடி வந்து சென்ற பெண் ஒருவருக்கு எதிரான ஆபாசத் தாக்குதல் ஆகிய குற்றச்சாட்டுகளில் அவர் குற்றவாளியாகக் காணப்பட்டுள்ளார்.

தான் ரூனிஸ் விடுதி வேலையிலிருந்து நீக்கப்பட்டமை குறித்த விபரங்களைக் கேட்பதற்காக, 1980களின் ஆரம்பத்தில் ஒரு நாள் மாலை ஸ்ட்ரோனாக்கை இரவு உணவிற்குச் சந்திக்கச் சம்மதித்ததாக அந்த முன்னாள் பெண் ஊழியர் சாட்சியமளித்தார்.

உணவகத்தில் இரவு உணவின் போது, ஸ்ட்ரோனாக் ஒரு “தந்தை போன்ற வழிகாட்டியாக” தோன்றியதாகவும், ஆனால் அதற்குப் பிறகு அருகில் இருந்த தனது அடுக்குமாடி குடியிருப்பை (Condo) வந்து பார்க்குமாறு அவர் அழைத்தபோது தனக்கு அசௌகரியமாக இருந்ததாகவும் அந்தப் பெண் கூறினார்.

அங்கு சென்ற உடனேயே தனது இருதயத் துடிப்பு அதிகரித்ததாகக் கூறிய அவர், தான் அங்கிருந்து வெளியேற வேண்டும் என்று பிடிவாதம் பிடித்தபோது, ஸ்ட்ரோனாக் தனது கோட்டை (Coat) அணிவிக்க உதவுவது போலத் தன்னைத் தவறான முறையில் தடவியதாக சாட்சியமளித்தார். அவர் தனது கைகளைத் தனது உடல் முழுவதும் மேலும் கீழுமாக நகர்த்தி, மார்பகங்கள் மற்றும் இடுப்புப் பகுதிகளைத் தொட்டதாக அந்தப் பெண் குறிப்பிட்டார்.

அங்கிருந்து அந்தப் பெண் வெளியேறிய சில நாட்களுக்கு அல்லது வாரங்களுக்குப் பிறகு, 1950களில் ஸ்ட்ரோனாக் நிறுவிய ‘மேக்னா இன்டர்நேஷனல்’ (Magna International) நிறுவனத்தில் வேலை நேர்காணல் ஒன்றில் கலந்துகொள்ளுமாறு அவருக்கு அழைப்பு வந்துள்ளது. அவர் அந்த நிறுவனத்தில் பல ஆண்டுகள் பணிபுரிந்த போதிலும், ஸ்ட்ரோனாக்குடன் நேரடியாக இணைந்து பணியாற்றவில்லை என்று கூறினார்.

ஸ்ட்ரோனாக் ஆபாசத் தாக்குதல் நடத்தியதாகத் தீர்ப்பளிக்கப்பட்ட வழக்கின் மற்றொரு பெண் சாட்சியமளிக்கும் போது, தான் ரூனிஸ் விடுதிக்கு அடிக்கடி செல்பவர் என்றும், அங்கு அவரைப் பலமுறை பார்த்துள்ளதாகவும் கூறினார். 1977 ஆம் ஆண்டின் ஒரு இரவில், அவர்கள் அந்த உணவகத்தில் நண்டு (Lobster) உணவு சாப்பிட்ட பின்னர், ஸ்ட்ரோனாக் தனது அடுக்குமாடி குடியிருப்பை வந்து பார்க்குமாறு அழைத்ததாகக் குறிப்பிட்டார்.

அடுக்குமாடி குடியிருப்புக்குள் சென்றதும், ஸ்ட்ரோனாக் சில நிமிடங்கள் மறைந்துவிட்டதாகவும், பின்னர் அவர் தன்னை ஒரு சோபா நாற்காலியின் (Armchair) கைப் பிடிக்கு மேல் தள்ளியதை உணர்ந்ததாகவும் அந்தப் பெண் கூறினார். ஸ்ட்ரோனாக் தனது பாவாடையை (Skirt) மேலே தூக்கியதாகவும், அவர் தனது உள்ளாடைக்கு மேல் தனது பிறப்புறுப்பை வைத்து அழுத்த முயன்றதை உணர முடிந்ததாகவும் அவர் தெரிவித்தார்.

இறுதியில் தான் எழுந்து நின்று அவரிடமிருந்து விடுபட்டதாகவும், பின்னர் தனது கோட் மற்றும் கைப்பையை எடுத்துக்கொண்டு அங்கிருந்து வெளியேறியதாகவும் அந்தப் பெண் கூறினார். அந்த நேரத்தில் அவர்கள் இருவரும் எதுவும் பேசிக்கொண்டதாகத் தனக்கு நினைவில்லை என்றும் அவர் குறிப்பிட்டார்.

மூன்றாவது புகார்தாரர் தொடர்பான குற்றச்சாட்டுகளில் பல தெளிவற்ற தன்மைகள் இருந்ததால், ஸ்ட்ரோனாக்கை அதில் குற்றவாளியாக அறிவிக்க முடியாது என்று நீதியரசர் மொல்லோய் தீர்மானித்தார்.

இந்த வழக்கின் தண்டனை விபரங்களை அறிவிப்பதற்கான விசாரணை வரும் செப்டம்பர் 17 ஆம் தேதிக்கு ஒத்திவைக்கப்பட்டுள்ளது.

இது தவிர, ஒன்டாரியோவின் நியூமார்க்கெட் (Newmarket) பகுதியில் ஸ்ட்ரோனாக் இதே போன்ற குற்றச்சாட்டுகளின் கீழ் மற்றொரு தனித்துவமான வழக்கு விசாரணையையும் எதிர்கொண்டுள்ளார். அந்த வழக்கு விசாரணை அடுத்த ஆண்டு மே மாதம் நடைபெறவுள்ளது.