அம்பாறை மாவட்டம், அக்கரைப்பற்று பொலிஸ் பிரிவுக்குட்பட்ட பனங்காடு பாலத்திற்கு அருகில் உள்ள ஆற்றில் இருந்து மீட்கப்பட்ட சடலம் தற்போது அடையாளம் காணப்பட்டுள்ளது.
சடலமாக மீட்கப்பட்டவர் அக்கரைப்பற்றைப் பிறப்பிடமாகவும், கோளாவில்-02 பகுதியை வசிப்பிடமாகவும் கொண்ட 51 வயதுடைய சாமித்தம்பி திவ்வியராஜ் என அடையாளம் காணப்பட்டுள்ளார்.
அக்கரைப்பற்று பொலிஸாரினால் கடந்த புதன்கிழமை (18) மீட்கப்பட்ட இந்தச் சடலம் தொடர்பாக, அவரைத் தேடிவந்த குடும்பத்தினர் ஊடகங்கள் வாயிலாகத் தகவலறிந்து நேரில் சென்று அடையாளம் காட்டியுள்ளனர். உயிரிழந்தவரின் மனைவி ஒரு மாதத்திற்கு முன்னரே காலமான நிலையில், அவர் தனது உறவினர்களின் வீட்டில் தங்கி வாழ்ந்து வந்தமை குறிப்பிடத்தக்கது.
சம்பவ இடத்திற்கு விரைந்த அக்கரைப்பற்று பொலிஸ் நிலையப் பொறுப்பதிகாரி மற்றும் மரண விசாரணை அதிகாரி ஆகியோர் சடலத்தைப் பார்வையிட்டனர். அம்பாறை தடயவியல் பொலிஸாரும் மேலதிக விசாரணைகளை முன்னெடுத்தனர்.
இதனைத் தொடர்ந்து, சடலம் அக்கரைப்பற்று ஆதார வைத்தியசாலைக்குக் கொண்டு செல்லப்பட்டு பிரேத பரிசோதனைகள் நிறைவுற்றன. பின்னர், நல்லடக்கத்திற்காக புதன்கிழமை (18) அன்று உறவினர்களிடம் சடலம் ஒப்படைக்கப்பட்டது.
முன்னைய செய்திப் பின்னணி
முன்னதாக, பனங்காடு பாலத்திற்கு அருகில் உள்ள ஆற்றில் ஆணின் சடலமொன்று மிதப்பதைக் கண்ட மீனவர்கள் வழங்கிய தகவலின் அடிப்படையில் பொலிஸார் விசாரணைகளை ஆரம்பித்தனர்.
சுமார் 5 அடி 6 அங்குலம் உயரமும், 45 முதல் 50 வயது மதிக்கத்தக்கதுமான அந்தச் சடலம் ஓரளவு சிதைந்த நிலையில் காணப்பட்டது. இது கொலையா, தற்கொலையா அல்லது முதலையின் தாக்குதலா என்ற கோணத்தில் அக்கரைப்பற்று பொலிஸார் விசாரணைகளை முன்னெடுத்திருந்தனர். ஆரம்பத்தில் காணாமல் போனவர்கள் தொடர்பான புகார்கள் ஏதும் கிடைக்காத நிலையில், பொலிஸார் பொதுமக்களின் உதவியை நாடியிருந்தனர் என்பது குறிப்பிடத்தக்கது.
