2026 தமிழக சட்டமன்றத் தேர்தலை ஒட்டி அரசியல் கட்சிகள் இலவசங்களை வாரி வழங்கும் வகையில் அறிவிப்புகளை வெளியிட்டு வருகின்றன. இந்நிலையில் நடிகை வினோதினி தனது சமூக வலைதளப் பக்கத்தில் பகிர்ந்துள்ள பதிவு கவனம் பெற்றிருக்கிறது.
நடிகை வினோதினி வைத்தியநாதன் தனது சமூக வலைதளப் பக்கத்தில் அரசியல் கட்சிகளின் இலவசங்கள் குறித்து வெளியிட்டுள்ள பதிவு பேசுபொருளாக மாறியிருக்கிறது. அதில், 1,000 ரூபாய், 2,000 ரூபாய், 2,500 ரூபாய், தங்க மோதிரம் என்று நீங்கள் எதை வேண்டுமானாலும் கொடுங்கள். ஆனால் இதற்காக என்னால் வரி செலுத்த முடியாது என்று தடாலடியாக குறிப்பிட்டிருக்கிறார். தற்போது மு.க.ஸ்டாலின் தலைமையிலான திமுக அரசு மகளிர் உரிமைத் தொகை என்ற பெயரில் தகுதி வாய்ந்த மகளிருக்கு மாதந்தோறும் 1,000 ரூபாய் வழங்கி வருகிறது.
அதிமுக தரப்பில் அளிக்கப்பட்டுள்ள தேர்தல் வாக்குறுதியில் குல விளக்கு திட்டம் என்ற பெயரில் 2,000 ரூபாய் வழங்க நடவடிக்கை எடுக்கப்படும் என்றும், தவெகவின் தேர்தல் வாக்குறுதியில் மதிப்புமிகு மகளிர் திட்டத்தின் கீழ் மாதந்தோறும் 2,500 ரூபாய் வழங்கப்படும் என்றும் அறிவித்துள்ளன. அதுமட்டுமின்றி தாய் மாமன் தங்க மோதிரம் திட்டத்தின் கீழ் புதிதாக பிறக்கும் குழந்தைகளுக்கு ஒரு தங்க மோதிரம் வழங்கப்படும் என்று தவெக சார்பில் அறிவிக்கப்பட்டுள்ளன. இதைத் தான் வினோதினி சுட்டிக் காட்டியிருக்கிறார்.
தமிழகம் போன்ற வளர்ச்சியை நோக்கி நகரும் மாநிலங்களில் கடன் சுமை என்பது பெரிதாக உள்ளது. இதனால் தனி நபர் மீதான சுமையை அதிகரிக்க வேண்டிய சிக்கல் ஏற்பட்டுள்ளது. அதாவது, விலைவாசி உயர்வில் கொண்டு போய் நிறுத்தும் நிலைக்கு தள்ளப்படுகிறோம். இப்படியான சூழலில் மேலும் இலவச அறிவிப்புகளை வெளியிடுவது கடன் சுமையை தாங்க முடியாத அளவிற்கு ஏற்றிவிடும் என்பது பொருளாதார வல்லுநர்களின் கருத்தாக இருக்கிறது. எனவே இந்த நெருக்கடியை சமாளிக்கும் வகையிலான தொலைநோக்கு திட்டங்கள் உடன் அரசியல் கட்சிகள், குறிப்பாக ஆளும் கட்சி காய் நகர்த்த வேண்டியுள்ளது.
