கொழும்பு கோட்டை பகுதியில் அமைந்துள்ள நகர்ப்புற மேம்பாட்டு அதிகாரசபைக்குச் (UDA) சொந்தமான நிலத்தை ‘கிரிஷ் டிரான்ஸ்வொர்க்ஸ் கொழும்பு’ (Krish Transworks Colombo) நிறுவனத்திற்கு குத்தகைக்கு விடுவதற்கு வசதியாக, நிமல் பெரேரா என்பவர் மூலமாக நாமல் ராஜபக்ஷ ரூ. 70 மில்லியன் பணத்தைப் பெற்றதாகக் கூறப்படும் வழக்கு தொடர்பாக இலஞ்ச ஊழல் விசாரணை ஆணைக்குழு (CIABOC) கொழும்பு தலைமை நீதிவான் நீதிமன்றத்தில் தகவல்களைச் சமர்ப்பித்துள்ளது.
இலஞ்ச ஊழல் விசாரணை ஆணைக்குழுவின் உதவிச் சட்டப் பணிப்பாளர் அம விஜேசிங்க நீதிமன்றத்தில் தெரிவிக்கையில், கிரிஷ் கட்டுமானத் திட்டத்தில் சட்டவிரோத நிதிகள் பயன்படுத்தப்பட்டுள்ளதாக இந்திய அதிகாரிகளிடமிருந்து பரஸ்பர சட்ட உதவித் தொடர்பாடல் (Mutual legal assistance communication) கிடைத்துள்ளதாகக் கூறினார். குற்றப்புலனாய்வுத் துறையினரால் (CID) மேற்கொள்ளப்பட்டு வரும் கூட்டு விசாரணையின் ஒரு பகுதியாக இந்தத் தகவல் பெறப்பட்டுள்ளது.
மேலும், இத்திட்டத்திற்கான அரசாங்க அனுமதிகளைச் சம்பந்தப்பட்ட அரசு நிறுவனங்கள் வழக்கத்திற்கு மாறாக மிக விரைவாகச் செயல்முறைப்படுத்தியுள்ளதை புலனாய்வாளர்கள் கண்டறிந்துள்ளதாகவும் அவர் சுட்டிக்காட்டினார்.
நாமல் ராஜபக்ஷவிற்கு எதிரான இந்த வழக்கு விசாரணைக்கு எடுத்துக்கொள்ளப்பட்ட போதே இக்கற்றச்சாட்டுகள் முன்வைக்கப்பட்டன. இதன்போது, நாமல் ராஜபக்ஷவின் சட்டத்தரணி, முந்தைய இலஞ்சச் சட்டத்தின் கீழ் குற்றச்சாட்டுகள் சுமத்தப்பட்டுள்ள நிலையில், புதிய ஊழல் எதிர்ப்புச் சட்டத்தின் கீழ் தாக்கல் செய்யப்பட்ட சான்றிதழின் செல்லுபடியாகும் தன்மையைச் சவால் செய்தார்.
இதனைத் தொடர்ந்து, அடுத்த கட்ட விசாரணையின் போது பிணை மனுவைத் தாக்கல் செய்யுமாறு உத்தரவிட்ட நீதிமன்றம், நாமல் ராஜபக்ஷவை அக்டோபர் 13 ஆம் திகதி வரை விளக்கமறியலில் வைக்குமாறு உத்தரவிட்டது.
