கனடா தலைநகர் ஒட்டாவாவில் உள்ள தனது லேப்டாப் மற்றும் மொபைல் பழுதுபார்க்கும் கடைகளில் அடுத்தடுத்து 5 முறை அரங்கேறிய கொள்ளைச் சம்பவங்களால், சுமார் 1,500,000 டாலர் நஷ்டம் ஏற்பட்டுள்ளதாக இந்திய வம்சாவளி சிறுதொழில் அதிபர் அவின் போர்வால் (Avein Porwal) வேதனை தெரிவித்துள்ளார். மேலும், இந்த அவசரச் சூழலில் ஒட்டாவா காவல்துறையினர் நேரில் வரப் பல மணி நேரம் தாமதப்படுத்தியதாகக் கூறி அவர்களின் பாதுகாப்பு நடவடிக்கை குறித்தும் அவர் கேள்வி எழுப்பியுள்ளார்.

சில நிமிடங்களில் சூறையாடப்பட்ட கடைகள்

ஒட்டாவாவின் வேனியர் (Vanier) மற்றும் பார்ஹேவன் (Barrhaven) ஆகிய பகுதிகளில் அவின் போர்வால் ‘கீக்ஸ் நோ திஸ்’ (Geeks Know This) என்ற பெயரில் மின்னணு சாதனங்கள் பழுதுபார்க்கும் கடைகளை நடத்தி வருகிறார். கடந்த திங்கள்கிழமை அதிகாலை 2 மணி அளவில், வேனியர் கிளையின் கதவு மற்றும் கண்ணாடிகளை உடைத்து உள்ளே புகுந்த கொள்ளையர்கள், அலாரம் ஒலித்த போதிலும் சில நிமிடங்களிலேயே கடையில் இருந்த ஸ்பீக்கர்கள், சவுண்ட் சிஸ்டம்கள், ஏர்பாட்கள் (AirPods) மற்றும் மானிட்டர்களை கொள்ளையடித்துச் சென்றுள்ளனர்.

கடந்த சில மாதங்களில் மட்டும் இவரது கடைகளில் 2 முறை வெற்றிகரமான கொள்ளையும், 3 முறை அதற்கான முயற்சிகளும் என மொத்தம் 5 முறை இச்சம்பவங்கள் அரங்கேறியுள்ளன.

காவல்துறையின் அதிர்ச்சியளிக்கும் பதில்

திங்கள்கிழமை காலை 7:15 மணிக்குக் கொள்ளைச் சம்பவம் குறித்துப் புகாரளித்த போது, ஒட்டாவா காவல்துறை தரப்பில் தங்களுக்குக் கிடைத்த பதில் அதிர்ச்சியளிப்பதாக அவின் போர்வால் கூறியுள்ளார்:

“நாங்கள் காலையிலேயே புகாரளித்தோம். ஆனால், கொள்ளைச் சம்பவங்களை விசாரிக்கும் பிரத்யேகக் குழுவினர் (Break-in teams) காலை 8:30 மணிக்குத்தான் பணிக்கு வருவார்கள் என்றும், அதற்குப் பிறகு அழைக்குமாறும் போலீசார் கூறினர். ஒரு சம்பவம் நடந்த பிறகு காவல்துறை நேரில் வர 24 மணி நேரத்திற்கும் மேலாகிறது என்றால், இவ்வளவு பெரிய நகரின் பாதுகாப்பை எப்படி நம்புவது?”

காவல்துறையின் விளக்கம்

இது குறித்து ஒட்டாவா காவல்துறை விடுத்துள்ள அறிக்கையில், பார்ஹேவன் பகுதியில் நடந்த கொள்ளைச் சம்பவம் தொடர்பாக இருவர் கைது செய்யப்பட்டு அவர்கள் மீது வழக்குப் பதிவு செய்யப்பட்டுள்ளதாகக் கூறப்பட்டுள்ளது. மேலும், வேனியர் பகுதியில் நடந்த அண்மைக்கால கொள்ளை குறித்துத் தீவிர விசாரணை நடந்து வருவதாகவும், நகரின் மற்ற அவசர அழைப்புகளின் முன்னுரிமையைப் பொறுத்தே சம்பவ இடத்திற்கு வரும் நேரம் மாறுபடுவதாகவும் போலீசார் தற்காப்பு வாதம் செய்துள்ளனர்.

சிறுதொழில்களின் வாழ்வாதாரக் கேள்வி

இந்தத் தொடர் இழப்புகள் காரணமாக புதிய பொருட்கள் வாங்குவது, உடைந்த கண்ணாடிகளை மாற்றுவது, கூடுதல் பாதுகாப்பு உபகரணங்களைப் பொருத்துவது என அவின் போர்வால் பெரும் பொருளாதார நெருக்கடியைச் சந்தித்துள்ளார். காப்பீட்டுத் தொகை (Insurance) கைக்கு வர இன்னும் பல மாதங்கள் ஆகும் என்பதால், கடையைத் தொடர்ந்து நடத்தத் தன் கைக்காசை முதலீடு செய்ய வேண்டிய நிலைக்குத் தள்ளப்பட்டுள்ளார்.

“இன்னும் 5 முதல் 6 ஆண்டுகளுக்கு இந்த இடத்திற்கான குத்தகை (Lease) ஒப்பந்தம் உள்ளதால் என்னால் இப்போதைக்குக் கடையை மூட முடியாது. இந்த ஒப்பந்தம் முடிந்ததும் ஒட்டாவாவை விட்டே வேறு நகரத்திற்குச் சென்றுவிடுவேன்” என்று விரக்தியுடன் கூறும் போர்வால், “காவல்துறை இப்போதே இதற்கு முற்றுப்புள்ளி வைக்காவிட்டால், சிறுதொழில்கள் எதுவும் இங்கு உயிர்வாழ முடியாது” என்றும் எச்சரித்துள்ளார்.

இதே வணிக வளாகத்தில் உள்ள மேலும் இரு கடை உரிமையாளர்களும் கடந்த ஓராண்டில் தங்கள் கடைகளிலும் கொள்ளைச் சம்பவங்கள் நடந்துள்ளதாகக் காவல்துறையின் மீது அதிருப்தி தெரிவித்துள்ளனர்.