நாமக்கல்
யாசகம் பெற்றுச் சேமித்த பத்தாயிரம் ரூபாயை முதலமைச்சரின் பொது நிவாரண நிதிக்காக நாமக்கல் மாவட்ட ஆட்சியரிடம் முதியவர் ஒருவர் வழங்கிய சம்பவம் பெரும் நெகிழ்ச்சியை ஏற்படுத்தியுள்ளது.
முதலமைச்சர் நிதிக்குத் தொடர் நன்கொடை:
தூத்துக்குடி மாவட்டம் சாத்தான்குளம் அருகேயுள்ள ஆலங்கிணறு கிராமத்தைச் சேர்ந்தவர் 75 வயதான முதியவர் பூல்பாண்டியன். இவர் பல்வேறு இடங்களில் யாசகம் பெற்று, அதன் மூலம் கிடைக்கும் பணத்தைத் தனது சொந்தத் தேவைக்குப் பயன்படுத்தாமல் அரசுப் பள்ளிகளின் மேம்பாட்டிற்கும், முதலமைச்சர் நிவாரண நிதிக்கும் தொடர்ந்து வழங்கி வருவதை வழக்கமாகக் கொண்டுள்ளார்.
நாமக்கல் ஆட்சியரிடம் ரூ.10,000 நிதியுதவி:
இதன் தொடர்ச்சியாக, நேற்று நாமக்கல் மாவட்ட ஆட்சியர் அலுவலகத்திற்கு நேரில் வருகை தந்த முதியவர் பூல்பாண்டியன், தான் யாசகம் பெற்றுச் சேமித்த தொகையான ரூ. 10,000-த்தை முதலமைச்சரின் பொது நிவாரண நிதிக்காக நாமக்கல் மாவட்ட ஆட்சியர் மதுபாலனிடம் நெகிழ்ச்சியுடன் வழங்கினார்.
ஒப்புகைச் சான்றிதழ் வழங்கிப் பாராட்டு:
முதியவரின் இந்தத் தன்னலமற்ற நற்செயலைப் போற்றும் விதமாக, மாவட்ட வருவாய் அலுவலர் சரவணன் அவர்கள், முதலமைச்சர் பொது நிவாரண நிதிக்குப் பணம் வழங்கியதற்கான அதிகாரப்பூர்வ ஒப்புகைச் சான்றிதழைப் பூல்பாண்டியனிடம் வழங்கினார். தன்னிடம் ஏதும் இல்லாத நிலையிலும், தான் யாசகம் பெற்ற தொகையை அரசுக்கு நிதியுதவியாக அளித்த இந்த முதியவரின் செயல் சமூக வலைத்தளங்களில் பலரது பாராட்டுகளையும் பெற்று வருகிறது.
#Poolpandian #Humanity #CMReliefFund #NamakkalCollector #ThoothukudiNews #NamakkalNews #TamilNaduNews #InspirationalNews #ViralNewsTN #TrendingTN #LatestNewsTN #TNNewsUpdates
