லூசி மெக்கர்னன்

இயக்குநர், ஐ.நா மனித உரிமைகள் பேரவை-சர்வதேச மனித உரிமை கண்காணிப்பகம்

இலங்கை உள்நாட்டுப் போர் முடிவடைந்து பதினேழு ஆண்டுகள் நிறைவடைந்துள்ள நிலையில், நாட்டின் தற்போதைய மனித உரிமை நிலைமைகள் குறித்த புதிய அறிக்கையை ஐக்கிய நாடுகள் மனித உரிமைகள் உயர்ஸ்தானிகர் வோல்கர் டர்க் வெளியிட்டுள்ளார்.

கடந்த காலத்தில் இடம்பெற்ற மனித உரிமை மீறல்களுக்கு நீதி வழங்கப்படும் என்ற வாக்குறுதியுடன், அதிபர் அனுர குமார திசாநாயக்கவின் அரசாங்கம் 2024 செப்டம்பரில் ஆட்சியைப் பிடித்தது. இருப்பினும், உயர்ஸ்தானிகரின் செப்டம்பர் 3 ஆம் திகதியறிக்கையில் குறிப்பிட்டுள்ளபடி, சில முக்கியமான வழக்குகளின் முன்னேற்றத்திற்கு அப்பால், 2009 இல் முடிவுக்கு வந்த தமிழ்ப் ஈழ விடுதலைப் புலிகளுடனான போரின் போது “அனைத்துத் தரப்பினராலும் இழைக்கப்பட்ட சர்வதேசச் சட்டத்தின் கீழான குற்றங்கள், பாரிய மனித உரிமை மீறல்கள் மற்றும் சர்வதேச மனிதநேயச் சட்டத்தின் தீவிர மீறல்களுக்கு எந்தவொரு அங்கீகாரமோ அல்லது பொறுப்புக்கூறலோ இருக்கவில்லை” எனக் குறிப்பிடப்பட்டுள்ளது.

மனித உரிமைகள் கண்காணிப்பகம் (Human Rights Watch) தனது செப்டம்பர் 1 ஆம் திகதியறிக்கையில் இதுபோன்ற கவலைகளை எழுப்பியுள்ளது. சில அடையாளப்பூர்வமான வழக்குகளில் மட்டுமே குறைந்த அளவிலான முன்னேற்றம் இருப்பதாகவும், ஆனால் வலிந்து காணாமலாக்கப்பட்டமை, நிவாரணப் பணியாளர்கள் படுகொலை மற்றும் ஊடகவியலாளர்களை இலக்கு வைத்தல் தொடர்பான வழக்குகளில் எந்தப் நகர்வும் இல்லை என்றும் அது ஆவணப்படுத்தியுள்ளது. ஒரு சுயாதீன அரச வழக்கறிஞர் அலுவலகத்தை அமைப்பதாக அளித்த வாக்குறுதியையோ, அல்லது பொறுப்புக்கூறலுக்குத் தேவையான சட்ட மற்றும் கட்டமைப்பு சீர்திருத்தங்களை மேற்கொள்வதையோ அரசாங்கம் செய்யத் தவறிவிட்டது. மேலும், பாரிய உரிமை மீறல்கள் தொடர்பான சான்றுகளைச் சேகரிப்பதற்காக ஐ.நா மனித உரிமைகள் பேரவையினால் உருவாக்கப்பட்ட ‘இலங்கை பொறுப்புக்கூறல் திட்டத்தை’ (Sri Lanka Accountability Project) திசாநாயக்க அரசாங்கம் ஏற்றுக்கொள்ளவில்லை.

மனித உரிமைப் போராளிகள், ஊடகவியலாளர்கள் மற்றும் பாதிக்கப்பட்டவர்களின் குடும்பங்களை அச்சுறுத்தவும் கைது செய்யவும் இலங்கை அரசாங்கம் இன்னமும் அடக்குமுறை பயங்கரவாதத் தடைச் சட்டத்தையே (PTA) பயன்படுத்தி வருகிறது. இவர்கள் குறிப்பாக இலங்கையின் வடக்கு மற்றும் கிழக்குப் பகுதிகளில் அரச உளவுத்துறை அமைப்புகளின் கண்காணிப்பிற்கும் விசாரணைக்கும் உள்ளாகின்றனர். இச்சட்டம் ரத்து செய்யப்படும் வரை அதைப் பயன்படுத்துவதற்கு இடைக்காலத் தடை விதிக்க வேண்டும் என்றும், இதன் கீழ் நீண்டகாலமாக தடுப்பில் வைக்கப்பட்டுள்ளவர்களை விடுவிக்க வேண்டும் என்றும் உயர்ஸ்தானிகரின் அறிக்கை அரசாங்கத்தைக் கேட்டுக்கொள்கிறது.

நீண்டகாலமாக நிலுவையில் உள்ள சட்ட மற்றும் கட்டமைப்பு சீர்திருத்தங்களை இலங்கை அரசாங்கம் உடனடியாக நடைமுறைப்படுத்த வேண்டும், அடக்குமுறைச் சட்டங்களை ரத்து செய்ய வேண்டும், விரிவான பாதுகாப்புத் துறை சீர்திருத்தங்களை மேற்கொள்ள வேண்டும், மற்றும் உண்மையான நல்லிணக்கத்தை நோக்கிய நடவடிக்கைகளை எடுக்க வேண்டும்; இல்லையெனில் குற்றமிழைத்தோருக்கு தண்டனையிலிருந்து விலக்கு அளிக்கும் போக்கையும், பாதிக்கப்பட்டவர்களிடையேயான நம்பிக்கை பற்றாக்குறையையும் இது மேலும் தீவிரமாக்கும் அபாயத்தைக் கொண்டுள்ளது.

சர்வதேசக் குற்றங்களுக்கான பொறுப்புக்கூறல் குறித்து இலங்கை அரசாங்கத்தின் முன்னேற்றத்தை ஐ.நா மனித உரிமைகள் உயர்ஸ்தானிகர் அலுவலகம் தொடர்ந்து கண்காணிக்க வேண்டும். ஐ.நா மனித உரிமைகள் பேரவையின் உறுப்பினர் நாடுகளும் பிற நாடுகளும், உண்மை மற்றும் நீதியை உறுதி செய்வதற்கான வாக்குறுதிகளை நிறைவேற்றுமாறு திசாநாயக்க அரசாங்கத்திற்கு அழுத்தம் கொடுக்க வேண்டும். இரண்டு தசாப்தங்கள் கடந்த பின்னரும், பாதிக்கப்பட்டவர்களின் குடும்பங்கள் இன்னமும் நீதிக்காகக் காத்திருக்கின்றன.