மூன்று ஆண்டுகளுக்கு முன்பு பிராம்ப்டனில் உள்ள ஒரு வீட்டில் ஏற்பட்ட தீ விபத்தில், கர்ப்பிணிப் பெண் மற்றும் அவரது மூன்று வயதுப் பெண் குழந்தை உயிரிழந்த சம்பவம் தொடர்பில் சொத்தின் உரிமையாளர் குற்றவாளியாகத் தீர்க்கப்பட்டுள்ளார்.
2023 ஆம் ஆண்டு ஜூன் 2 ஆம் திகதி இரவு 11 மணியளவில் ஜேட் கிரசண்ட் (47 Jade Cres.) பகுதியில் அமைந்துள்ள வீட்டில் இந்தத் தீ விபத்து ஏற்பட்டது. விபத்து நடந்த இடத்திற்கு வந்த மீட்புக் குழுவினர், தீக்காயங்களுடன் வீட்டின் வெளியே ஒருவரைக் கண்டெடுத்ததுடன், வீட்டிற்குள் இருந்த மேலும் இருவரைக் காப்பாற்றினர்.
உயிரிழந்த கர்ப்பிணிப் பெண் சம்பவ இடத்திலேயே உயிரிழந்ததாக அறிவிக்கப்பட்ட நிலையில், அவரது குழந்தை சில நாட்களுக்குப் பிறகு மருத்துவமனையில் உயிரிழந்ததாக பிராம்ப்டன் தீயணைப்பு சேவைகள் தெரிவித்தன.
பாதிக்கப்பட்ட மூன்று நபர்களும் அந்த வீட்டின் அடித்தளத்தில் (basement) வசித்து வந்தனர் என்பதை அதிகாரிகள் உறுதிப்படுத்தினர்.
பிராம்ப்டன் மாநகராட்சியின் கூற்றுப்படி, இரண்டு குடியிருப்புகளை மட்டுமே கொண்டிருக்கப் பதிவு செய்யப்பட்டிருந்த 47 ஜேட் கிரசண்ட் சொத்து, உரிய அனுமதியின்றி நான்கு குடியிருப்புகளாக மாற்றப்பட்டிருந்ததை தீயணைப்புப் புலனாய்வாளர்கள் கண்டறிந்தனர்.
ஒன்டாரியோ கட்டிட விதிமுறைகள் மற்றும் தீயணைப்பு விதிமுறைகளின் கீழான தேவைகளைப் பூர்த்தி செய்யாமல் அந்த அலகுகள் வாடகைக்கு விடப்பட்டிருந்தன என்று மாநகராட்சி தெரிவித்துள்ளது.
இதன் விளைவாக, தீத் தடுப்பு மற்றும் பராமரிப்புச் சட்டத்தின் (Fire Protection and Prevention Act) கீழ், புகை மற்றும் கார்பன் மொனொக்சைட் எச்சரிக்கை கருவிகளைப் பொருத்துதல் மற்றும் பராமரித்தல் தொடர்பில் உரிமையாளருக்கு எதிராக பிராம்ப்டன் தீயணைப்பு மற்றும் அவசர சேவைகள் பிரிவினால் ஏழு குற்றச்சாட்டுகள் சுமத்தப்பட்டன.
அந்த வீட்டின் முதலாவது தளத்திலும் அடித்தளத்திலும் இயங்கும் நிலையில் புகை எச்சரிக்கை கருவிகள் (smoke alarms) இருக்கவில்லை என்று அதிகாரிகள் முன்னரே தெரிவித்திருந்தனர்.
சொத்தின் உரிமையாளருக்கு 135 நாட்கள் தொடர்ச்சியான சிறைத்தண்டனை மற்றும் இரண்டு ஆண்டுகள் நன்னடத்தைக் கண்காணிப்பும் (probation) விதிக்கப்பட்டுள்ளதாக பிராம்ப்டன் மாநகராட்சி செவ்வாய்க்கிழமை வெளியிட்ட செய்திக் குறிப்பில் தெரிவித்துள்ளது. மேலும் இதே போன்ற அல்லது தொடர்புடைய குற்றங்களை மீண்டும் செய்யக்கூடாது என்ற நிபந்தனையும் இதில் அடங்கும்.
அத்துடன், உரிமையாளருக்கு 50,000 டொலர் அபராதமும், 10,000 டொலர் பாதிக்கப்பட்டவர்களுக்கான கூடுதல் கட்டணமும் (victim surcharges) செலுத்துமாறு உத்தரவிடப்பட்டது.
பிராம்ப்டன் மேயர் பேட்ரிக் பிரவுன் (Patrick Brown) வெளியிட்ட அறிக்கையில், “வாடகைக்குக் குடியிருப்பாளர்களின் உயிரைப் ஆபத்தில் தள்ளும் பொறுப்பற்ற நில உரிமையாளர்களை (slumlords) நகரம் பொறுத்துக் கொள்ளாது” என்று தெரிவித்துள்ளார்.
“இந்தத் தண்டனை ஒரு தாயையும் அவரது இளம் மகளையும் மீட்டுத் தர முடியாது. மற்றொரு குடும்ப உறுப்பினருக்கு ஏற்பட்ட வாழ்நாள் காயங்களை மாற்றியமைக்க முடியாது. எதராலும் முடியாது. ஆனால் பொறுப்புக்கூறல் மிகவும் முக்கியமானது,” என்று பிரவுன் கூறினார்.
“பிராம்ப்டனில் உள்ள ஒவ்வொரு நில உரிமையாளருக்கும் சொத்து உரிமையாளருக்கும் நான் ஒரு நேரடிச் செய்தியைத் தெரிவிக்கிறேன்: உங்களுக்குச் சொந்தமான வாடகைச் சொத்து இருந்தால், அங்கு வாழும் மக்களுக்கு நீங்கள் பொறுப்பானவர்கள். அவ்வளவுதான்.”
