முல்லைத்தீவு – துணுக்காய் கல்வி வலயத்திற்குட்பட்ட கோட்டைகட்டியகுளம் மகாவித்தியாலயத்திற்கு வன்னி மாவட்ட பாராளுமன்ற உறுப்பினர் துரைராசா ரவிகரன் நேரடியாக சென்று, அங்கு நிலவும் குறைபாடுகள் குறித்து ஆராய்ந்துள்ளார்.
பாடசாலையின் அதிபர், ஆசிரியர்கள் மற்றும் மாணவர்களுடன் கலந்துரையாடிய அவர், கற்றல் – கற்பித்தல் செயற்பாடுகளில் எதிர்கொள்ளும் சவால்கள் மற்றும் நீண்டகாலத் தேவைகள் குறித்துக் கேட்டறிந்துகொண்டார்.
இந்தச் சந்திப்பின் போது, பாடசாலையின் உட்கட்டமைப்பு மற்றும் கல்விச் செயல்பாடுகள் சார்ந்த பின்வரும் குறைபாடுகள் நாடாளுமன்ற உறுப்பினரின் கவனத்திற்குக் கொண்டுவரப்பட்டன:
ஆசிரியர் பற்றாக்குறை: பாடசாலையில் நிலவும் பாரிய ஆசிரியர் பற்றாக்குறையை நிவர்த்தி செய்யுமாறு கோரிக்கை விடுக்கப்பட்டது.
உட்கட்டமைப்பு வசதிகள்: பாடசாலை வளாகத்திலுள்ள பாதுகாப்பற்ற பழைய கட்டடங்களை அகற்றுதல், பாடசாலைக்கான பாதுகாப்பு வேலி அமைத்தல் மற்றும் மிதிவண்டித் தரிப்பிடம் (Cycle Shed) அமைத்தல்.
புதிய கட்டடத் தேவை: மேலதிகமாக 8 வகுப்பறைகளைக் கொண்ட கட்டடங்களின் அவசியம் வலியுறுத்தப்பட்டது.
சுகாதார வசதிகள்: மாணவர்களுக்கான முறையான மலசலகூட வசதிகளை ஏற்படுத்திக் கொடுத்தல்.
ஏனைய தேவைகள்: போக்குவரத்துச் சீரின்மை, விளையாட்டு உபகரணங்களின் தேவை மற்றும் வகுப்பறைகளுக்கான தளபாடப் பற்றாக்குறை.
குறைபாடுகள் மற்றும் கோரிக்கைகளை விரிவாகக் கேட்டறிந்துகொண்ட நாடாளுமன்ற உறுப்பினர் ரவிகரன், இவை தொடர்பாக உரிய அதிகாரிகளின் கவனத்திற்குக் கொண்டு சென்று, தீர்வுகளைப் பெற்றுத்தரத் தன்னால் முடிந்த நடவடிக்கைகளை எடுப்பதாக உறுதியளித்தார்.
