நேட்டோ சமீபத்தில் தொடங்கிய ஆர்க்டிக் முனைப்புத் திட்டம், மேற்கத்திய இராணுவ கூட்டணியின் செயல்பாடுகளில் நிரந்தர அம்சமாக மாற வேண்டும் என்று கனடாவின் வெளிநாட்டு அமைச்சர் நேற்றுப் புதன்கிழமை தெரிவித்தார்.
அனிதா ஆனந்த், அடுத்த இரண்டு நாட்களுக்கு டொராண்டோவில் நடைபெறும் Arctic 360 மாநாட்டின் தொடக்க உரையை நிகழ்த்தியிருந்தார்.
நேட்டோவின் தளபதி, Arctic Sentry எனப்படும் இந்த முனைப்புத் திட்டம் தொடங்கப்பட்டுள்ளதாகவும், அது தூர வட பகுதியில் கூட்டணி நாடுகளின் செயல்பாடுகளை ஒருங்கிணைக்கும் முழுமையான கட்டமைப்பை வழங்கும் என்றும் அறிவித்தார். இதில் கிரீன்லாந்தில் டென்மார்க் நடத்தும் இராணுவப் பயிற்சிகள் மற்றும் நோர்வே நடத்தும் வருடாந்திர Cold Response பயிற்சி ஆகியனவும் அடங்கும்.
“ஆர்க்டிக் சென்ட்ரி, உலகின் மிக முக்கியமான மூலோபாயப் பகுதிகளில் ஒன்றாகவும் சுற்றுச்சூழல் சவால்களால் நிறைந்ததாகவும் உள்ள இந்தப் பகுதியில், கூட்டணி நாடுகளை பாதுகாப்பதும் நிலைத்தன்மையைப் பேணுவதும் குறித்த நேட்டோவின் உறுதியை வெளிப்படுத்துகிறது,” என்று அமெரிக்க விமானப்படை தளபதி ஜெனரல் அலெக்சஸ் ஜி. கிரின்கெவிச் தனது அறிக்கையில் கூறினார்.
மாநாட்டில் சில மணி நேரங்களுக்கு பின்னர் உரையாற்றிய ஆனந்த், அந்தப் பகுதியை சிறப்பாக பாதுகாக்க நேட்டோவின் கவனத்தை ஈர்ப்பதற்காக கனடா நீண்ட காலமாக முயற்சி செய்து வந்ததாக தெரிவித்தார்; அந்தப் பகுதி தற்போது அதிகரித்து வரும் புவியியல் அரசியல் போட்டியின் மையமாக மாறி வருவதாகவும் அவர் குறிப்பிட்டார்.
நேட்டோ, அச்சுறுத்தல்களை கிழக்கு திசையில் மட்டுமல்லாமல் வடக்கு திசையிலும் கவனிக்க வேண்டும் என அவர் தெரிவித்தார். நேட்டோவின் உறுப்பினராக இல்லாத உக்ரைன், ரஷ்யாவுக்கு எதிராக உயர் தீவிரப் போரை நான்காவது ஆண்டை நெருங்கும் நிலையில் நடத்தி வரும் சூழ்நிலையில், இது முக்கியமானதாகும் என்றும் அவர் கூறினார்.
