யாழ்ப்பாணம், தென்மராட்சிப் பிராந்தியத்தில் பெரும் அரசியல் பரபரப்பை ஏற்படுத்தியுள்ள சாவகச்சேரி நகர சபை உப தவிசாளர் ஞா. கிசோரின் (Gnanasundaram Kishor) பதவி நீக்கத்திற்கு எதிராகவும், ஆளுநரின் வர்த்தமானி அறிவித்தலுக்குக் கண்டனம் தெரிவித்தும், நாளை வெள்ளிக்கிழமை சாவகச்சேரி நகரில் முழுமையான கடையடைப்புப் போராட்டத்திற்கு (Hartal) வர்த்தகர்கள் உத்தியோகபூர்வமாக அழைப்பு விடுத்துள்ளனா்.
நாளை (2026 ஜூன் 26, வெள்ளிக்கிழமை) அதிகாலை முதல் சாவகச்சேரி நகர சபை எல்லைக்குட்பட்ட அனைத்து வர்த்தக நிலையங்களையும் மூடி இந்த அறப்போராட்டத்தை முன்னெடுக்க வர்த்தகச் சங்கம் தீர்மானித்துள்ளது.
உள்ளூராட்சி ஆணையாளரின் உத்தியோகபூர்வச் சுற்றறிக்கையைச் சபை அமர்வின் போது பகிரங்கமாக விமர்சித்து, அதனைத் தூக்கி வீசிய குற்றச்சாட்டின் அடிப்படையில், வடமாகாண ஆளுநர் நா.வேதநாயகன் விசேட வர்த்தமானி அறிவித்தல் (Gazette Notification) மூலம் ஞா. கிசோரின் உப தவிசாளர் பதவியைப் பறித்ததுடன், அவரது நகர சபை உறுப்பினர் பதவியையும் வறிதாக்கியுள்ளார்.
வர்த்தகர்களின் உத்தியோகபூர்வ அழைப்பும் செய்திக்குறிப்பும்:
இவ்வதிரடிப் பதவி நீக்கத்திற்கு எதிராகச் சாவகச்சேரி வர்த்தகப் பெருமன்றம் ஊடகங்களுக்கு அவசர செய்திக்குறிப்பு ஒன்றினை அனுப்பி வைத்துள்ளது. அதன் முக்கிய விபரங்கள் வருமாறு:
அறப்போராட்ட அழைப்பு: “சாவகச்சேரி நகர சபை உப தவிசாளருக்கு எதிராக எடுக்கப்பட்டுள்ள தன்னிச்சையான இந்நடவடிக்கையைக் கண்டித்தும், எமது மண்ணின் பிரதிநிதிக்கான நீதியைக் கோரியும் நாளை வெள்ளிக்கிழமை முழுமையான கடையடைப்புப் போராட்டத்தை முன்னெடுக்கவுள்ளோம்.”
ஒன்றிணையக் கோரிக்கை: எமது மண்ணின் நீதிக்காக இன, மத, மொழி மற்றும் அரசியல் பேதங்களைக் கடந்து, சாவகச்சேரி நகரின் அனைத்து வர்த்தகப் பெருமக்களும் தங்களது கடைகளை முழுமையாக மூடி ஆதரவளிக்க வேண்டும்.
பொதுமக்களுக்கு வேண்டுகோள்: வர்த்தகர்களுக்கு மேலாகப் பொதுப் போக்குவரத்துத் துறையினர், சுயதொழில் புரிவோர் மற்றும் பொதுமக்களும் தங்களது அன்றாடச் செயற்பாடுகளைத் தவிர்த்து, இந்த அறப்போராட்டத்திற்குப் பேராதரவு தருமாறு அன்போடு கேட்டுக்கொள்கிறோம் என அச்செய்திக்குறிப்பில் வலியுறுத்தப்பட்டுள்ளது.
பின்னணி விபரம்:
சாவகச்சேரி நகர சபையின் அண்மைய சபை அமர்வின் போது, உள்ளூராட்சி திணைக்களத்தின் சுற்றறிக்கை ஒன்றின் விதந்துரைகளை உப தவிசாளர் ஞா. கிசோர் கடுமையாக விமர்சித்ததுடன், சபையினருக்கு முன்னிலையில் அதனைத் தூக்கி வீசியதாகக் குற்றச்சாட்டு முன்வைக்கப்பட்டது. இது சபையின் ஒழுக்கவிதிகள் மற்றும் உள்ளூராட்சி அதிகாரச் சட்டத்தை மீறும் செயல் எனச் சுட்டிக்காட்டி, ஆளுநரால் இந்த அதிரடி நீக்க உத்தரவு பிறப்பிக்கப்பட்டமை குறிப்பிடத்தக்கது
