இலங்கைக்கான சர்வதேச நாணய நிதியத்தின் (IMF) திட்டத்தின் கீழ் எட்டப்பட்ட ஊழியர் மட்ட உடன்பாட்டை (Staff-Level Agreement), மே மாத இறுதியில் அல்லது ஜூன் மாத தொடக்கத்தில் IMF நிறைவேற்றுச் சபை பரிசீலிக்கும் என எதிர்பார்க்கப்படுகிறது. தேவையான ‘முன்னைய நடவடிக்கைகள்’ (Prior actions) பூர்த்தி செய்யப்பட்டு மதிப்பீடு செய்யப்பட்ட பின்னரே இது சாத்தியமாகும் என்று இலங்கைக்கான IMF தூதுக்குழுவின் தலைவர் இவான் பாபகோர்ஜியோ தெரிவித்தார்.
சபை மீளாய்வுக்கான செயல்முறைகள் குறித்து விளக்கமளித்த பாபகோர்ஜியோ, ஒரு தூதுக்குழுவின் பணி முடிவடைந்ததும் IMF ஒரு தெளிவான காலவரிசையைப் பின்பற்றுவதாகக் கூறினார். இந்த விவகாரத்தை முறையாக நிறைவேற்றுச் சபைக்குக் கொண்டு செல்வதற்கு முன், இரண்டு முக்கிய முன்னைய நடவடிக்கைகள் திருப்திகரமாக முடிக்கப்பட வேண்டும் என்று அவர் விளக்கினார்.
IMF குழு வாஷிங்டன் திரும்பியதும், இந்த நடவடிக்கைகளை மதிப்பிடுவதற்கு இலங்கை அதிகாரிகளுடன் நெருக்கமாக இணைந்து பணியாற்றத் தொடங்கும் என்றும், அதே நேரத்தில் அதிகாரிகள் தங்கள் தரப்பில் சில படிகளை எடுக்க வேண்டியிருக்கும் என்றும் அவர் குறிப்பிட்டார். இவை வரும் வாரங்களில் நிறைவடையும் என எதிர்பார்க்கப்படுகிறது.
மீளாய்வு செயல்முறைக்குக் கவனமான மதிப்பீடு தேவை என்று அவர் எச்சரித்தார். தகவல்களைச் சரிபார்த்தல், உள்ளகச் சோதனைகளை முடித்தல் மற்றும் நிறைவேற்றுச் சபையின் பரிசீலனைக்காக வழக்கைத் தயார் செய்தல் போன்ற விரிவான தொழில்நுட்பப் பணிகளை IMF ஊழியர்கள் முடிக்க வேண்டும் என்று அவர் கூறினார்.
“பொதுவாக, இந்த செயல்முறை சில வாரங்கள் முதல் சில மாதங்கள் வரை எடுக்கும்,” என்று கூறிய பாபகோர்ஜியோ, முன்னேற்றங்கள் திட்டமிட்டபடி அமைந்தால், மே மாத இறுதியில் அல்லது ஜூன் தொடக்கத்தில் சபை கூட்டத்தை நடத்த IMF எதிர்பார்ப்பதாகத் தெரிவித்தார்.
இலங்கையின் IMF திட்டத்தின் அடுத்த கட்டத்திற்கான காலவரிசை குறித்த தெளிவான அறிகுறியை இந்தக் கருத்துக்கள் வழங்குகின்றன.
சர்வதேச நாணய நிதியத்தின் நீடிக்கப்பட்ட நிதி வசதியின் (EFF) கீழ், இலங்கையின் சீர்திருத்தத் திட்டத்தின் ஐந்தாவது மற்றும் ஆறாவது மீளாய்வுகளை நிறைவு செய்வதற்கான பொருளாதாரக் கொள்கைகள் குறித்து IMF ஊழியர்களுக்கும் இலங்கை அதிகாரிகளுக்கும் இடையில் வியாழக்கிழமை (9) ஊழியர் மட்ட உடன்பாடு எட்டப்பட்டமை குறிப்பிடத்தக்கது.
