பிரான்ஸ் முழுவதும் பதற்றம் அதிகரித்துள்ள நிலையில், வன்முறைச் சம்பவங்கள் தொடர்பாக 1,000க்கும் மேற்பட்டோர் கைது செய்யப்பட்டுள்ளனர்.

பள்ளிகளில் நிலவும் குறைபாடுகள் மற்றும் அதிகரித்து வரும் வாழ்க்கைச் செலவுகளுக்கு எதிராக பிரான்ஸில் சனிக்கிழமை தீவிர போராட்டங்கள் வெடித்தன.

சுமார் 550,000 மக்கள் வீதிகளில் இறங்கி போராட்டத்தில் ஈடுபட்டதாக மதிப்பிடப்பட்டுள்ள நிலையில், “வன்முறையின் தீவிர வளர்ச்சி” காரணமாக குறைந்தது 1,200 பேர் கைது செய்யப்பட்டுள்ளதாக பிரான்ஸ் அரசு தெரிவித்துள்ளது.

பாரிஸ் நகரில், இரவிலும் கலகத்தடுப்பு பொலிஸாருக்கும் போராட்டக்காரர்களுக்கும் இடையே கடுமையான மோதல்கள் இடம்பெற்றன. கூட்டத்தைக் கலைக்க பொலிஸார் கண்ணீர்ப்புகைக் குண்டுகளையும் நீர்த்தாரைப் பிரயோகத்தையும் பயன்படுத்தினர்.

தலைநகர் பாரிஸ் மற்றும் ஏனைய பிராந்தியங்களில் கட்டிடங்களுக்குத் தீ வைக்கப்பட்டது. Limoges (லிமோஜஸ்) பகுதியில் நகர சபை மண்டபத்தில் ஏற்பட்ட பெருந்தீ காரணமாக அதன் கூரையின் ஒரு பகுதி இடிந்து விழுந்தது.

பல நகரங்களில் சூறையாடல்கள் வெடித்ததுடன், நகர சபை அலுவலகங்கள் மற்றும் வணிக நிறுவனங்களை இலக்கு வைத்து பரவலான சேதங்கள் விளைவிக்கப்பட்டதாக செய்திகள் தெரிவிக்கின்றன.

பிரான்ஸ் பிரதமர் Sébastien Lecornu (செபாஸ்டியன் லெகோர்னு), இந்த வன்முறைகளில் 150 பொலிஸ் அதிகாரிகள் காயமடைந்துள்ளதாகத் தெரிவித்துள்ளார்.

பாரிஸில், மதிய வேளையில் பிரதான பேரணி அமைதியான முறையில் நடைபெற்றது. பிபிசியிடம் பேசிய இளைஞர்கள் குழுவினர், தாங்கள் “அமைதி விரும்பிகள்” என்றும், “மாற்றத்தை ஏற்படுத்தவே முயல்கிறோம், ஆனால் எதுவுமே நகரவில்லை” என்றும் கூறினர்.

இருப்பினும், நாள் நகர நகர, சில குழுக்கள் தெருக்களில் தீ வைத்தும், நகரின் மையப்பகுதியான Place de la République (பிளேஸ் டி லா ரெபப்ளிக்) போன்ற முக்கிய இடங்களில் வாகனங்களைக் கொளுத்தியும் வன்முறையில் ஈடுபட்டன.

கடைகள் சூறையாடப்பட்டன, குறைந்தது ஒரு உணவகம் தீயில் எரிந்து சாம்பலானது. சில குழுக்களுக்கு இடையே மோதல்கள் வெடித்ததையும் பிபிசி கவனித்தது.

பாரிஸ் மையப்பகுதியில் கலகத்தடுப்பு பொலிஸார் ஒரு கூட்டத்தை நோக்கிச் சென்று, பலரை லத்திகளால் தாக்கிய காட்சிகளும் காணப்பட்டன.

Lyon நகரில், அந்நகரத்தின் சுற்றுலா அலுவலகம் தீக்கிரையாக்கப்பட்டது ஒரு “பேரிடர்” என்று மேயர் Grégory Doucet ( கிரிகோரி டூசெட்) தெரிவித்தார். “இது எங்கள் இதயத்தை உடைக்கிறது, ஏனெனில் இது மிகவும் வரலாற்றுச் சிறப்புமிக்க, புகழ்பெற்ற கட்டிடம்” என்று அவர் BFMTV யிடம் கூறினார்.

அக்னிப் பாதுகாப்புப் படையினர் பாதுகாப்பாகத் தீயை அணைப்பதைத் “பகைமை கொண்ட நபர்கள்” தடுத்ததாக உள்ளூர் பொலிஸார் தெரிவித்தனர்.

லிமோஜஸ் நகர சபை மண்டபத்தில் ஏற்பட்ட தீயை அணைக்க தீயணைப்புப் படையினர் போராடினர். இந்தத் தீ காரணமாக கட்டிடத்தின் ஒரு பகுதி இடிந்து விழுந்ததாக உள்ளூர் மாவட்ட நிர்வாகம் தெரிவித்துள்ளது.

Saint-Étienne(சப்ட்-எட்டியென்) நகரில், கையெறி குண்டு வெடித்ததில் இளைஞர் ஒருவரின் கை துண்டிக்கப்பட்டதாக அந்நகர மேயர் Régis Juanico (ரெஜிஸ் ஜுவானிகோ) சமூக ஊடகங்களில் பதிவிட்டுள்ளார். “இத்தகைய சோகம் ஒருபோதும் நடந்திருக்கக் கூடாது” என்றும் அவர் குறிப்பிட்டுள்ளார்.

தலைநகரின் சில பகுதிகள்,Marseille (மார்சாய்), Rennes (ரென்ஸ்), Toulouse(துலூஸ்) மற்றும் Angers (அஞ்சேர்ஸ்) உள்ளிட்ட இடங்களில் முகமூடி அணிந்த நபர்களால் “திட்டமிடப்பட்ட வன்முறைச் செயல்கள்” மேற்கொள்ளப்பட்டதாக உள்துறை அமைச்சகம் தெரிவித்துள்ளது.

Grenoble (கிரெனோபிள்),Avignon (அவிக்னான்), Pau (போ),Montpellier (மாண்ட்பெலியர் ) மற்றும் வேலன்ஸ் (Valence) உள்ளிட்ட பிரான்ஸ் முழுவதிலும் உள்ள கட்டிடங்களுக்கு சேதம் ஏற்பட்டதாகப் பதிவாகியுள்ளது.

பாரிஸில் ஆடை மற்றும் உணவுப் பொருட்கள் கடைகள் சூறையாடப்பட்டன. லில் நகரில் உள்ள ஆப்பிள் (விற்பனையகம் உடைக்கப்பட்டு அங்கிருந்த பொருட்கள் திருடப்பட்டன.

ஒரு சுற்றுலா ரயிலை முகமூடி அணிந்த நபர்கள் குறுகிய தெரு வழியாக பொலிஸாரை நோக்கி ஓட்டிச் சென்ற காட்சி பிபிசி சரிபார்ப்பு அமைப்பால் உறுதிப்படுத்தப்பட்டுள்ளது.

15 முதல் 18 வயது வரையிலான மாணவர்கள் படிக்கும் பாடசாலைகளில் நிலவும் ஊழியர் பற்றாக்குறை மற்றும் சீரழிந்த வசதிகளைக் கண்டித்து, கடந்த சில வாரங்களாக நூற்றுக்கணக்கான மாணவர்கள் போராட்டம் நடத்தி வருகின்றனர்.

சனிக்கிழமையன்று, தொழிற்சங்க உறுப்பினர்கள் மற்றும் இதர போராட்டக் குழுக்களின் பங்கேற்பால் மாணவர்களின் எண்ணிக்கை பலமடங்கு அதிகரித்தது.

இந்தக் குழுக்களில் “மஞ்சள் அங்கி” இயக்கமும் அடங்கும். இவர்கள் 2018 ஆம் ஆண்டு முதல் ஓராண்டுக்கும் மேலாக வாழ்க்கைச் செலவு உயர்வுக்கு எதிராகப் போராட்டம் நடத்தி, பிரான்ஸ் வரலாற்றில் மிக நீண்ட காலம் நீடித்த போராட்ட இயக்கங்களில் ஒன்றாக மாறினர்.

பிரான்ஸுக்கு போராட்டங்களும் அமைதியின்மையும் புதிய விஷயமல்ல என்றாலும், இம்முறை நாடு ஒரு ஆழமான அரசியல் நிச்சயமற்ற காலக்கட்டத்தை நோக்கிச் செல்லும்போது இந்த வன்முறைகள் வெடித்துள்ளன.

பிரெஞ்சு அதிபர் Emmanuel Macron (இம்மானுவேல் மேக்ரான்) அடுத்த ஆண்டு பதவி விலகவுள்ளார். எதிர்வரும் ஏப்ரல் மாத அதிபர் தேர்தலில் தீவிர வலதுசாரித் தலைவரான மரீன் லெ பென் (Marine Le Pen) மற்றும் தீவிர இடதுசாரித் தலைவரான Jean-Luc Mélenchon ஆகியோருக்கு இடையே கடும் போட்டி நிலவக்கூடும் என கருத்துக்கணிப்புகள் தெரிவிக்கின்றன.

போராட்டத்தில் பங்கேற்ற மெலன்சோன், பொலிஸார் போராட்டக்காரர்கள் மீது அடக்குமுறையை அவிழ்த்துவிடுவதாகக் குற்றம் சாட்டினார். அதே சமயம் சூறையாடல் மற்றும் தீ வைப்புச் சம்பவங்களுக்கும் கண்டனம் தெரிவித்தார்.
போராட்டக்காரர்களின் “நியாயமான கோரிக்கைகள்” தீவிர இடதுசாரிகளால் “பிணைக்கைதியாகப் பிடிக்கப்பட்டுள்ளன” என்று மரீன் லெ பென் குற்றம் சாட்டினார்.

அதிபர் இம்மானுவேல் மேக்ரான் கூறுகையில்: “அரசு அலுவலகங்கள் மற்றும் வணிக நிறுவனங்களைத் தாக்கி, நகர சபைகளைச் சூறையாடியவர்கள் மீது சட்டப்பூர்வ நடவடிக்கை எடுக்கப்பட்டு தண்டிக்கப்படுவார்கள்” என்றார்.