துபாயிலிருந்து இஸ்ரேல் நோக்கிச் சென்ற விமானம் ஒன்றில், உதவி விமானிகளுக்கு (co-pilots) இடையே சண்டை மூண்டதாகக் கூறப்பட்டதை அடுத்து, அந்த விமானம் சவூதி அரேபியாவில் தரையிறங்கியுள்ளது.

விமானப் பணியாளர்கள் உதவி கேட்டதாகவும், பயணிகள் இணைந்து ஒரு விமானியை மடக்கிப் பிடித்துக் கட்டியதாகவும் அதிலிருந்த இஸ்ரேலியப் பயணி ஒருவர் செய்தியாளர்களிடம் தெரிவித்துள்ளார்.

புதன்கிழமை அதிகாலை புறப்பட்ட ஃபிளைதுபாய் (Flydubai) விமானம், பயணம் தொடங்கிய இரண்டு மணி நேரத்தில் அவசரநிலை சிக்னலை (emergency code) அனுப்பியதாக ‘ஃபிளைட்ரேடார்24’ (Flightradar24) கண்காணிப்பு இணையதளம் தெரிவிக்கிறது.

சில நிமிடங்களுக்குப் பிறகு, அது கடத்தல் சிக்னலுக்கு (hijacking code) மாற்றப்பட்டு, பின்னர் மீண்டும் பொதுவான அவசரநிலை சிக்னலுக்கே மாற்றப்பட்டது.

விமானம் தன் திசையை மாற்றுவதற்கு முன் ஏழு நிமிடங்கள் அவசரநிலை சிக்னல் ஒலித்தது

ஃபிளைட்ரேடார்24 (Flightradar24) தரவுகளின்படி, துபாயிலிருந்து டெல் அவிவ் நோக்கிச் சென்ற எஃப்.ஸெட்103 (FZ103) விமானம், சவூதி அரேபியாவிற்கு மேலே திடீரென தன் திசையை மாற்றி கீழே இறங்குவதற்குச் சற்று முன்பு, சுமார் ஏழு நிமிடங்களுக்கு அவசரநிலை சிக்னலை அனுப்பியது.

அந்த விமானம் 20 நிமிடங்கள் தாமதமாக, சர்வதேச நேரப்படி 03:05 மணிக்கு (04:05 BST) புறப்பட்டது.

“பொதுவான அவசரநிலையை” (general emergency) அறிவிக்கும் ‘7700’ எனும் அவசரநிலை ஸ்க்வாக் கோட் (squawk code), சர்வதேச நேரப்படி சுமார் 05:31 மணிக்கு அனுப்பப்பட்டது.

அதன்பின், “சட்டவிரோதத் தலையீட்டை” (unlawful interference) அறிவிக்கும் மற்றொரு அவசரநிலை சிக்னலான ‘7500’, 05:38 மணிக்கு அனுப்பப்பட்டதாக ஃபிளைட்ரேடார்24 நிறுவனம் ‘X’ தளத்தில் தெரிவித்து உள்ளது. இருப்பினும், இந்த சிக்னல் அவர்களின் இணையதளத்தில் நேரடியாகப் பதிவாகவில்லை.

அந்த விமானம் 05:40 மணிக்கு ஜோர்டான் வான்வெளிக்குள் சுருக்கமாக நுழைந்து, ஆறு நிமிடங்களுக்குப் பிறகு மீண்டும் சவூதி வான்வெளிக்கே திரும்பியது.

பின்னர் 06:11 மணிக்கு, சவூதி அரேபியாவின் தபூக் (Tabuk) நகரை நோக்கிச் செல்லும் பாதையில் அது மீண்டும் கீழ்நோக்கி இறங்கத் தொடங்கியது. அதன்பின் சிறிது நேரத்திற்கு விமானத்தின் இருப்பிடத் தரவுகள் கிடைக்கவில்லை. மீண்டும் 06:58 மணிக்கு தபூக் விமானநிலையத்தில் அது தரையிறங்கியபோது இருப்பிடம் பதிவானது

 (Reuters)  வழியாக இப்போது பயணிகள் அளிக்கும் வாக்குமூலங்கள்  கிடைத்து வருகின்றன.

யாஸ்மின் அபு காசிஸ் என்பவர் அந்த செய்தி முகமையிடம் கூறுகையில், தனது மகள் மிரியம் அந்த விமானத்தில் இருந்ததாகவும், அங்கே அலறல் சத்தங்கள் கேட்டதாகவும் தெரிவித்துள்ளார்.

கத்தியைப் பிடித்திருந்த ஒரு நபர், விமானிகளில் ஒருவரைத் தரையில் தள்ளிப் பலவந்தப்படுத்தியதாகவும், அங்கே எங்கெங்கும் ரத்தமாக இருந்ததாகவும் அவரது மகள் கூறியுள்ளார்.

விமானத்தின் பின்புறம் இருந்த இரண்டு விமானிகள் விமானத்தைத் தரையிறக்க உதவினர் – தகவல்கள் வெளியீடு

துபாயிலிருந்து டெல் அவிவ் சென்ற விமானத்தில் என்ன நடந்தது என்பது குறித்து இஸ்ரேலிய ஊடகங்களில் மேலும் பல தகவல்கள் வெளியாகி வருகின்றன.

பெயர் வெளியிட விரும்பாத பயணி ஒருவர் ஜெருசலேம் போஸ்ட் (Jerusalem Post) நாளிதழுக்கு அளித்துள்ள பேட்டியில், ஒரு விமானியை மற்றொரு விமானி கத்தியால் குத்தியதாகவும், ஆனால் விமானத்தின் முன்பகுதியில் இருந்த பயணிகள் தாக்குதல் நடத்தியவரை காக்பிட்டிலிருந்து (விமானி அறை) வெளியேற்ற உதவியதாகவும் தெரிவித்துள்ளார்.

விமானத்தின் பின்புறத்தில் மேலும் இரண்டு விமானிகள் பயணித்துக் கொண்டிருந்ததாக அந்த சாட்சி கூறுகிறார்.

“நான் அவர்களிடம் ஓடிச் சென்று விமானத்தைக் கட்டுப்பாட்டிற்குள் கொண்டுவருமாறு கத்தினேன்,” என்று அந்த பயணி ஜெருசலேம் போஸ்ட்டிடம் தெரிவித்துள்ளார்.

மேலும், காயமடைந்த விமானிக்கு அந்த விமானத்தில் பயணித்த பல் மருத்துவர் ஒருவர் உயிர்காக்கும் அவசரச் சிகிச்சையளித்ததாகவும் அந்த பயணி கூறியுள்ளார்.