சிப்காட் மற்றும் புதிய தொழிற்பூங்காக்கள் மேம்பாடு

• சுற்றுச்சூழல் மேம்பாடு: ரூ.100 கோடி செலவில் சிப்காட் தொழிற்பூங்காக்கள் சுற்றுச்சூழலுக்கு உகந்த வகையில் தரம் உயர்த்தப்படும். தொழிலாளர்களின் நலன் கருதி குழந்தைகள் பராமரிப்பு மையங்கள், தீயணைப்பு நிலையங்கள் மற்றும் சுகாதார மையங்கள் அமைக்கப்படும்.
• புதிய தொழிற்பூங்காக்கள்: நாமக்கல் – லத்துவாடி (ரூ.180 கோடி), தூத்துக்குடி – முடிவைத்தானேந்தல் (2,570 ஏக்கர்) மற்றும் விழுப்புரம் – ஓமந்தூர் (ரூ.146 கோடி) ஆகிய பகுதிகளில் புதிய சிப்காட் தொழிற்பூங்காக்கள் அமைக்கப்படும். இதன் மூலம் பல்லாயிரம் கோடி முதலீடுகளும் வேலைவாய்ப்புகளும் ஈர்க்கப்படும்.
• மின் வாகன (EV) பூங்கா: தூத்துக்குடி சில்லாநத்தம் பகுதியில் 1,294 ஏக்கரில் ரூ.774 கோடியில் மின் வாகன உற்பத்தி தொழிற்பூங்கா அமைக்கப்படும்.
• ஆயத்த தொழிற்கூடங்கள்: கங்கைகொண்டான் மற்றும் தூத்துக்குடி சிப்காட் பூங்காக்களில் ரூ.224 கோடியில் ‘பிளக் அண்ட் ப்ளே’ (Plug & Play) வசதியுடன் கூடிய ஆயத்த தொழிற்கூடங்கள் பொது-தனியார் பங்களிப்புடன் உருவாக்கப்படும்.

மகளிர் மற்றும் MSME நிறுவனங்களுக்கான திட்டங்கள்

• வெற்றி மகளிர் திட்டம்: மகளிர் தொழில்முனைவோரை ஊக்குவிக்கும் வகையில் “வெற்றி மகளிர் தொழில் முனைவோர் மேம்பாட்டுத் திட்டம்” அறிமுகப்படுத்தப்படுகிறது. இதன் மூலம் குறைந்த வட்டியில் கடன், பிணையச் சலுகைகள் வழங்கப்படும். தமிழ்நாடு தொழில் முதலீட்டுக் கழகம் (TIIC) மூலம் ரூ.500 கோடி கடனுதவி அளிக்கப்படும்.
• மின்னணு கடன் சேவை: MSME நிறுவனங்களுக்கு விரைவாகவும் வெளிப்படையாகவும் கடன் வழங்க, TIIC-ன் கடன் நடைமுறைகள் முழுமையாக மின்னணுமயமாக்கப்படும்.
• பட்டியல் நிதியுதவி (Bill Finance): 500 MSME நிறுவனங்கள் பயன்பெறும் வகையில், ரூ.600 கோடி நிதியுதவியுடன் இத்திட்டம் அனைத்து உள்ளாட்சி மற்றும் பொதுத்துறை நிறுவனங்களுக்கும் விரிவுபடுத்தப்படும்.

தொழில்நுட்பம் மற்றும் டிஜிட்டல் முன்னெடுப்புகள்

• குவாண்டம் பாதுகாப்பு (Quantum Safe TN): தமிழ்நாட்டின் தரவுப் பாதுகாப்பை வலுப்படுத்த, டிட்கோ மற்றும் எல்காட் நிறுவனங்கள் இணைந்து ரூ.1 கோடியில் ‘குவாண்டம் தொழில்நுட்ப பாதுகாப்பு’ குறித்த ஆய்வை மேற்கொள்ளும்.
• உலகளாவிய திறன் மையங்கள் (GCC): பல்லாவரம் – துரைப்பாக்கம் ரேடியல் சாலை, மவுண்ட் பூந்தமல்லி நெடுஞ்சாலை மற்றும் ஓ.எம்.ஆர் (OMR) சாலைகளில் ‘GCC வழித்தடம்’ அமைக்கப்பட்டு, உள்கட்டமைப்பு மற்றும் FSI சலுகைகள் வழங்கப்படும்.
• செமிகண்டெக்டர் ஊக்கத்தொகை: செமிகண்டெக்டர் துறையில் அதிக முதலீட்டை ஈர்க்க மாநில அளவில் பிரத்யேக ஊக்கத்தொகைத் திட்டம் அறிமுகப்படுத்தப்படும்.
• டிஜிட்டல் தளம்: சிப்காட் மனைகள் குறித்த விவரங்களை முதலீட்டாளர்கள் எளிதில் அறிய 3D வசதியுடன் கூடிய டிஜிட்டல் தளம் மற்றும் கண்காணிப்பு மொபைல் செயலி உருவாக்கப்படும்.

தொழிலாளர் நலன் மற்றும் சிறப்புத் திட்டங்கள்

• நிவாரணத் தொகை உயர்வு: உப்பளத் தொழிலாளர்களுக்கான மழைக்கால நிவாரணத் தொகை ரூ.5,000-லிருந்து ரூ.7,000 ஆக உயர்த்தப்படும். இதனால் 23,000 குடும்பங்கள் பயனடையும்.
• தங்குமிட வசதி: கங்கைகொண்டான் சிப்காட்டில் 2,500-க்கும் மேற்பட்ட தொழிலாளர்கள் தங்கும் வகையில் ரூ.130 கோடியில் பாதுகாப்பான தங்குமிட வசதி (Hostel) கட்டப்படும்.
• சிவகாசி வெடிபொருள் மையம்: சிவகாசி தொழிலாளர்களின் பாதுகாப்பை உறுதி செய்ய, ரூ.2 கோடியில் “வெடிபொருள் பொது வசதி மையம்” அமைப்பதற்கான விரிவான திட்ட அறிக்கை தயாரிக்கப்படும்.
• வெற்றி நோட்டுப் புத்தகங்கள் & உப்பு: கரூர் மாயனூரில் ரூ.6 கோடியில் “வெற்றி நோட்டுப் புத்தகங்கள்” தயாரிக்கும் ஆலை அமைக்கப்பட்டு, விலையில்லா திட்டத்திற்கும் பொது விநியோகத்திற்கும் வழங்கப்படும். மேலும், ரேஷன் கடைகளில் “வெற்றி இருவித செறிவூட்டப்பட்ட உப்பு” விற்பனைக்குக் கொண்டுவரப்படும்.
• ஜவுளிப்பூங்கா: புதுக்கோட்டை மாவட்டம் திரப்பிடங்கியில் பெண்களுக்கான வேலைவாய்ப்பை உருவாக்கும் வகையில் ரூ.25 கோடியில் சிறிய ஜவுளிப்பூங்கா அமைக்கப்படும்.