ஒன்ராறியோவை தளமாகக் கொண்ட கட்டுமான நிறுவனம் ஒன்று, தங்களுக்கு வழங்க வேண்டிய 178,000 டாலருக்கும் அதிக மதிப்புள்ள நிலுவை ஊதியம், வருமான இழப்பு மற்றும் ஒன்ராறியோ தொழிலாளர் உறவுகள் சபையினால் (Ontario Labour Relations Board) உத்தரவிடப்பட்ட இழப்பீட்டுத் தொகையை வழங்கத் தவறியதை அடுத்து, தாங்கள் இனி ஒருபோதும் கனடாவுக்குத் திரும்பப் போவதில்லை என்று ஜமைக்கா நாட்டைச் சேர்ந்த இரு சகோதரர்கள் தெரிவித்துள்ளனர்.
கேரிக் ராம்சூக் (Garick Ramsook) மற்றும் ரமேஷ் ராம்சூக் (Ramesh Ramsook) ஆகிய இரு சகோதரர்களும் கடந்த 2023 ஆம் ஆண்டில், ஒட்டவாவைத் தளமாகக் கொண்ட ‘பொலாட் கன்ஸ்ட்ரக்ஷன்’ (Polat Construction) நிறுவனத்தில் பணிபுரிவதற்காக, குறிப்பிட்ட நிறுவனத்திற்கு மட்டுமே செல்லுபடியாகும் மூடிய பணி அனுமதியுடன் (Closed work permits) கனடாவுக்கு வந்தனர். எனினும், இந்தச் சகோதரர்கள் அங்கு சுமார் ஆறு மாதங்கள் உழைத்த போதிலும், அவர்களுக்கு வெறும் ஆறு வாரங்களுக்கான ஊதியம் மட்டுமே வழங்கப்பட்டுள்ளதாகத் தொழிலாளர் துறை அதிகாரிகள் கண்டறிந்துள்ளனர்.
அத்துடன், தங்களது ஊதியத்தை அவர்கள் பலமுறை வலியுறுத்திக் கேட்டதால், அவர்கள் சட்டவிரோதமான முறையில் வேலையிலிருந்து நீக்கப்பட்டதாகவும் தொழிலாளர் சபை கண்டறிந்துள்ளது. அவர்களின் பணி அனுமதிப் பத்திரம் (Work permit) குறிப்பிட்ட அந்த ஒரு நிறுவனத்துடன் மட்டுமே பிணைக்கப்பட்டிருந்ததால், அவர்களால் உடனடியாக வேறு எந்தவொரு வேலையையும் தேடிக்கொள்ள முடியாமல் போனதுடன், அதன் விளைவாக அவர்கள் வீடற்ற நிலையை (Homelessness) எதிர்நோக்கியதோடு கடுமையான நிதி நெருக்கடிகளுக்கும் உள்ளாகினர்.
பாதிக்கப்பட்ட இந்தச் சகோதரர்களுக்கு மே 31 ஆம் திகதிக்குள் உரிய பணத்தைச் செலுத்துமாறு ‘பொலாட் கன்ஸ்ட்ரக்ஷன்’ நிறுவனத்திற்கு உத்தரவிடப்பட்டிருந்தது. எனினும், தங்களுக்கு இதுவரை எவ்விதப் பணமும் கிடைக்கவில்லை என்று அச்சகோதரர்கள் தெரிவித்துள்ளனர்.
இந்தக் கசப்பான அனுபவம் கனடாவின் சட்ட அமலாக்க முறையினால் தாங்கள் கைவிடப்பட்டது போன்ற உணர்வை ஏற்படுத்தியுள்ளதாகக் குறிப்பிட்டுள்ள சகோதரர்கள், கனடாவின் இந்தத் தற்காலிக வெளிநாட்டுத் தொழிலாளர் திட்டத்தை (Temporary Foreign Worker Program) மற்றவர்களுக்கு ஒருபோதும் பரிந்துரைக்க மாட்டோம் என்றும் வேதனையுடன் தெரிவித்துள்ளனர்.
இவ்விடயம் குறித்து ஒன்ராறியோ அதிகாரிகள் கருத்துத் தெரிவிக்கையில், ஊதியத் திருட்டு (Wage theft) என்பது ஒருபோதும் பொறுத்துக் கொள்ளப்பட மாட்டாது என்றும், இதற்காக அபராதங்கள் மற்றும் தண்டனைகள் அதிகரிக்கப்பட்டுள்ளதாகவும் சுட்டிக்காட்டியுள்ளனர். எனினும், சட்ட ரீதியாக வெற்றிபெற்ற பல வழக்குகளுக்கான இழப்பீட்டுத் தொகையை வசூலிப்பதற்கும், சட்டத்தை அமல்படுத்துவதற்கும் போதிய மற்றும் முறையான வழிமுறைகள் இல்லாததால், பல தொழிலாளர்களுக்கு இன்னும் தங்களது நியாயமான பணம் கிடைக்காமலேயே உள்ளதாகத் தொழிலாளர் நல ஆர்வலர்கள் குற்றம் சாட்டுகின்றனர்.
