முகநூல் , யூடியூப் மற்றும் எக்ஸ் (X) போன்ற தளங்களில் செய்திகளைப் பகிரும் செல்வாக்கு செலுத்துபவர்கள் மற்றும் போட்காஸ்டர்களைத் தங்களது ஒழுங்குமுறை வரம்பிற்குள் கொண்டு வர இந்திய அரசு திட்டமிட்டுள்ளது.

மின்னணு மற்றும் தகவல் தொழில்நுட்ப அமைச்சகம் (MeitY) அண்மையில் முன்மொழிந்துள்ள தகவல் தொழில்நுட்ப விதிகளின்படி, “செய்தி வெளியீட்டாளர்கள் அல்லாத பயனர்கள்” நடப்பு விவகாரங்கள் குறித்துப் பதிவிடும்போது, அங்கீகரிக்கப்பட்ட ஊடகங்கள் பின்பற்றும் அதே ‘அறநெறிக் கோவை’யைப் (Code of Ethics) பின்பற்ற வேண்டும். இது குறித்துக் கருத்துத் தெரிவிக்க ஏப்ரல் 14-ஆம் திகதி வரை அவகாசம் வழங்கப்பட்டுள்ளது.

இதன் மூலம், தனிப்பட்ட ஊடகவியலாளர்கள் மற்றும் சாதாரண பயனர்களின் செய்தி தொடர்பான பதிவுகள் மீது அரசுக்குக் கூடுதல் அதிகாரம் கிடைக்கும் என நிபுணர்கள் எச்சரிக்கின்றனர். சமூக ஊடக நிறுவனங்கள் தங்களுக்கு வழங்கப்பட்டுள்ள சட்டப் பாதுகாப்பைத் தக்கவைத்துக்கொள்ள வேண்டுமானால், அரசின் இந்த வழிகாட்டல்களைக் கட்டாயம் பின்பற்ற வேண்டும் என அரசு வலியுறுத்துகிறது.

டிஜிட்டல் உரிமை ஆர்வலர்கள் மற்றும் சுயாதீனச் செய்தியாளர்கள் இந்தத் திருத்தங்கள் குறித்து அச்சம் தெரிவித்துள்ளனர். 60 லட்சத்திற்கும் அதிகமான சந்தாதாரர்களைக் கொண்ட ‘The Deshbhakt’ யூடியூப் சேனலை நடத்தும் ஆகாஷ் பானர்ஜி இது குறித்துக் கூறுகையில்:

“நாட்டில் வெறுப்புப் பேச்சு மற்றும் போலிச் செய்திகள் குறைந்தபாடில்லை. ஆனால், அரசை விமர்சிக்கும் பதிவுகள் — அவை நகைச்சுவையாக இருந்தாலும் கூட — பெருகிய முறையில் முடக்கப்படுகின்றன அல்லது நீக்கப்படுகின்றன.”

கடந்த மார்ச் மாதம், ‘எக்ஸ்’ தளம் சுமார் ஒரு டஜன் கணக்குகளை அரசின் உத்தரவின் பேரில் முடக்கியது. அவற்றில் பலவும் அரசை நையாண்டி செய்யும் கணக்குகளாகும். @Nehr_who? என்ற கணக்கை நடத்தும் குமார் நயன், நீதிமன்ற உத்தரவின் மூலம் தனது கணக்கை மீட்டாலும், அவரது 10 பதிவுகள் இந்தியாவில் இன்னும் முடக்கப்பட்டுள்ளன. அவை பிரதமர் மோடி அல்லது பா.ஜ.க அரசை விமர்சிப்பவை என்பது குறிப்பிடத்தக்கது.

2021-இல் அறிமுகப்படுத்தப்பட்ட இந்த தகவல் தொழில்நுட்ப விதிகள், பல திருத்தங்களுக்கு உள்ளாகியுள்ளன. 2025-இல் கொண்டுவரப்பட்ட ‘சஹ்யோக்’ (Sahyog) போர்டல் மூலம், பல்வேறு அரசு முகமைகள் வெளிப்படைத்தன்மையின்றிப் பதிவுகளை நீக்க உத்தரவிட முடிகிறது. 2026-ஆம் ஆண்டின் தொடக்கத்தில் கொண்டுவரப்பட்ட மாற்றத்தின்படி, ஒரு பதிவை நீக்க அரசு உத்தரவிட்டால், அதனை வெறும் 3 மணிநேரத்திற்குள் சமூக ஊடக நிறுவனங்கள் நிறைவேற்ற வேண்டும்; முன்னதாக இதற்கு 36 மணிநேரம் அவகாசம் இருந்தது.

இது குறித்து மின்னணு மற்றும் தகவல் தொழில்நுட்ப அமைச்சகத்தின் செயலாளர் எஸ்.கிருஷ்ணன்  கூறுகையில்,

“செய்திகளை இப்போது சாதாரண குடிமக்களும் பகிர்வதால், நடப்பு விவகாரங்களைக் கையாள ஒரு பொதுவான கொள்கை கட்டாயம் தேவைப்படுகிறது,” எனத் தனது அமைச்சகத்தின் நடவடிக்கையைத் தற்காத்துப் பேசினார்.

இருப்பினும், இந்த விதிகள் விமர்சகர்களை ஒடுக்குவதற்கும், சமூக ஊடகங்களில் தணிக்கையைச் சட்டப்பூர்வமாக்குவதற்கும் வழிவகுக்கும் என உரிமை ஆர்வலர் நிகில் பஹ்வா போன்றோர் எச்சரிக்கின்றனர்.