பிராம்ப்டன் நகரில் பட்டப்பகலில் இடம்பெற்ற வாகனக் கடத்தல் (Carjacking) முயற்சியின் போது, இருவர் மீது துப்பாக்கிச் சூடு நடத்திய குற்றச்சாட்டில் 19 வயது இளைஞர் ஒருவர் கைது செய்யப்பட்டுள்ளார். இச்சம்பவத்துடன் தொடர்புடைய மற்றொரு சந்தேகநபர் இன்னும் தலைமறைவாக உள்ளார்.
கடந்த ஏப்ரல் 6-ஆம் திகதி நண்பகல் 12 மணியளவில், பிராம்ப்டனின் சென்ட்ரல் பார்க் டிரைவ் (Central Park Drive) மற்றும் கிளென்வேல் புலிவார்ட் (Glenvale Boulevard) சந்திப்பிற்கு அருகே இந்தச் சம்பவம் நிகழ்ந்துள்ளது.
இரண்டு சந்தேகநபர்கள் சேர்ந்து வாகனத்தில் இருந்த இருவரை வழிமறித்துக் கடத்த முயன்றுள்ளனர். அப்போது ஏற்பட்ட மோதலில் வாகனத்தில் இருந்த இருவர் மீதும் துப்பாக்கிச் சூடு நடத்தப்பட்டுள்ளது.
துப்பாக்கிச் சூட்டுக்கு இலக்கான போதிலும், பாதிக்கப்பட்டவர்கள் அதே வாகனத்தில் தப்பிச் சென்றுள்ளனர். காயமடைந்தவர்களில் ஒருவர் ஆபத்தான நிலையில் மருத்துவமனையில் சிகிச்சை பெற்று வருவதுடன், மற்றவர் உயிருக்கு ஆபத்தில்லாத காயங்களுடன் தப்பியுள்ளார்.
பீல் பிராந்திய பொலிஸார் (Peel Regional Police) மேற்கொண்ட தேடுதல் நடவடிக்கையின் போது, சந்தேகநபர் ஒருவரைத் துரத்திச் சென்று கைது செய்தனர். கைது செய்யப்பட்ட நபரால் தானியங்கி முறையில் சுடக்கூடிய (Automatic fire) சட்டவிரோதத் துப்பாக்கி ஒன்று பயன்படுத்தப்பட்டதாகப் பொலிஸார் தெரிவித்துள்ளனர்.
கைது செய்யப்பட்ட நபர் பிராம்ப்டனைச் சேர்ந்த 19 வயதுடைய நேசியன் ஒகோகோ (Naesean Okoko) என அடையாளம் காணப்பட்டுள்ளார். இவர் மீது கொலை முயற்சி உட்பட ஒன்பது குற்றச்சாட்டுகள் சுமத்தப்பட்டுள்ளன. அவர் தற்போது பிணை வழங்கப்படாமல் தடுப்புக் காவலில் வைக்கப்பட்டுள்ளார்.
இந்தச் சம்பவத்துடன் தொடர்புடைய இரண்டாவது சந்தேகநபரைத் தேடும் பணிகளைப் பொலிஸார் தீவிரப்படுத்தியுள்ளனர். இது குறித்த மேலதிகத் தகவல்கள் தெரிந்தவர்கள் தமக்கு அறியத்தருமாறு பொலிஸார் பொதுமக்களிடம் கோரிக்கை விடுத்துள்ளனர்.
