கமல் பிறந்தநாளில் நாயகன் திரைப்படம் மறு வெளியீடு செய்யப்படும் நிலையில் இம்மாதம் மட்டும் நாயகன் உட்பட நான்கு மிகப்பெரிய வெற்றிபெற்ற திரைப்படங்கள் தமிழில் ரீரிலீசாக உள்ளதாக தகவல் கிடைத்துள்ளது.

கமல்ஹாசன் நவம்பர் 7 ஆம் தேதி தனது பிறந்தநாளை கொண்டாடவுள்ளார். அவரின் பிறந்தநாளை அவரது ரசிகர்களும் கொண்டாட தயாராக இருக்கின்றனர். கமலின் பிறந்தநாளை முன்னிட்டு அவர் நடித்து வரும் படங்களின் அறிவிப்புகள் ஏதேனும் வெளியாகும் என எதிர்பார்க்கப்படுகின்றது. மேலும் கமலின் தயாரிப்பில் ரஜினி நடிப்பில் சுந்தர் சியின் இயக்கத்தில் உருவாகும் படத்தின் அறிவிப்பும் அவரின் பிறந்தநாளை முன்னிட்டு வெளியிட இருப்பதாக தெரிகின்றது. இந்நிலையில் கமல்ஹாசனின் பிறந்தநாளை மேலும் சிறப்பிக்கும் வகையில் அவரது நடிப்பில் வெளியாகி இந்திய திரையுலகையே திருப்பிப்போட்ட நாயகன் திரைப்படம் ரீரிலீஸாகவுள்ளது. நாயகன் படத்தை தொடர்ந்து மேலும் ஒரு சில படங்கள் இம்மாதம் ரீரிலீசாக இருக்கின்றது. அப்படங்கள் என்னென்னெ என்பதனை பார்க்கலாம்

அட்டகாசம்

​அஜித் நடிப்பில் சரண் இயக்கத்தில் 2004 ஆம் ஆண்டு வெளியான அட்டகாசம் திரைப்படம் அக்டோபர் மாதமே திரையில் வெளியாக இருந்தது. ஆனால் ஒரு சில காரணங்களால் இப்படத்தின் ரீரிலீஸ் தள்ளிவைக்கப்பட்டது. இது அஜித் ரசிகர்களை ஏமாற்றத்தில் ஆழ்த்திய நிலையில் தற்போது நவம்பர் மாதம் இப்படம் கண்டிப்பாக ரீரிலீசாகும் என எதிர்பார்க்கப்படுகின்றது.

ஆட்டோகிராஃப்

சேரன் இயக்கி நடித்த ஆட்டோகிராஃப் திரைப்படம் 2004 ஆம் ஆண்டு வெளியானது. காதல் படங்களிலேயே மிகவும் வித்தியாசமாகவும் அதே சமயத்தில் யதார்த்தமாகவும் இப்படத்தை எடுத்து அசத்தியிருப்பார் சேரன். சேரன், சினேகா, ராஜேஷ் என பலரது நடிப்பில் 2004 ஆம் ஆண்டு வெளியான இப்படம் மிகப்பெரிய வெற்றியை பெற்றது. மேலும் ட்ரெண்ட் செட்டர் படமாகவும் ஆட்டோக்ராப் திரைப்படம் உருவெடுத்தது. இந்நிலையில் இப்படம் நவம்பர் 14 ஆம் தேதி புதுப்பொலிவுடன் திரையில் வெளியாக இருக்கின்றது.

நாயகன்
​கமல் -மணிரத்னம் கூட்டணியில் 1987 ஆம் ஆண்டு திரையில் வெளியானது. கிட்டத்தட்ட நாயகன் திரைப்படம் வெளியாகி நாற்பது ஆண்டுகள் ஆகிவிட்டது. ஆனாலும் தற்போதைய தலைமுறையினர் இப்படத்தை பார்த்தாலும் ,இந்த ட்ரெண்டிற்கு ஏற்றாற்போல இருப்பதாக கூறி வருகின்றனர். அந்தளவிற்கு காலத்தை தாண்டி கொண்டாடப்படும் படமாக நாயகன் உருவெடுத்திருக்கிறது.

ஃப்ரண்ட்ஸ்

​விஜய் -சூர்யா இருவரும் இணைந்து நடித்த படம் தான் ஃப்ரண்ட்ஸ்.இப்படத்தை மலையாள இயக்குனர் சித்திக் இயக்கியிருந்தார். மேலும் வடிவேலு ,தேவயானி, சார்லி என பலர் இப்படத்தில் நடித்திருந்தனர். இன்றுவரை இப்படத்தில் இடம்பெறும் காமெடி காட்சிகள் ரசிகர்களால் கொண்டாடப்பட்டு வருகின்றது. அந்தளவிற்கு ரசிகர்களால் கொண்டாடப்படும் ஃப்ரண்ட்ஸ் திரைப்படம் மீண்டும் திரையில் ரீரிலீஸாகவுள்ளது. நவம்பர் 21 ஆம் தேதி ஃப்ரண்ட்ஸ் திரைப்படம் மீண்டும் திரையில் வெளியாக இருப்பதாக அறிவிக்கப்பட்டுள்ளது. கண்டிப்பாக ரீ ரிலீஸிலும் இப்படம் வசூலில் சாதனை படைக்கும் என எதிர்பார்க்கப்படுகின்றது