”தமிழகத்தில் 5.75 லட்சம் அரசு பணியிடங்கள் காலியாக உள்ளன. அவற்றை தி.மு.க., அரசு நிரப்பவில்லை,” என, அ.தி.மு.க., பொதுச்செயலர் பழனிசாமி தெரிவித்தார்.
சேலம் மாவட்டம் ஓமலுாரில், அ.தி.மு.க., 54ம் ஆண்டு விழா பொதுக்கூட்டம், நேற்று முன்தினம் நடந்தது. இதில், கட்சியின் பொதுச்செயலர் பழனிசாமி பங்கேற்று பேசினார். அப்போது, அவர் கூறியதாவது:
இந்தியாவிலேயே ஊழல் நிறைந்த மாநிலம் தமிழகம் என்ற கேவல நிலையை ஏற்படுத்தி உள்ளனர். மக்களை பற்றி சிந்திக்காமல், குடும்பத்தை பற்றியே சிந்திக்கின்றனர். தமிழகத்தில் நடக்கும் குடும்ப ஆட்சியில், நான்கு முதல்வர்கள்.
ஸ்டாலின், உதயநிதி, ஸ்டாலின் மனைவி துர்கா, மருமகன் சபரீசன் என நான்கு அதிகார மையங்கள், மக்களை ஆட்டிப்படைக்கின்றன. அதனால் தான் லஞ்ச லாவண்யம் மலிந்து விட்டது. மதுரை மாநகராட்சியில், 700 கோடி ரூபாய் ஊழல் செய்து, தி.மு.க., மேயரை துாக்கினர். இன்று வரை புதிய மேயரை நியமிக்க முடியவில்லை. பங்கு பிரிப்பதில் இன்று வரை போராட்டம் நடக்கிறது.
தி.மு.க., ஆட்சியில் பெண்கள், சிறுமியர், மூதாட்டிகளுக்கு கூட பாதுகாப்பு இல்லை. நான் தவறான கருத்தை பரப்பு வ தாக, தி.மு.க.,வின் ஆர்.எஸ்.பாரதி கூறுகிறார். அவருக்கு வயது முதிர்ந்து விட்டது; புத்தி சரியாக இல்லை.
தமிழகத்தில் எங்கு பார்த்தாலும் போதைப்பொருட்கள். தன் கையில் போலீஸ் துறையை வைத்துக்கொண்டு, அதை தடுக்க திராணியற்ற முதல்வராக ஸ்டாலின் உள்ளார்.
