மொன்ட்ரியல் நகரின் இரண்டாவது ‘மொடுலர்’ (Modular) வீட்டுத் திட்டம் நிறைவுபெற்றுள்ளது.
இதனை பிரதமர் மார்க் கார்னி மற்றும் மொன்ட்ரியல் மேயர் சோரயா மார்டினெஸ் பெர்ராடா ஆகியோர் திறந்து வைத்தனர்.
வீடற்ற நிலையில் இருப்பவர்களுக்குப் பாதுகாப்பான தங்குமிடத்தை வழங்கும் நோக்கில், இத்திட்டம் முன்னெடுக்கப்பட்டிருந்தது.
மொன்ட்ரியல் நகரின் அஹுன்ட்சிக்-கார்டியர்வில் (Ahuntsic-Cartierville) பகுதியில் அமைக்கப்பட்டுள்ள இந்த வளாகம், வெறும் தங்குமிடம் மட்டுமல்லாமல், மக்களின் வாழ்வாதாரத்தை மேம்படுத்தும் ஒரு பாலமாகச் செயல்படும்.
இந்த வளாகத்தில், மொத்தம் 27 அறைகள் உள்ளன.
இதில் 24 தனிநபர் அறைகளும், தம்பதியினருக்காக 3 இரட்டை அறைகளும் ஒதுக்கப்பட்டுள்ளன.
மாற்றுத்திறனாளிகள் மற்றும் செல்லப்பிராணிகள் வைத்திருப்பவர்களுக்கும் இங்கு அனுமதி வழங்கப்பட்டுள்ளது.
RAP Jeunesse என்ற சமூக அமைப்பு இந்த மையத்தை 24 மணிநேரமும் நிர்வகிக்கும் எனத் தெரிவிக்கப்பட்டுள்ளது.
தங்குபவர்களுக்கு உணவு, மனநல ஆலோசனை மற்றும் வேலைவாய்ப்புக்கான உதவிகள் இங்கு வழங்கப்படும் எனவும் அறிவிக்கப்பட்டுள்ளது.
